DANIEL 11
11
1Mede mai khü hinou hrüveyu Darius nou vekou louyu po araina hisü Enou puhye soukha peie alia soukhou peie. 2Alia Enou chuo ne hi paopeire chipao hai cheche-e.”
Ejipt alia Sairia vei Vedei
Rakivamai nanou paoe, “Parsia vedei hi vemai asü hrüve pulai, ae vemai adai chenanou puletao teitei jünou kini nipu sholai hie. Puhnou kini nipayu phaki alia khouko veikheyu phaki, puhnou Grik maivei vedeiye sü souchoro peilai.
3“Süthaisü khouko pfüshoyu vemai ali palai, ae puhnou dushoyu vedei nasü kholai alia puhnou sounü pfünü khesü puh dosoua soupfü loulai. 4Puhnou sübüa khouko pfüsho payu phaki, puhvei vedei sü dade adai soua bailai. Puhvei vebuh hisü maitya kukhemai nou pa veo soua bailai, ana puletao hai puh büa khouko bulai moe.
5“Süthaisü khekounou buyu Ejipt teidei hinou khoushoyu vemai ali palai, ana puh jünou puh khehinou buyu peikhomai ali nou khoupu palai, ae puhnou khoyu vedei sü dusholai. 6Po daotu thaisü Ejipt hi veo nou Sairia hi veoye koa chavei lathaore donou vo soulai, alia puhnou puh nahpaiye sü Ejipt veo hi peilai. Ana puhai nou soukhai touyu vo nasü phasho laimoe, alia honapai, honapai khapu, honapai vei nahmai,#11.6 Larübvü ali hi honapai vei nahmai; Hebrew honapai vei puo. ae puhye koa veyu kilai mai hrülaiye sü southa bailai. 7Thashoa nou honapai vei kityarai mai ali nou pa veo soulai. Puhnou Sairia veo hisü reih huloulai, ae puhnou reih sü ngaloulai. 8Puhnou puletao vei basharatao, shahu ae sana nou soukhai touyu mutei paikhao khesü Ejipt hi potawulai, alia po daotu lihai puhnou reih soumoa kaona-a bulai. 9Süthaisü reilo buyu Sairia veo nou khelo buyu Ejipt maivei teidei hisü reih huloulai, ana puhnou reih hulou loumoa lah teidei hi dakhai ta-a bailai.
10“Sairia hi veo puhvei nahpoutu maitao nou soureih soure donou reihmai taoli soudaloua dzüdu büa puletao ngaobamai hisü reih soutalai. 11Süthaisü khelo buyu Ejipt hi veo nou rarou sholoua takhe reilo buyu Sairia veoye reih zülai, alia puhnou Sairia veo vei reihmai taoliye sü nükhaiwulai. 12Puhnou reih veiloua reihmai taoliye southa louyu vanou ae nükhai louyu vanou puhsü khaophu sousho palai, ana puhnou phashoa veikou laimoe.
13“Süthaia reilova buyu Sairia veo nou raiki jünou reihmai poupua tudakhai loulai, alia po daotu thaisü puhnou reihmai me aduli ae reih basei soutaosou tupfüloua dakhai kou reih soupulai. 14Süphaki mai alao nou Ejipt veoye sü hraitalai. Alia Daniel, nevei maitao hrohinou lekha ashi kamai-a nou zho ngaoyu nasü panou vete loure donou reih sü soulai, ana veilou laimoe. 15Südonou reilova buyu Sairia veo nou veishoa soukhai touyu nuhdu khesü poloua bailai. Ejipt maivei reihmaitao hai reih zülou hoa bailai, pfüchi veishoyu ae khouko bushoyu reihmai koutea khouko ha-a bailai. 16Sairia reihmaitao nou sounüna thaifüa puletao nou souloua bailai, daiolouzü mai ali koutea puletao nghoujü hi lalou laimoe; alia puletao nou Apaokhai touyu Teidei hisü louloulai, ae sükhe teitei hai puletao vei khakhe hinou bua bailai.
