PAODAKHAIYU CHIKHA 4
4
Moses nou Israel Maiye Paochi Zülo tea Paodou Peiyu
1Süthaisü Moses nou Israel maitao hi paoe, “Enou neletao hi paopeiyu chikha khesü zütou toulo, sükulouzü neletao hrülai alia neletao puopao Ramai Mapao nou neletao hi peikhai touyu teidei hisü neletao nou talou poloulai. 2Enou neletao hi paopeiyu chikhatao hisü haliro thoupuso moa poa popaso. Enou neletao hi peikhai touyu Ramai Mapao vei chikha khesü zütoulo. 3Mapao nou Peor deichi hinou daie souge touyu neletao nghithou vuzünou ngaore, alia Baalye thoyu mai hrülaiye sü buh sühinou southa khaire, 4ana zhou koute neletao Ramai Mapao ye lü loucheyu mai sü hria buhie.
5“Avei Ramai Mapao nou ahi paopeiyu chikha teitei sü Enou neletao hi doupeiwure. Chikha sütao neletao nou talou poloua hrülaiyu teidei hisü soutaosoua zülo. 6Chikha sütaosü zülo ae soulo; sükulouzü tyahrü kukhe mainou neletao hai ratsü ae kaozü süyu maitao-e tea ngaoloulai, alia puletao nou neletao vei chikhatao sülouyu phaki, ‘Neletao hai daizhou koute tsüveiyu ae kaozü süyu tyahrü maitaosa!’ tea nou paolai.
7“Etao nou Etao Ramai Mapao ye kuyu phaki, nghitei-a Etao akho sü puhnou noupeiyu büa thaovei tyahrü rah nou puletao hi nghitei-a buyu bue? 8Alia zhou Enou neletao hi veisho-a nou doupeiyu chikhatao büa thao tyahrü hinou chikha khesü buge? 9Neletao nghithou nou ngaoyu teitei sü ngaimore donou ae neletao hribusa sütaosü panou neletao tsüle hi buloure donou soutaosoua chüteilo ae leikeilo. Sütaosü neletao nahmai ae tyaomaitao hi-a paodai khaipei-a panou sülo. 10Neletao nou Sinai Deichi#4.10 Sinai Deichi; moa Horeb Deichi. hinou ve Mapao, neletao Ramai nghoujü nou la-a buyu phaki, Mapao nou ahi paoe, ‘Maikhe maitaoye ahi sa-a koulo, alia achipao sü pa puletaoye choulai, sükure toulouzü puletao nou deiphao hi hria bukisa Eye ngaopilai alia achipao khesü puletao nahmai hi-a doupei shulai.’
11“Mei nou deichi hinou raki keilapa-a ae teihao nou kou zhika-a deichi hochüa buyu phaki neletao nou deichi phi hi takou la-a bue touyu sü neletao nahmaitao hi paongao peio. 12Mapao nou mei hrohinou neletaoye cha-e, alia neletao nou puhvei pai choue ana zhu louzü ngaomoe touyu sü neletao nahmaitao hi-a paopeio. 13Puhvei vo nasü neletao hi paopa ngaopeie, süsü chikha kirou tao-e, alia sütao hai chuhkhao ahai hinou rüpei khaitoue. 14Neletao nou talou poloua hrülaiyu teidei hisü Mapao vei chikha teitei panou züre donou doupeio tea süphaki Puhnou ahi paoe.
Bashara donou Paopi Peiyu
15“Mapao nou mei hrohinou neletaoye Sinai Deichi vanou chayu phaki, neletao nou hali zhua ngaomoe. Südonou neletao leikei-a licholo, 16alia mah soumore donou zhurai natarali zhai hinou bashara souloua thoso — süsü naotumai moyuma poutumai zhurai hinou, 17deiphi nou hrüyu hrikhaona, shouh pfüyu raohou, 18dei hinou keitayu keinghou, moyuma dzü hinou buyu kha tali zhurai soulou-a tho laimoe. 19Alia neletao nou tei hi zhupa teinghi, khouh, vuh, alia tei hinou buyu na taralia ngaoyu phaki, sütaosü khurüa motaso. Neletao Ramai Mapao nou raki khenou buyu maikhe maiye donou sütaosü peikhaitoua baie. 20Ana neletao louzü Mapao nou puhvei mai panou soure donou veasho-a buyu Ejipt mai bah hinou neletaoye sü popapei khaitoue. 21Neletaoye donou Mapao nou apei hi rarou loure, alia Jordan rei kachopa veishoa buyu teidei, neletao Ramai Mapao nou neletao hi peikhai touyu teidei hisü Eye panou loulai moe tea Puhnou chaachou souwure. 22Jordan rei tachopa moa Ewo louzü teidei hai hinou thailaire, ana neletao louzü veishoyu teidei nasü poloure donou tachopa loulai. 23Südonou neletao Ramai Mapao nou neletaoye koa vo soukhai touyu ae neletao Ramai Mapao nou bashara souloua thoso tea kharochi peikhai touyu sü ngaimore donou soutaosoua leikei-a hrülo. 24Daiolouzü neletao Ramai Mapao hai ngaoraiyu ae mei büa tao-a buyu Ramai nasüe.
