PAODAKHAIYU CHIKHA 10
10
Moses nou Chikhatao Podakhai Louyu
(Tap 34.1-10)
1“Süthaisü Mapao nou ahi paoe, ‘Raichoki bütoua chuh ahai daolo alia sünahai thoukhaire donou sübvü ali souloua Eye deichi hinou padaowo. 2Raiki nenou deipheyu chuhpou vahi rükhai touyu chataosü Enou chuh sühai vahi rüpeilai, alia chuh sühai nenou sübvü hi pothou khailo.’
3“Südonou akasia süünou Enou sübvü daoloue alia raiki rüpeiyu büa chuhpou ahai daoloue, alia chuh süna ahai abah nou po-a deichi vahi tapa-e. 4Maisou vejüa buyuki mei nou züpokou deichi vanou sahpao buyu chikha kirou, raichoki rüpeiyutao sü Mapao nou chuhpou süna ahai hi rüpeie. Alia sühai hai Mapao nou ahi peie. 5Süthai, Mapao nou paoyu thaifüa Enou deichi hinou taokouloua chuhpou sü sübvü hi pothoure, alia sünahai hai chua sühi bue.”
6(Israel mainou Joakan mai dzükhao hinou Moserah hi takoue. Buh sühi nou Aaron hai thaire alia vuhre, ae puh nahpoutu Eleazar nou puhbu pa thao-a napao souloue. 7Buh sühinou puletao nou Gudgodah hi takoue, ae süsho reitoudzü veisho kübuyu Jotbathah teidei hi takoue. 8Süteile hinou Levi khü hai zhou koute-a souyu büa pa Mapao vei vo sübvü kaopore donou, Mapao nghoujü nou la-a kuvah soure donou dokupa loure. 9Südonou Levi khü hai puh chinamai hrohinou kaalo lou zha ngaozho moe; puletao hi Mapao nou paopeiyu büa Mapao hainou puletao vei kaalo sü baie.)
10Raichoki Enou souyu büa, chua Enou deichi hinou hea raidai khei raidai bue, alia zhaovu teile hai hia Mapao nou akho sü noupeie; neletaoye souha khailai more. 11Mapao nou ahi paoe, “Kushuloua tawo, alia maikhe maisü puletao ludu hinou süthai satakhaio, sükure toulouzü Enou puletaoye peilai tea puletao puopao hi paodai khaitouyu teidei sü puletao nou talou poloulai.
Ramai nou Jüpayu
12“Alia chuo, O Israel maitaore, neletao Ramai Mapao nou neletao hinou daie jüpawe toulouzü, neletao Ramai Mapao ye piyu, puhvei ludu hinou tayu, puhye leshiyu, nevei tsüle rako veishi nou pothou puh vah souyu hai jüpawe. 13Alia neletao veiloure donou zhou Enou neletao hi peibuyu Mapao vei kharochi alia chikhakhe züa bulo. 14Tei hinou buyu veishi alia kukayu raki koute, deiphao alia sühi buyu veishi hai neletao Ramai Mapao vei khaitoue. 15Sükubuyuma Mapao nou neletao poupao maitao hi chavei-a puletaoye leshi peie, alia puletao tyaonah neletaoye sü pa tyahrü kukhe hrülai jünou koulea hrüre donou dopaloue. 16Südonou, neletao vei lethou heerode-o alia noubei khoupu khaiso. 17Daiolouzü neletao Ramai Mapao hai rah kukhe veishi pei hi Ramai, alia paopumai pei hi Mapaoe, puh sü soukumoyu alia maivei seihla pomoyu khupayu khouko bushoyu Ramaie. 18Puhnou pfüpuo hamai alia mimeamai ye donou kaozü vah soupeie, alia shetumai ae houzü laimai tousho ae sabanü pei-a leshi peie. 19Neletao-a shetumaiye leshilo, daisounou touyuo neletao-a Ejipt hinou shetumai sou-a bue. 20Neletao Ramai Mapao ye pi-a puh vah soulo. Puh hinou nghitei-a bulo alia puh zhih hinou neletao chaachou soua bailai. 21Puh hai neletao nou paoshore pue; puh hai neletao Ramaie, neletao nghithou vuzünou pa ngao-a neletao donou dushoyu alia ngaokhupa shoyu vah soupeiyu pue. 22Ejipt teidei hi talouyu neletao puopao mai hrülai hai rainai baie, alia chuo neletao Ramai Mapao nou neletao hai teivuh zhou soupeie.
Currently Selected:
PAODAKHAIYU CHIKHA 10: POUMBSI
Highlight
Share
Compare
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.