PAODAKHAIYU CHIKHA 12
12
Rathoyu Buh Ali
1“Neletao puopao Ramai Mapao nou neletao hi peikhai touyu teidei hi bubusa kharochi alia chikha haitao hai soutaosou-a zülai. 2Neletao nou talou tyahrü kukhemaiye hulai-a teidei polouyu kisü deichi taohi, deitao pei hi alia süübe phihi puletao nou ratho buh khesü souhakhai toulaio. 3Puletao rasheelabu sü khou pholaio, puletao sheeyu chuh khesü daphelaio-alia puletao rah Asherah kika khesü mei deilaio; puletao bashara khesü daosasa laio alia puletao zhih hai buh sükhe hinou souhalaio.
4“Puletao nou puletao rah thoyu zhai hinou neletao hai neletao Ramai Mapao ye tholai moe. 5Ana Mapao nou neletao khü teitei hrohinou puh zhih khaire donou dopalouyu buh sü neletao nou phoulai. Buh sühisü neletao nou tavuzülai. 6Buh sühi neletao vei meinou dei-a tho laiyutao, posheela, neletao vei taith alia neletao nou peilai tea paokhai touyutao alia lah jüpa soua nenou sheela laiyutao, alia ne chokho ae zhaokho hinou tou touraikaiyu haitao hai pove peilai. 7Sühinou neletao Ramai Mapao nou kozholaipei-a neletao alia neletao kikhamai hrülai nou tovai zholai alia neletao nou bah thaithou vah souyu veishi hi savalai, daisounou touyuo neletao Ramai Mapao nou neletaosü hapeire.
8“Zhou Etao nou buh hai hinou lahlah jüpa souyu büa neletao hai soulai moe. 9Daiolouzü neletao Ramai Mapao nou neletaoye panou shochao laiyu alia neletaoye panou kaona-a hrülaiyu buh hisü neletao hai vetelou mohie. 10Ana neletao nou Jordan tachopa neletao Ramai Mapao nou neletao hi peikhai touyu teidei hisü buloure toulouzü, alia neletao pehao hinou buyu neletao ngaobamai bah hinou kaonayu ngaoloure toulouzü, 11süthaisü neletao Ramai Mapao zhih panou bure donou puhnou paoyu buh hisü, Enou neletao hi kharochi peiyu na veishi povelai: neletao nou meidei-a posheela peiretao, neletao vei taith alia posheela laiyutao, alia lah jüpa sou-a peilai tea Mapao hi paokhai touyu veishi hai pove peilai. 12Alia ne, ne nahpoutu ae nahnaotu, qila maitao alia teidei ngaomoa buyu neletao nuhdu hinou Levi maitao koa neletao Ramai Mapao nghoujü hinou neletao savazho khaio. 13Neletao vei meidei-a sheelayu nahai neletao nou jüpayu buh tali hinou posheela more donou leikeilo. 14Neletao khü hrohinou Mapao nou dolouyu buh ali hinou posheela khesü pove sheela bailai, alia buh sühinou Enou neletao hi kharochi paopeiyu büa soulo.
15“Anou, neletao Ramai Mapao nou neletao hi shiha peiyu thaifüa neletao nou nuhdu taralikia hrikhaona sü datholoua toua bailai; neletao nou naanou hinou sheeyu alia sheemoyu sou tali hai khohshu sou touyu büa tou-a bailai. 16Ana neletao nou zhe sü toulaimoe; zhe sü dzü büa deiphi hi lapa lai-o. 17Nevei zha kirou hinou zhali peibuyu thoudzü alia darkhadzü ae theadzü, moa nevei chokho ae zhaokho hinou toutu tourai kayupu, moyuma nenou peilai tea paokhai touyu tao, moa lahlah jüpa hinou sheelayutao moa matsü shoa peiyu tao hai ne nuh hinou neletao nou toulai moe. 18Sükure thaosü, neletao Ramai Mapao nou dopalouyu buh hinou neletao Ramai Mapao ye koa toulai. Ne nah naotu-poutu khe, ne kilai naotu poutu alia neletao nuhdu hinou hrüyu Levi maitao koa touzholai alia ne bah nou thaithou vah soukhai touyu veishi hi neletaosü neletao Ramai Mapao nghoujü hinou koa sava zholai. 19Neletao teidei hinou hrübusa Levi maitaoye ngailai moe touyu sü tsüteilo.
20“Neletao Ramai Mapao nou paokhai touyu thaifü-a neletao vei deide soudupa peiyuki, alia neletao nou ‘E sou tounüe’ tea paoyuki neletao nou sou sü tounü toua bailai. 21Neletao Ramai Mapao nou puh zhih khaire donou dopa louyu buh hai neletao hinou dousho buwusho, Enou neletao hi kharochi peiyu thaifüa Mapao nou neletao hi peikhai touyu chokhome ae zhaokhome hinou khaona sü neletao nuh hinou datha lou-a neletao tounü sü touloua bailai. 22Neletao nou khohshu sou touyu büa sou sütaosü toua bailai. Naanou hinou sheeyu alia sheemoyu maitaralia süsü tou-a bailai. 23Ana neletao nou souzhe sü toulou shie, daisounou touyuo zhe hai hriraie alia sou koa ne hrirai toulai moe. 24Zhe sü neletao toulai modao; dzü büa zhe sü deiphi hi lapa laibaio. 25Zhe touso, sükure toure toulouzü ne alia ne nahmaisü vah souyu veishi hinou kaozhou veilai, daisounou touyuo neletao nou Mapao nghoujü hinou kaozü nasü souwe. 26Sheeyu vah poa soulai tea dokupa khaitouyu natao alia nenou peilai tea mü lükhai touyu veishi polou-a Mapao nou dopakhai touyu buh hisü pove khaipeio. 27Nevei meidei-a sheela laiyu sou alia zhe hai ne Ramai Mapao vei posheelabu phi hi lazü khailai, ana sou louzü neletao nou toulou vei-e. 28Zhou Enou neletao hi peibuyu chikhataosü zütoulo, sükure toulouzü ne alia ne nahmaitao teisa nou kaozhou veilai, daisounou touyuo neletao Ramai Mapao nghoujü nou veiyu alia kaozü nasü neletao nou souwe.
Bashara Thoyu vanou Paopi Peiyu
29“Neletao Ramai Mapao nou neletao nghoujü hinou buyu tyahrütaoye hulai peiwua neletaoye panou talou teidei taosü poloua buloure toulouzü, 30puletao nou rathoyu zhai sü thaifüso, 31Neletao Ramai Mapao sü puletao nou thoyu zhai hinou neletao tholai moe, daiolouzü puletao nou puletao rah thoyuki Mapao nou ngaorayu khaikho soubaie. Puletao hai puletao nahpoutu alia nahnaotu khemai tao-a mei hinou dei-a puletao rah hi sheela baiwe.
32“Enou neletao hi kharochi peiyu veishi zü-a soukhai toulo; sühi thou-a thoupuso alia pha-a phaso.
Currently Selected:
PAODAKHAIYU CHIKHA 12: POUMBSI
Highlight
Share
Compare
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.