PAODAKHAIYU CHIKHA 14
14
Kaomoa Dopfüyu sü Souso
1“Neletao hai Ramai Mapao vei nahmaitaoe. Südonou athaimai donou ne peishu biso moa haoso. 2Daiolouzü ne Ramai Mapao hinou sheeyu maitaoe. Deiphao mai hrülai hrohinou puh vei muh teishoyu mai pa soure donou Mapao nou neletaoye sü dopaloure.
Sheeyu alia Sheemoyu Hrikhaona
(Lev 11.1-47)
3“Ngaorayu tousho alikhei-a touso. 4Hrikhaona haitao hai neletao nou toulou veie: Chode, zhaotu, nghitu, 5khoh-shu, shuchü, renghitu, lü, alia rekou buyu zhaotu, 6phimou pfüyu alia tolayu hrikhaona taralia neletao nou toulou veie. 7Ana tola buyu alia phimou pfüyu racho, lazhao moa zhaorao haitao hai neletao nou toulai moe. Haitao hai tolama, phimou pemoe; südonou haitao hai sheemoyu khaonae. 8Vo-a sheemoe, puh hai phimou pe-ama tola moe. Vosou hai neletao nou toulai moe, moa vo thaiphao hai dei-a deilai moe.
9“Dzü hinou hrüyu shaoh pfüyu alia kao pfüyu khaona tali hai neletao nou tou-a bailai. 10Ana shaoh ae kao pfümoyu tao hai neletao nou toulai moe; daiolouzü haitao hai sheemoe.
11“Sheeyu raohou taralia neletao nou tou-a bailai. 12Ana haitao hai touso; lükhana, rashopeiki, 13kheiti, vaoche alia raohou kukhe nütouyu raohou veishi, 14vo tya veishi, 15tuturu, khebo, kutu, dzü raohou, lüche tya veishi, 16khebo taitya, khebo dutya, dzü houpei, 17dzülü houpei, dzüraohou tesho. 18vou, dzü raohou touyu veishi, peiyao pfüyu raohou alia zhaoko haitao hai touso.#14.12-18 Haitao hi peikhai touyu raohoutao zhih hai shizhu moa peikhai toua baie.
19“Shouh pfüyu khaona taitya teitei hai sheemoe, sütao hai touso. 20Ana sheeyu khaona shouh pfü-a buyuma, neletao nou tou-a bailai.
21“Lah thaiyu soukhaona hai touso. Neletao nuhdu hinou buyu shetumai hi neletao nou peio alia puhnou tou-a bailai. Ana neletao louzü Ramai Mapao hinou sheeyu maitaoe.
“Zhaotu moa nghitu toutu hai pfü vei naodzü koa khotouso.
Zha Kirou hinou Ali Peire Zhaitao
22“Popachü neletao ludou hinou chilou valouyu veishi zha kirou hinou zhali pokupa khaivu zülai. 23Neletao vei thou, darkha dzü, theadzü, alia chokho zhaokho hinou tou touraikayu haitao hai neletao Ramai Mapao nou puh zhih pa tsükhou-a buloure donou dopakhai touyu buh hinou Mapao nghoujü hinou toulai, sükure tulouzü neletao nou neletao Ramai Mapao teisa nou pi-a tsükhouyu douloulai. 24Ana buh hai doulere toulouzü alia neletao Ramai Mapao nou neletaoye hapei khaitoua alia nevei peire natao hai pfüvelou hore toulouzü, haibüa soupfülo: 25Nevei peire natao hai zholoua sana pousha sünou neletao Ramai Mapao nou dopa khaiyu buh hisü zha kirou hinou ali peire zhatao hai pove thoupeio. 26Pousha sünou poa ne jüpa sü hülo: kikhaorü, zhaotu, darkhadzü moa kukhe shiradzü, moa nenou jüpayu tyali hülo. Süsho ne alia ne kikhamai veishi nou ne Ramai Mapao nghoujü hinou toulai alia savalai.
27“Alia neletao nuhdu hinou hrübuyu Levi maitaoye ngaiso, daiolouzü puletao hai puletao vei teidei kaalo hae. 28Po asü cheyu chüsü, po süna hi ngaolouyu thoudzü veishi hai neletao nuh hinou pove jükhaio. 29Sükure toulouzü neletao nuh hinou hrübuyu Levi mai (teidei kaalo hayu maitao), alia shetumai, pfüpuo hamai alia mimeamai hrülai tave toulou shulai alia pouphou rekhalai, alia sükoulouzü neletao Ramai Mapao nou neletao nou vah souyu veishi hi ha peilai.
Currently Selected:
PAODAKHAIYU CHIKHA 14: POUMBSI
Highlight
Share
Compare
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.