PAODAKHAIYU CHIKHA 9
9
Maikhe Mainou Paochi Zübayu
1“Keikhaio, O Israel maitaore, neletao jünou dupuyu alia khoupuyu tyahrütao, kivo sü tei khokupa khaitoua buyu veishoyu nuhdukhe talou poloure donou zhou neletao Jordan rei tachopalai. 2Mai haitao hai Anakim mai büa dusho sho-e. Neletao nou puletaosü süwe alia haibüa paoyu choure; ‘Anakim mai nghoujü thaonou lalousüe?’ 3Ana hei mei deiyu büa neletao nghoujü nou rai-a tapeilaiyu puhai neletao Ramai Mapao-e touyu hai zhou süvuzülo. Puhnou puletao sü souhalailai; puhnou puletao sü neletao khakhe hi pothoukhai peilai. Alia Mapao nou paopeikhai touyu büa neletao nou thashoa puletaosü hulaiwulai alia southalai.
4“Neletao Ramai Mapao nou puletaoye neletao nghoujü hinou hulai peithai, neletao haibüa chosou-o, ‘Etao veiyu vanou Mapao nou teidei haitao hai Etaoye panou poloure donou savepeie.’ Sükumoe, ana tyahrü haitao hai veimoyu vanou Mapao nou puletao hai neletao nghoujü hinou hulai peia baie. 5Puletao vei teidei hai neletao nou checheyu alia veiyu vanou neletaoye panou talou polou laimoe, ana tyahrü süütao hai shishoyu donou puletao hai neletao nghoujü nou neletao Ramai Mapao nou hulailai, alia sübüa puh nou neletao poupao Abraham, Isaak alia Jakob hi paodai peikhai touyu chipaosü panou vetere donou baie. 6Südonou sülo, neletao nou checheyu vanou veishoyu teidei haina hai neletao Ramai Mapao nou neletao hi peimoe, daiolouzü neletao-a rochiyu ae noukhouyu maitya baie.
7“Neletao nou kabüa neletao Ramai Mapao vei lekha rarou sü radeiki hi ta-a buki soupa peie touyu sü ngaiso. Ejipt hinou tapayu nou chu haihi velouyu koute neletao hai paochi züba-a Mapao ye dua nou laibaie. 8Sinai Deichi hinou neletao nou Mapao vei lekha soupa peie, süvanou neletaoye buh sühinou souhakhai noure. 9Enou dechiva taopa Mapao nou neletaoye koa vo soukhai touyu tao rüthoupei khaitouyu chuh ahai sü polai tea tapayuki, E deichi hinou hea-khei raidai bue; E raokhao-a toumoe alia dzü-a kemoe. 10Ramai bah vuzü nou rükhai touyu chupou ahai hai Mapao nou ahi peie. Neletao nou vejüa buki Mapao nou deichi hinou meihro hinou paopa buyu kharochi khesü chupou süna ahai vanou rükhai toue. 11Hea raidai alia khei raidai cheyu kisü, vo vei chupou ahai sü Mapao nou ahi peie.
12“Süthaisü Mapao nou ahi paoe, ‘Hai hinou ne thasho nou takou-o, daiolouzü Ejipt teidei hinou nenou sapoa payu nevei maitao hai shisho-a bure. Enou kharochi peikhai touyu hinou puletao hai züba-a tare alia puletao nou thore donou bashara souloure.’
13“Mapao nou ahi paoe, ‘Mai haitao Enou ngaore, puletao hai paochi chouba-a nou khouyu mai chekhaoe! 14Eye nupeiso. Enou puletao hai souhalai alia puletao zhih sü panou raki khenou buyu deiphao hinou popa lailai. Alia Enou neye louzü puletao jünou khouyu ae maipouyu tyahrü ali soupeilai.’
15“Südonou, deichi hi mei keila buteile hinou Enou reidakhailou-a takoue. Alia abah hinou vo vei chupou ahaisü poe. 16Enou zhukouyu phaki, puletao hai Ramai Mapao baasou-a mah soure touyu Enou ngaoe, chotou zhai hinou puletao hai bashara sü souloure; Mapao nou paodou peiyu ludu hisünou thashoa tyakutare. 17Südonou abah hinou pobuyu chuh ahaisü neletao nghoujü hinou laikou deiphe baire. 18Süthaisü Enou Mapao nghoujü hinou hea raidai ae khei raidai pei pfünakou khurüpu khaie; E raokhao-a toumoe alia dzü-a kemoe, daisou donou touyu-o Mapao nghoujü hinou dainou shie touyu nasü neletao nou soua mah souyu vanou alia puh lekha rarou soupayu vanoue. 19Daiolouzü Mapao nou neletao pei hi rarou sholoua neletaoye sü souhawulai touyu donou Esü ngaopi shore, ana Mapao nou avei akho sü keinou pupeie. 20Mapao nou Aaron-a souha bailaire tea puh pei hi lekhaso bue, ana süphakia Enou Aaron donou veachi paopeie. 21Alia neletao bahnou soukhai touyu chotou, neletao vei mah hasho na süna polou-a mei hinou deilaire. Süthai Enou sünasü saosa thou naihü souvi lou-a deichi vanou kükouyu reitou hi laithoure.
22“Neletao nou Taberah, Massah alia Kibroth Hatta-avah hinou Mapao vei lekha soupa peie. 23Alia Mapao nou neletaoye Kadesh Barnea hinou seitayuki puhnou paoe, ‘Takou khaio alia Enou neletao hi peikhai touyu teideisü polo.’ Ana neletao sü neletao Ramai Mapao vei kharochi zübare. Neletao nou Puhye louche moe alia puh chi zü moe. 24Enou neletaoye sülou rainou chukoute neletao hai Mapao chi züba-a du-a laiwe.
25“Neletao ye souha laire tea Mapao nou paoyu vanou hea raidai ae khei raidai hai E Mapao nghoujü hinou pei pfünakou khurüpue. 26E Mapao hi veachi paoe alia haibüa paoe, ‘Oh Ramai Mapaowo, dushoyu nevei khouko nou vupa peikhai touyu alia khouko bushoyu nebah nou Ejipt teidei hinou süthai sapapei khaitouyu nevei kaalo thaore nevei maitao hai souha pei khaiso. 27Ne kilai Abraham, Isaak alia Jakob ye sü licho peikhaio. Mai haitao vei paochi zübayu, puletao vei shiyu alia puletao mah hai zhupeiso. 28Sükumore toulouzü, nenou Etaoye sapa louyu teidei sühi mainou Mapao sü puletao hi paopeikhai touyu teidei hi puletaoye save thoulou hoyu vanou alia puletaoye ngaorayu vanou, puh nou puletao sü rekounou saho southalai tea sapoa tapa baie tea paoshulai. 29Ana puletao hai dushoyu nevei khouko nou sapoa papeiyu alia nebah nou thaipa süthaita peiyu ne kaa thaoyu nevei maitao baie.’
Currently Selected:
PAODAKHAIYU CHIKHA 9: POUMBSI
Highlight
Share
Compare
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.