PAODAKHAIYU CHIKHA 8
8
Tave Thaoloure Teidei Aveih
1“Zhou Enou neletao hi kharochi peikhai touyu taosü züloure donou leikeilo, sükulouzü neletao hrilai, mai poupalai alia neletao puopao hi Mapao nou paopeikhai touyu teidei nasü neletao nou talou poloulai. 2Neletaoye douzü peire donou, neletao le hi daibue touyu süloure donou zhai zhuyu alia neletao hai puhvei chikha khesü zülaiho zülai mosa touyu zhure donou neletao Ramai Mapao nou neletaoye rekou nou po raidai sapoa tayu sü licholo. 3Neletaoye pa pouzüa alia neletao puopao maitao-a sümoyu manna nou pa tou-a puhnou neletaosü tudeezü pei-e. Haihai neletao doupeire donou puhnou soue, süolouzü Emai hai tousho likhei nou hrilaimoe ana Mapao mü hinou payu chipaokhe vanou hrilai. 4Po raidai hai shosho hisü ne sabanü banoure hamoe alia ne phi panou mamoe. 5Südonou neletao sülo, pfüpuo mainou nahmaiye tudeeyu büa ne Ramai Mapao nou neletaosü tudeewe. 6Ne Ramai Mapao vei ludu hinou ta-a alia puhye pi-a puh vei kharochi khesü zülo. 7Daiolouzü ne Ramai Mapao nou neletaoye sü veiyu teidei hi saloulai — reitou küyu, dzükhao buyu alia deikho ae deichi dzüla pa-a buyu teidei; 8ghehu alia shithou pabuyu, darkhabe alia doushibe hrübuyu, radoushi, Oliv theadzü alia laivoudzü ngaobuyu teidei; 9raokhao touzü laimo buyu alia hali chekhoyu teidei; chuh nou huh soulouyu alia deichi vanou shahu hepalouyu teidei. 10Neletao nou touthou pouphoua reikha louyu phaki, neletaoye teidei aveih peiyu vanou neletao Ramai Mapao ye paosholo.
Ramai ye Ngaimore donou Paopi Peiyu
11“Zhou teithe Enou neletao hi paopei buyu neletao Ramai Mapao vei kharochi alia chikhakhe züloumoa puhye ngaiyu pamore donou neletao leikeilo. 12Mosho, neletao nou tou thou pouphou reikhaki, neletao nou kivei soubu louki, 13alia neletao kikhaorü kapaki, alia sana raka poupayu phaki, ae neletao nou buyu veishi poupu kapu payuki, 14neletao khaophu soupalai alia mai qila soubuyu teidei hinou neletaoye sapa peiyu neletao Ramai Mapao ye ngaishulai. 15Dushoyu alia pishoyu radeiki, dzü hayu teidei, tu shishoyu nghou alia leakhao buyu teidei hisünou, neletaoye süthai po-a tala pei-e. Khoushoyu chuh hinou neletaoye sü dzü pei-e. 16Neletaoye tudeezü peire donou alia neletao zhai zhure donou neletao puopao nou sükhai moyu manna sü pa toure donou puhnou neletao hisü rekounou peie, süsü neletaoye pa akhai hi kou aveih souloure donoue. 17Ne lah netsü hinou haibüa cholou veie, ‘Akhouko alia abah vei khouchi nou Eye kinangi haitao peie.’ 18Ana ne Ramai Mapao ye licholo, daisounou touyuo kinangi phoulou süyu khouko sü puhnou ne hi peie, alia südonou zhou teithe büa, dao neletao poupao hi puhnou vo soukhai touyu nasü lühthou peio. 19Hatarakia neletao nou neletao Ramai Mapao ye ngaiwu-a rah kukhe thaifü tayu sho-o alia puletaoye tho-a khurü tayu sho-o neletaoye veikhai mosou-a souha bailai touyu zhou Enou neletao nghoujü nou chisho-a paongaowe. 20Neletao nghoujü hinou Mapao nou tyahrü kukheye souhalaiyu büa, neletao-a neletao Ramai Mapao chi zülou moyu thaio souhalai bailai.
Currently Selected:
PAODAKHAIYU CHIKHA 8: POUMBSI
Highlight
Share
Compare
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.