17“Sairia hi veo nou puhvei khouko teitei nou thouloua puhye ngaobayu vedeitao pei hisü reih soutalai. Puhnou süsü soure donou puh nahpaiye puh hi peia puhye koa reih soulai, ana puhsü veilou laimoe, moa süsü puhye donou kaozho aveih ngaolou laimoe. 18Süthaisü puhnou zaidu pehao hinou buyu vedei taoli hi reih soulai alia puhnou ngaloulai, ana puhvei khaophu nasü vakou maivei vedei hinou hrüyu mai ali nou souhawu bailai, alia puhnou khaophu souyu büa puh hisü soudakhai peilai. 19Veo nou lah puhvei vedei hisü dakhai talai, ana puh phi süloua kaota bailai ae puhye ngaomo ta-a bailai.
20“Süthaisü puh thaosoua pa vekoulouyu mai ali nou vedei sünasü soudu souso loure donou peikhomaiye sü panou kikha khatalai; ana teile jütou hinou puhye sü southa bailai, puhye southayu sü lekha rarou hinou laimoe, aliro soureih souyu hinou laimoe.
Shishoyu Sairia hi Veo
21“Süthaisü puh thailo pa veo soulaiyu nasü vetya moyu mai ashimai alinou pa veo soulai, lichokhai timoa buyu teile hinou puhnou vedei sü poloulai. 22Mai taralia puhye dulouzü, Ramai vei Napao peichana koutea puhnou souhawu bailai. 23Puhnou koa vo souloua tyahrü taoli hinou do ashitya koloulai, alia puhnou khoyu vedei hai tai-a buyuma puh sü khoulailai ae dulailai palai. 24Puhnou kheikhei soua kini buyu teidei khesü soureih souvelai, ae puhnou puhvei paipao mainou soukhai toumoyu vah khesü soulai alia reih souyu hinou ngaolouyu kini khesü puh thaifüa laiyu maitaoye koa zhiloulai. Puhnou veishoa soukhai touyu nuhdu khesü reih soure donou tsüchoa soudalai, ana puhsü teile phasoa bukoulai moe.
25“Puhnou soutaosoua dushoyu ae khoushoyu reihmai me ali saloua khekou buyu Ejipt veo pei hisü reih soulai. Ejipt hi veo-a reihmai taoli saloua reih sü dulai, ana puhsü pahshia bailai, daiolouzü puhye sü shodo souloua lalou bailai. 26Puhye sü puh khenou buyu peikhomai, puhye koa touso zhoyu mainou puh hisü shodo ashi soupeia puhvei reihmai taoliye sü souhawulai alia southa bailai. 27Süthaisü vemai ahai sünou koa touso zholai, anou puhai tsüle hiolouzü do ashili choa alinou ali hi dachi paolai, ana puhai nou jüpa-a phouyu khesü ngaoloulai moe, daiolouzü apaokhai touyu akhai teile sü vemo hie. 28Sairia hi veo sünou reih souyu hinou polouyu kini taoli pfüloua lahvei teidei hisü dakhai talai, ana puh nou Ramai vei maitao rathoyu zhai nasü souhawure donou tsücho talai. Puh sü lah sounü pfünüyu khesü soupfü loulai alia lahvei teidei hisü dakhai talai.
29“Phazütou thaisü puhnou Ejipt vedei hisü reih souloupu khailai, ana haina vu hiolouzü raichoki bülai moe. 30Daiolouzü Rom mainou puhye sü dzüluki hinou veloua reih zülai, alia puhsü ngaopia thaikhai ta-a bailai.
