HOSEA 1
1
1 Mapao vei chipao hai Beeri nahpoutu Hosea hi Uzziah, Jotham, Ahaz alia Hezekiah nou Judah hi veo soua buki alia Joash nahpoutu Jereboam nou Israel mai hi veo soua buyu teile hinou veyu haitaoe.
Hosea vei Kihikhamai
2 Mapao nou raikai nasoua Hosea hi haibüa paoe, “Taho khakhayu naotumai aliye ne chapfü soure donou polouo alia khakhapfü hinou nahmai hrülo, daiolouzü teidei hainasü Mapao ye thaoyu vanou shishoyu khakhapfü ali soutare.”
3Süvanou puhnou taho Diblaim nahnaotu Gomer ye naloue alia honapai nou pou pfüloua nahpoutu ali naloue. 4Alia Mapao nou puh hi paoe, “Puh zhih hai Jezreel tea salo, daiolouzü phajütou thaisü Jezreel#1.4 jezreel: Nuhdu haina hinou Jehu nou Israel maivei veo alia puhvei tyarai hrülaiye sü southa khaitou peie, ae puhnou khü kukhe hinou pa Israel mai hi veo sü souloue (2 Vem 9-10 hi zhukhaio). zhe kükouyu donou Enou Jehu kikhamai hi veayu peilai, alia Enou Israel maivei vedeisü panou khai souwulai. 5Süzhou teithe Enou Jezreel deikho hinou Israel mai vei voulou sü rashawulai.”
6Honapai nou poupfü puloue alia nahnaotu ali naloue. Süthaisü Mapao nou puh hi paoe, “Puh zhih sü Loruhamah tea salo, daiolouzü Enou Israel maiye zhuveayu moa khaipeiyu bupulai moe. 7Ana Enou Judah kihikha maiye zhuvea peilai, alia puletao Ramai Mapao Enou puletaoye vupa peilai; voulou, khoche, rhei, alia reihmaitao vanou Enou puletaoye vupeilai moe.”
8Puhnou Loruhamah ye nao phayu thai, poupfü puloue alia nahpoutu ali naloue. 9Süthaisü Mapao nou paoe, “Puh zhih sü Lo-ammi tea salo, daiolouzü neletao hai Amai more alia E-a neletao vei Ramai more.”
Israel Maiye Podakhai loure donou Paoyu
10Ana Israel maitao hai teithe li zai hi vünai bülai, süzhou mai linoua puletao ye duloulai moe, mokhaia puletao hrüh chosha louho soulai; “Neletao hai Amai moe” tea paoyu thaosü, “Hriyu Ramai nah khemai” tea Enou puletao ye paolai. 11Judah mai alia Israel maitao hai pove jüloulai, alia puletao vei peikhomai ali puletao nou dopa loulai, alia puletao nou teidei hi natao hai poloulai, daiolouzü Jezreel#1.11 jezreel: Zhih haina hai Hebrew mai la hinou “Ramai nou vuthou peiyu” touwe, südonou du-so payu ae veikheyu paolou veie. vei teithe nasü dusolai.
Currently Selected:
HOSEA 1: POUMBSI
Highlight
Share
Compare
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.