DANIEL 8
8
Zhaotu Ali ae Nghitu Ali Zho Ngaoyu
1Veo Belshazzar nou vekoulouyu po asü navu, ahai chena soua Daniel, Enou haibüa zho ngaoe.#8.1 Chime 8.1 hinou poa akhai koute hai Hebrew mai la hi rükhai toue (2.4 hi zhukhaio). 2Avei zho kounou E sü Elam maivei teidei, Susa tea kuyu nuhdu hinou bua ngaoe, alia Esü Ulai rei pe hinou la-a bue. 3Enou rei pe hinou zhua buyu phaki, zhaotu ali kai ahai pfüa rei pe hinou buyu ngaoe. Kai ahai khinou sha soshoe ana kai ali nanou sopu hie ae tsüyua tsüpa nahie. 4Zhaotu süna sünou puhvei kai ahai pfüa teinghi loulova, reilova ae khelova boua buyu Enou zhingaoe. Hrikhaona ali koutea puhye sü dulou hore, alia puhvei khouko hinou mai aliro turei palou moe. Puhnou sounü pfünü jüpayu teitei sü soua baiwe alia khaophu soushoa nou bue.
5Enou haisü daivanousa tea tsüchoa buyu phaki, nghitu ali puh phi dei himoa tuvei shopoa teinghi loulo vanou tupoa veyu ngaoe. Puhvei nghithou ahai kohinou kai ali veishoa nou bue. 6Nghitu sünasü rei pe hi zhaotu kai ahai pfüa buyu nahisü puhvei khouko buyu teitei nou pfüa tupoa koue. 7Puhnou zhaotu nahisü tupoa kou bouvayu Enou ngaoe. Puhnou lekha shopoa zhaotu navei kai ahai khinou bouchawure, alia puh nghoujü nou zhaotu nasü khouko hazhia deiphi bou khaokou khaiwure, alia puhye sü mai ali nouro nghitu hinou vupapei loure khouko hare.
8Süthaisü nghitu nasü nou khaophu sousho pare, ana puhnou khouko veishoa buyu phateile hinou puhvei kai nasü chatare. Kai süna buh hinou veishoyu kai adai holo hailo ae reilo khelo reipoa tsüpare. 9Kai adai hrohinou kai taitou ali hai tsüpapure, alia puhnou khelova, teinghi palova ae Hüveishoa buyu Teidei hilosü dulailai poa tsüpare. 10Puhnou khouko bukheyu ae dupoa kheyu hai rakiva reihmai koutea reih soulou süre, alia puhnou teivu kamai-a deiphao hi soudekou phinou taicha peie. 11Haina nou rakiva reihmaitao vei Veo nahpoutu koutea ngaophou more, ae puhye mei nou deia posheelayu koutea panou soumore, alia puhye thoyu rathoki hai-a soushi laiwure. 12Maikhe mainou teithe teithe vei posheela laiyu thaosü buh sühinou mahmo panou soutare, alia acheche nasü deiphi hi laikhaiwure, alia kai sünanou soupfüyu teitei hisü ngalouyu hai ngaoloue.
13Süthaisü rakivamai ali nou ali hi haibüa paoyu Enou choue, “Zho ngaoa buyu khesü teile kashoa bukoulai hige? Teile kasho koute mei deia posheela laiyu thaosü mahmo soua bulai hiro? Teile kasho koute rakiva reihmaitaoye panou phinou taicha-a ae rathoki nasü panou soushi khaitoua bulai hie?”
14Rakivamai nanou ahi paoe, “Teithe thelia kaihlia raingou (1150) bupulai hie, süthai sünou Rathoki nasü ngaozü buyu maitao nou podakhai loulai.”
Rakivamai Gabriel nou Zho Ngaoyu na Paolapa Peiyu
15Enou zho ngaoyu nasü daivanousa tea sülounüa buyu phaki, mai ali raibüa anghoujü hisü kou laloure. 16Alia Ulai rei pe hinou pai ali haibüa paoyu Enou choue, “Gabriel, zho ngaoyu nasü daivanou ngaowe touyu mai haina hi paopeio.” 17Enou la-a buyu hisü Gabriel nou takou nghiloure, alia puhnou ahi takouyu phaki, E sü ngaopi sholoua dei hi kaokoure.
Ana puhnou ahi paoe, “Mainah poutu nare, nenou ngaoa buyu zho nasü akhai teile hi vepare donoue, sünasü ne soutaosou sütou toulo.” 18Puhnou ahi chipao-a buyu phaki, apah sü deiphi pfükou khailoua Esü zhitei tare, ana puhnou Eye phaolashu loua panou buloure. 19Puhnou ahi paoe, “Enou ne hi zho ngaoyu nasü, Ramai vei lekha rarou hai kabüa vepalaisa touyu süngao peiwe, daiolouzü zho haina hai akhai teithe hi vepare donou ngaopeiwe.
20“Nenou zhaotu kai ahai pfüa ngaoyu nasü Media alia Parsia hi vemai ahaiye paowe. 21Nghitu nasü Grik maivei veo paowe, alia nghithou ahai kohinou kai ali pfüa buyu nasü veo arai naye paowe. 22Chatayu kai ali hinou kai adai tsüpayu hai puletao vei tyahrü hinou vemai adai palai, ana veo araina büa puletao hai khouko bulai moe.
23“Puletao nou vedei khoyu teile akhai nghikouyu phaki, alia puletao nou vah ashi, kaomo zümoyu khaiko soupfüa puletaoye tudee laiyu teile nghikouyu phaki, maishi shoyu ae khaophu soushoyu alia do ashi tya khaiko nou soupfü laiyu vemai ali palai. 24Puh hai khouko pfüsho palai, ana puhvei khouko vanou laimoe. Puhnou maiye sü souvea shopeilai, ae puhnou souyu vah teitei hisü veilouyu ae ngalouyu souloulai. Puhnou khoushoyu mai ae Ramai vei maitao koutea soushi peiloulai. 25Puhvei tsüdo ashi sünou poa vah taoli souloulai, ae puh sü la puhye mai kukhe jünou veipu hie tea polai. Puhnou mai taoliye mah lia ha-a souhawulai, alia vemai peinou buyu Veoye sü hraitalai, ana puhye sü deiphao mai vei khouko noumoa souhawu bailai. 26Teithe teithe vei posheelayu vanou ngaoyu zho nasü cheche-a vepalai, ana zho ngaokhai toua buyu nasü kheia poku khailo, daiolouzü hai nahai vepare teile taoli buhie.”
27Daniel, E sü teithe taoli vealoua souloure. Süthaisü veipa loua Enou veo vei vahbu hisü tare. Ana Enou ngaoyu zho süna vanou atsü haore ae Enou süsü sülou hore.
Currently Selected:
DANIEL 8: POUMBSI
Highlight
Share
Compare
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.