PAODAKHAIYU CHIKHA 13
13
1“Neletao hrohinou rachipaola mai moa vepare hai mekou nou süngao pei-a alia neletao hi khupayu shee soungao-a moa paongao-a 2alia shee moa puhnou paoyu khupayu hai vetelou-a alia puhnou, ‘Eletao rah kukhe thaisü füta laikhe,’ alia rah sütao tholai khe tea paoyusho, 3neletao rachi paoyu moa me muyu süna chi keiso. Neletao Ramai Mapao nou neletao tsüle hrü veishi nou neletao puhye leshi ho leshimoe touyu neletao le zhuwe. 4Neletao nou thaifüyu puh sü neletao Ramai Mapao-e alia puhye pi-a tsükhoulo. Puh vei kharochi khesü khailo alia puh chi zülo; puh vah soulo alia puh hinou nghitei-a bulo. 5Süthai mah peilaiyu rachipaola mai moa me mu apeio sü southalai, daisounou touyuo neletaoye Ejipt teidei hinou sapa peiyu alia mai qila sou-a hrüyu teidei hinou vupa peiyu neletao Ramai Mapao chi züba nou du-a ko paoe, neletao Ramai Mapao nou kharochi peikhai touyu ludu hinou neletaoye süthaita mah peilai tea teyu vanou. Neletao hrohinou shiyu puhsü popa lailai.
6“Ne thaihou jürai nou moa ne nahpoutu moa ne nahnaotu, moa nenou leshiyu chapfü moa nenou nghikayu samai khamai nou kheikhei sou neye sei-a haibüa paolouzü, ‘Ahai koa nenou sümoyu ae nevei puopaoh maitao nou sümoyu rah kukhe thota bailaikhe, 7buh dou hinou ho nghiyu hinousa, ne pe hinou sühao buyu maikhe maitao rah sü thota laishe. 8Ana nevei tsüle hai puh hi peithouso moa puh chi keiso. Puhye zhuvea peiso, moa puhye vupa peiso.’ 9Puletaoye sü southawo! Puletaoye chuh nou deithayu hisü nenou bah khathou raikailo, alia süthai sünou maikhe maiye panou deithawo. 10Puletaoye chuh nou deitha-o! daiolouzü puletao nou neye Ejipt teidei, mai qila souyu teidei hinou sapa peiyu nevei Ramai Mapao hinou neye panou tarei tare donou puletao nou tewe. 11Süthaisü Israel mai hrülai nou hai khesü choulai; puletao nou ngaopilai, alia haibüyu vah hai neletao hrohinou soupu laimoe.
12-13“Neletao vei Ramai Mapao nou neletaoye panou hrüre donou peikhai touyu nuhdutao hinou maishimai kamai-a nou maikhe maiye panou raichoki neletao nou sükhai toumoyu rah kukhe thotare donou süthai mah tare touyu pai choulouzü, 14neletao nou soutaosou sünasü keinou touloua phoupalo; alia hai hai chekhaore ae ngaorayu vah haso hai neletao hrohinou bure touyu sho, 15nuhdu sühi hrüa buyu maikhe mai hrülai alia kikhaorü veishi nou khoche poloua souhakhai toulaio. 16Nuhdu sühinou hrüyu maitao vei na veishi sü poloua nuhdu vei kijü, maisou ludu hi pove jükhailo, alia sükhesü neletao nou neletao vei Ramai Mapao hi meidei-a posheela peio. Teisa panou nuh sünasü soushi souha khai-a bailai, panou soushupu khaitoulai moe. 17Ramai nou aetimoyu nuh sünavei na ali koute-a pa neletao bah hi bulai moe, sükure toulouzü Mapao nou puhvei lekha rarou nasü povai peiwua neletaoye zhuvea leshi peilai, alia neletao puopao hi paodaikhai touyu büa neletao maipei poupa loulai, 18daiolouzü neletao nou neletao vei Ramai Mapao chi züyu vanou, zhou Enou neletao hi peiyu kharochi khesü soupfü louyu vanou alia puh nghoujü hinou kaozüna soulouyu vanou.
Currently Selected:
PAODAKHAIYU CHIKHA 13: POUMBSI
Highlight
Share
Compare
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.