“Süthaisü puhnou rarouloua Ramai vei maitaoye souhawure donou vah soutalai. Puhnou Ramai vei maitao rathoyu zhai hinou bulouhoa dakhai tayu maivei chi sü potalai. 31Puhvei reihmaiye panou tave Rathoki ae posheelayu buh sü souzhai khaiwulai, ae shokou meideia Ramai ye sheelayu zhai khesü souhawulai alia ngaorayu vakou maivei bashara ae rathoyu zhai sünou puletao nou pove khailoulai. 32Do ashi hinou veo sünou lahvei rathoyu zhai thaokhaiwua dakhai tayu mai taoli vei soukha poloulai, ana Ramai chi züa buyu maitao nou puhye sü reih soua dulai. 33Tsüveiyu süthai-apei maitao nou maitaoliye kaozü hinou doupeilai. Ana phazütou thaisü, puletao kamai-a nou khoche hinou thailai, kamai-a nou mei nou deithawulai, ae maitaoliye sü puletao vei nakhesü shaoloua hukhamai soua sapoa tawulai. 34Puletao nou sübüa vea nou buyu phaki, Ramai vei maitao nou soukha doutu ngaoloulai, anou puletaoye soukhayu maitaoli hai lahvei kaozhou aveih ngaoloure donou soua bailai. 35Tsüveiyu süthai-apei maitaoli ye sü southawulai, ana haibüyu vanou maikhe maiye souveipu peilai ae sousheepu peilai. Haibüa nou soukou laiyu hai Ramai nou akhai teile dade khaitouyu nasü koumo koute soulai.
36“Sairia hi veo nou lah sounü pfünü khesü soupfü loulai. Puhnou khaophu soua rah jünoua puhnou dupu hie alia Khoukhoulai Ramai jünoua puhnou dupu hie tea lah puhye paolai. Puhnou haibüa savayu ae veia bukou laiyu hai, Ramai nou puhye tudee laiyu teile vemo koute puhnou bukou loulai. Ramai nou soure hai puhnou tsüchoda khaitouyu bütoua soupeilai. 37Veo nou puhvei paipao maivei rah khesü ae naotumai nou jüpayu rah khesü ngaophou laimoe. Puhnou rah teiteiye sü ngaophou laimoe, daiolouzü puh sü lah puhye sütao teitei jünoua dupu hie tea choloulai. 38Puhnou rah sükhe thaosü, nuh teidei khoyu rah, puhvei paipao mainou sükhai toumoyu rahye sü tsükhou talai, alia sana, shahu, chuh mutei, ae veishoyu sapeina khenou poa puhye sü tho talai. 39Puhvei vedei vuloure donou puhnou vakou maivei rah kheye thoyu maitao soukha phou talai. Puhye adusona ae peikhowo tea popeiyu maiye sü puhnou tsükhou peilai, alia puletaoye sü maitaoli pei hi panou khoyu vahdubu peilai, ae sümaitaoye teidei sü buu phasoua dezhi peilai.
40“Sairia hi veo vei teile akhai koumo jüve hi, Ejipt hi veo nou puh hi reih soukhelai, ana Sairia hi veo nou puhvei khouko teitei nou thouloua rüraipoyu büa rheiluki, rheipfüyu mai, ae dzüluki khesü pfüloua reih sü dulai, alia dzüdu veyu büa puhnou tyadei taoli hi reih sü huloulai. 41Puhnou Apaokhai touyu Teidei hia reih huloulai alia mai thethe sü puh bah hinou kaotalai, ana Edom ae Moab maivei teidei alia Ammon mai vei teidei matsütao hai puh bah hinou tupa loulai. 42Puhnou tyadei haitao hi reih souveyu phaki, Ejipt maivei teidei hai-a puh bah hinou tureipa louhoe. 43Puhnou Ejipt hi sana, shahu, ae muteiyu navei teitei hai potawulai. Alia puhnou Libia mai ae Sudan mai vei teidei-a ngaoloulai. 44Süthaisü teinghi palova nou ae reilo vanou ko sü chouloua puh sü ngaopi talai, ae puhnou rarou sholoua reih sü soulai ae maitaoli ye southawulai. 45Puhnou dushoyu puhvei sahpao sü zaidu ae sheeyu deichi kohinou soukhai loulai, ana mai ali koutea puhye soukha peire mai ha-a puhsü thaita bailai.”
Currently Selected:
DANIEL 11: POUMBSI
Highlight
Share
Compare
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.