DANIEL 7
7
DANIEL NOU PUHVEI ZHO NGAOYUTAO PAOPEIYU
(7.1—12.13)
Daniel nou Khaosou Adai Zho Ngaoyu
1Babilon hi veo Belshazzar nou vekoulouyu po arai nahisü Daniel nou mekou nou zho ali ngaoe. Sütaosü puhnou rüthou khailoue, alia süzhou khei puhnou ngaoyu zho nasü haibüe:
2Enou zhia buyu phaki, avei zho kounou deiphao kainghou adai hinou teikhai sü hüpoa ve zaidu dzü sü hülüa ngaoe. 3Alia tyakukuyu soukhao adai lihai zai hinou ngaopare. 4Araina hai souveo raiwe, ana lühche shouh pfüwe. Süthaisü Enou zhua buyu hinou puhvei shouh sü paide laiwure, alia puhye sü polashu mai ali büa panou phi ahai nou laloure; ae puh hisü maivei tsüle thoupeiwure.
5Khaosou ahai chena hai vuh büa phi ahai nou lapoa buyu Enou zhingaoe. Puh mü hinou turaopo asü tupoa nou bue ae pai ali nou haibüa shae, “Tashulo alia nenou toulou süyu sou khesü toukhaio.”
6Süna thailo hai Enou zhua buyu phaki, khaosou kukhe ali hai shirakhao zhai büa tapa-a ngaoe, ana puh phao hisü raohou shouh adai ae pei adai pfüwe. Puh hisü tukha lousüyu khouko thoupei khaitoue.
7Süthaisü Enou zhua buyu phaki, ngaopi shoyu, khouko bushoyu ae dushoyu khaosou adai nasü ngaoe. Puh sü dushoyu hu vei huh pfüwe, puhvei dushoyu huh süna sünou puhnou ngaorayu kheyesü nüloua tusasa peia baiwe, alia shokhai touyu khesü phi nou taicha baiwe. Khaosou haina hai kukhe soukhaotao jünou tyakua kai kirou pfüwe. 8Enou kai sütao sü tsüchoa zhua buyu phaki, kaitao hrohinou kai taitou ali paopa-a zhingaoe, kai sünatou nou paopaloua rai-a buyu kai kukhe asü taoye sü bei hinou soula laiwure. Kai sünatou hisü nghithou ali bue, alia khouphu soushoyu chipao paoyu mü ali bue.
Teisa nou Hria Buyu Mai Aliye Zho Ngaoyu
9Enou zhua buyu phaki, vebuh khesü pokou khaipeia zhingaoe. Teisa nou hria buyu mai süna sünou vebuh ali hi kou buloure. Puhvei sabanü hai vürah büa kaawe ae puhvei peishu hai veikayu phako büe. Puhvei vebuh hai lukiphi pfüa mei taopoa tawe. 10Alia puh nghoujü hinou mei nou küpoa tayu rei ali küpawe. Puhvei vebuh hisü mai thethe nou puhvei kuvah soua bue alia mai zzü-zzü kaa-kaa nou puh nghoujü nou la-a bue. Chikuyu buh hinou chi sü kutare, alia larübvü khesü laopare.
11Enou zhua buyu phaki, soukai taitou nasü khaophu soushoua raopoa buyu Enou choue. Alia Enou khaosou adai naye sü southayu ngaoe, alia puhvei pfüphao sü mei hi laithou mei deiwure. 12Soukhao kukhetao louzü southa moa panou phateile daotu hrüre donou phapeiwure, ana puletao vei khouko louzü puletao hinou popawure.
13Enou mai ali büa rakiva teihao nou koa jüpoa veyu avei zho kounou ngaoe, alia puhye sü teisa hria buyu nahisü sapoa koupeiwure. 14Puh hisü soulou süyu zü, kathe alia vedei zhure khouko teitei peiwure. Puhye sü panou mai hrülai, tyahrü teitei, ae la kukua paiyu mai veishi panou puhvei kuvah soulai, puh hisü teisa nou khasa-a hrüre khouko sü bulai, alia puhvei vedei hai hakhai toulai moe.
Zho Ngaoyu nasü Paolapa Peiyu
15Daniel, E sü le veashore alia Enou zho ngaoyu na vanou ale sü chorore. 16Buh sühinou la-a buyu mai ali hi Enou ngaoyu zho nasü daivanoue tea noue. Puhnou ahi Enou ngaoa buyu zho nasü daivanoue touyu paongao peie. 17Puhnou paoe, “Soukhao adai hai deiphao hi vemai adai vere taoe. 18Ana Kukulai Ramai vei maitao nou vedei sü poloulai, alia vedei sü teisa puletao vei souloulai.”
19Süthaisü Enou kukhe jünou tyakuyu, ngaopi shoyu hu vei huh pfüyu ae baosahu bahtsü pfüa buyu süna nou nüloua soudesasa peiyu ae shokhai touyu khesü phi nou taicha peiyu soukhao adai chena vanou süpunü loure. 20Alia kai kirou pfüyu, ae kai taitou ali tsüpayu ae süna nghoujü nou kai asü latayu, alia nghithou ali ae khaophu soushoa raoyu mü pfüa kukhe jünou duyu büa buyu kai süna vanou Enou süpulou nüre.
21Enou zhua buyu phaki, kai sünatou nou Ramai vei maitao hi reih züre, alia puletao jünou reih veiloure. 22Süthaisü teisa hria abuwo nou Kukulai Ramai vei maitao jüpa hinou chikude peiwure, alia Ramai vei maitao nou vedei nasü ngaoloure teile sü vere.
23Puhnou haibüa ahi paolapa peie, “Soukhao adai nahai deiphao hi vedei adai chena-e, alia vedei süna hai kukhe maivei vedei teitei jünou tyakulai alia puhnou deiphao teitei sü souphesasa khaiwulai alia soushi khaiwulai. 24Kai kirou taohai vedei sünahi vemai kirou palai, ae puletao thailo hisü vemai ali palai, puh hai vemai kukhe jünou tyakulai, alia puhnou vemai asüye souhawulai. 25Puhnou Kukulai Ramai ye paoshilai, ae Ramai vei maitaoye souvealai, alia puletao vei rathoyu zhai ae khonü khesü souhare donou telai; ae Ramai vei maitao hai puh bah hinou po asüa da hai veashoa hrülai. 26Süthaisü rakiva chikuyu buh hinou puh pei hisü chikulai, alia puhvei khouko sü puh hinou polaiwulai alia puhye sü souhakhai touwulai. 27Deiphao hinou buyu vedei teitei ae khouko teitei sü Kukulai Ramai vei maitao hisü peiwulai. Puletao vei vedei hai teisa vei vedei soulai, alia deiphao hi vemai hrülai nou puletao vah soulai ae puletao chi zülai.”
28Akhai nasü haihaie. Daniel, E sü tsücholoua ngaopire, alia avei zhuh shirah tare, ana chi paokhai touyu taosü Enou ale hi pokhai loure.
Currently Selected:
DANIEL 7: POUMBSI
Highlight
Share
Compare
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.