DANIEL 10
10
Taigris Reipe hinou Daniel nou Zho Ngaoyu
1Parsia hi veo Sairas nou vekoulouyu po asü kousü Belteshazzar tea kuyu Daniel hi chipao ali paosüngao peie. Chipao sünasü cheche-e, ana süloure hai tateishoe. Haina hai puh hi puhvei zho kounou shozü nou paongaotou tupeie.
2Süphaki, hapta asü lihai Enou dopfüa kra nou bue. 3Hapta asü chemo koute Enou touso aveih tya toumoe, zhaoh-a somoe, alia theadzü na-a peia kumoe.
4Potei hi khouh arai navei khoukha kaidai zhou, Enou dushoyu Taigris reipe hinou la-a bue. 5Sühinou anghithou hepa zhuyu phaki, mai ali züzüyu sah ba-a ae puhvei khyakho hai veishoyu sana nou khopfüa bue. 6Puh pfüphao hai chuhva büwe, ae puh pah hai teireiyu büwe, puhvei nghithou hai meikei ali büe. Puhvei phibah hai souphou khaitouyu baosahu büwe alia puh pai hai mai soudu nou raoyu kho büe.
7Zho nasü E likhi ngaoa baie. Eye koa laiyu mai hrülai nou zho nasü ngaomoe, ana puletao nou ngaopi shopoa tutare ae tuchü takhai toure. 8E lah likhei khupashoyu zho nasü zhua baire, südonou avei pfüchi sü hazhi tare, ae azhuh hai-a tyaku tare alia avei khouko sü hatare. 9Süthaisü Enou puh paisü choue, alia Enou puh pai sü chouloua apah deiphi pfünakou holoure ae E sü tsü hatare. 10Ana bah ali nou thaikou Eye pailashu peie; ae aphibah sü ngudoudoua buhie.
11Rakivamai nanou ahi paoe, “Oh Daniel, Ramai nou neye leshie. Enou paoyu chipao taosü soutousou keitou tulo, ae latou tulo, daiolouzü Eye ne hi seivewe.” Puhnou ahi chipao haitao pao-a buyu phaki, E sü lashu loure ana shihrührüa buhie.
12Süthaisü puhnou ahi paoe, “Daniel, ngaopiso, daiolouzü nenou tsüsüyu ngaoloure donou Ramai nghoujü nou nakouloua veachi paoyu nasü, süzhou teithe hinou nevei veachi sü noupeiwure, alia nevei veachi nasü chila peire donou E ve-a baie. 13Parsia vei vedei khoyu rakivamai nanou Eye teithe kaili nuchao loure. Ana rakivamai hi peichayu Maikhel nou Eye ve soukha peie, südonou Enou puhye Parsia hi khaiwua haihi vewe. 14Enou haihi ve neye panou haithai nevei maitao hi daidai vepa laiyu taosü süloure donou vewe. Haihai akhai teithe hi vepare vei zho ngaopeiyu nasüe.”
15Puhnou ahi haibüa chi paoyu phaki, Esü apah deiphi pfünakou loure alia raolou hore. 16Süthaisü mai büyu rakivamai ali nou avei mütai kou puh bah nou daipeie, süthai sünou amü hepaloua pailoue. Anghoujü nou la-a buyu nahisü Enou paoe, “Apaopuwo, zho ngaoyu na vanou Esü avei pfüchi hare. 17Apaopuwo, ne kilai E kabüa apaopuye chiphalou khailaige? Daiolouzü apfüchi hare, ae assü hailou hore.”
18Süthaia mai büa buyu nanou Eye deipu peie ae Eye soukhoupu peie. 19Puhnou ahi paoe, “Ramai nou neye leshi shoe, südonou ne ngaopiso, kaonayu sünou ne hi bulo, khouchilo ae khuveilo.”
Puhnou ahi paoyu thaisü, avei pfüchi pare alia puh hi haibüa Enou paoe, “Apaopuwo, nenou ahi paolaiyu taosü paopei khaio, daiolouzü nenou Eye soukhou peire.”
20Süthaisü puhnou paoe, “Enou ne hi veyu hai daivanou vewe touyu ne süho moe? E taho Parsia teidei khowo rakivamai naye reih soulai hie, alia Enou tayu thaisü, Grik mai teidei khowo rakivamai nanou velai. 21Ana acheche larübvü hinou rüthou khaitouyu nasü Enou ne hi paopeilai: Puletaoye reih züyu hisü Eye soukha peire mai kukhe ali-a hae, neletaoye soukha peiyuna rakivamai Maikhel likhi baie.
Currently Selected:
DANIEL 10: POUMBSI
Highlight
Share
Compare
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.