25“Neletao nou talou teidei sühinou nahmai ngaolou ae tyaosholea ngaoloua phasho hrüpayu thaia zhurai taralia bah nou souloua bashara sü thota louzü alia neletao Ramai Mapao nghingao hinou vah ashi ae kaomoyu vah souta-a puhvei lekha rarou daipayu thaio, 26Enou zhou raki ae deiphao zhih kuloua neletao hi shakhi souwe, süolouzü neletao nou Jordan rei tacholoua polaiyu teidei hisü nou hata bailai; neletao teidei sühisü phasho-a panou hrülai moe, ana neletaoye souhakhai bailai. 27Mapao nou neletaoye tyahrü kukhe maitao hrohisü poraroulai bailai, sübüa neletaoye sü panou mai daotu likhei hria bailai. 28Alia neletao nou buh sükhe hinou ngao-a ngaolai moyu, chou-a choulou hoyu, tou-a toulou hoyu ae kai-a ngilou hoyu rah, deiphao mai bah nou soukhai touyu bashara khesü thotalai. 29Süphaki neletao nou neletao Ramai Mapao sü phou talai, alia neletao nou tsüle teitei nou peia phou louzü, puhye ngaoloulai. 30Neletao hi veahoyu tyatyali vedaoyu teithe ki neletao nou Ramai Mapao hi dakhai velai alia puh chi sü zülai. 31Daiolouzü neletao Ramai Mapao hai zhuvea süshoyu Ramai-e, puhnou neletaoye panou thailai moe moa souha laimoe, alia puhnou neletao puopao hi chaachou soua vo thoukhai touyu nasü ngaipei laimoe.
32“Raichoki, neletaoye nakou mojü, Ramai nou deiphao maiye soupeiyu teithe hinou poa ae raki alilo vatha nou alilo vatha koute hisü haibüa khupayu vepaho vepamo hige moa chouho choumo hige touyu sü noukhaio. 33Neletao raibüa, mai kukhemai tarali hiro Ramai nou puletaoye mei hinou chakuyu alia chouloua hrilouyu buhage? 34Moyuma Ramai kukhe ali-a tyahrü aliye tyahrü kukhe mai bah hinou popaloua puhvei mai panou soulai tea teyu, shee soungaoyu, khupa vah souyu, reih soupeiyu, khouko bushoyu bah thaipa süthaisa-a tapeiyu, ngaopi shoyu vah tyali soupei-a neletao nghithou vuzünou ngaoyu neletao Ramai Mapao nou souyu büa soupeiyu buhage? 35Neletaoye panou Mapao hai Ramai-e, puh moa ra kukhe aliro hae touyu sü süloure donou neletao hi ngaopeie. 36Puhnou neletaoye tuzü peiloure donou rakiva nou puh pai sü neletao hi raochou-e, ae deiphao hinou puhnou neletaoye puhvei mei sü ngaopeie, alia mei toutsü hinou puhvei chipaotao sü neletaoye panou chou-e. 37Puhnou neletao paipao maiye leshiyu donou, neletaoye dopaloue, alia puhvei khouko sünou neletaoye Ejipt mai bah hinou sapapeie. 38Neletao nou takouyu phaki, puhnou neletao jünou duyu ae khoupuyu tyahrü khemaiye sü hulai peilai, alia puletao vei teidei sü pa neletaoye chuchu buyu büa teisa panou thaoloulai. 39Südonou neletao zhou teithe Mapao hai raki-a ae deiphao teitei hi Ramai Mapao nasüe, Puh moa rah kukhe lia hae touyu sü licholo alia ngaikhai touso. 40Zhou teithe Enou neletao hi paopeiyu chikha taosü zülo, sükure toulouzü neletao ae neletao vei tyaosholea hrülai sü kaozhou vei-a hrüloulai, alia neletao Ramai Mapao nou neletao hi teisa vei panou soure donou peikhai touyu teidei hisü phasho-a hrüloulai.”
Tuchüa Buloure Nuhdutao
41Süthaisü Moses nou nuhdu asü hai Jordan teinghi palova hinou dade kupa khailoue. 42Mai taralia ngaobayu hinou moa soumah souzaloua maiye southare toulouzü, puh sü nuhdu haitao tarali hi tuve bailou veie. Nuhdu haitao ali hi tuve louyu puhye sü puhvei hrirai khailupa peilai. 43Nuhdu taosü haitaoe: Reuben maitao donou radeiki hilonou buyu Bezer nuhdu nasüe, Gad maiye donou Gilead hinou buyu Ramoth nuhdu, alia Manasseh maitaoye donou Bashan hi buyu Golan nuhdu nasüe.
Ramai vei Chikha Paochapa Peiyu
44Moses nou Ramai vei chikhatao Israel mai hi paopeiyu sü haitaoe. 45-46Ejipt hinou tapalou thai Moses alia Israel mainou reih kolouyu Heshbon teidei, Amor mai veo Sihon nou khasa-a hrübuyu dei, Jordan teinghi palovada Beth Peor pe deikhodu hi buyu ki Moses nou Israel maitao hi chikha alia kharochi haitao hai paopeie. 47Puletao nou Jordan teinghi palovada buyu Amor mai veo ahai Sihon ae Bashan hi veo Og vei teidei sü poloue. 48Teidei haisü Arnon reipe deikho hinou buyu Aroer nuhdu hinou Sirion (süsü Harmon) deichi hi koute-e, 49alia teinghi palovada buyu Jordan reipe teitei hinou poa khelo kou Athai Zai hi koute alia teinghi palova kou Pisgah deichi phi hi khete loue.
Currently Selected:
PAODAKHAIYU CHIKHA 4: POUMBSI
Highlight
Share
Compare
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.