DANIEL 12
12
Akhai Teile
1“Süphaki ne vei maitaoye kho-apeio dushoyu rakivamai, Maikhel sü tashulai. Süteile phaki neletao teidei hi raichoki vepakhai toumoyu veahoyu khesü velai, ana süphaki Ramai vei larübvü hi zhih rüthou khaitouyu mai hrülaiye sü khailu peilai. 2Alia thaitayu mai hrülai hai süzhou teithe hrishu khaitoulai, maitaoli hai teisa nou sava-a hrüre buh hisü vetalai alia kamai-a teisa haongu pfüa veahoyu buh hisü hotalai. 3Tsüveiyu mai sü ratei hi vayu büa valai, ae checheyu hilonou maiye doupei khaitouyu mai hai teisa teivuh büa valai.”
4“Ana Daniel, akhai teile hi koute larübvü nasü hokhaiwuo alia sheesao khaio. Mai alaosou akhai teithe hisü hasüpu loure donou takou takhea phoulai.”
5Süthaisü mai ahai sü reipe hinou mai ali nou hailova ae mai ali nanou holova nou lapoa buyu Enou zhingaoe. 6Mai ali nanou züzüyu sah ba-a reilova nou buyu nahisü haibüa noue, “Dukinou khupa shoyu akhai vei haitao hai kou vepalai?”
7Züzüyu sah ba-a reilova buyu nanou puh bah ahai khinou lashu loua teisa hria buyu Ramai zhih kuloua haibüa paoyu Enou choue, “Haitao vepare teile hai po asüa da bulai hie. Ramai vei maitaoye souveayu teile cheyu thainou haitao teitei hai vepalai.”
8Puhnou paoyu sü Enou choue, ana daivanou paowe touyu Enou sümore. Südonou Enou noue, “Oh apaopuwo, haitao hai kabüa kou akhai soulaige?”
9Puhnou ahi chila peie, “Daniel, ne tabaio, daiolouzü chipao haitao hai akhai teile hi koute kheia nou khailai. 10Mai taoli hai lah puletaoye souveipu loulai ae sousheepu loulai, alia mai ashimai louzü vah ashi soua nou maishia bubailai, ana tsüveiyu mainou sünasü sükuloulai.
11“Posheelayu ae rathoyu zhai nasü souha laiyu alia vakou maivei rah ae basharatao pove khailouyu teile hai teithe thelia kaih haia raikü (1290) loulai. 12Teithe thelia kaihsüa kaingou (1325) koute sheamea loua chileeyu mai hai asayu mai soulai.
13“Daniel, ne soutaosou akhai koute sheamealo. Ne thaitalai, ana akhai teithe hisü ne dakhai hrishu loulai alia nevei buu nasü ngaoloulai.”
Currently Selected:
DANIEL 12: POUMBSI
Highlight
Share
Compare
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.