PAODAKHAIYU CHIKHA 5
5
Chikha Kirou
(Tap 20.1-17)
1Moses nou Israel mai hrülaiye kuve jüloua puletao hi paoe, “Oh Israel maitaore, zhou teithe Enou neletao hi paopeiyu chikhatao ae kharochitao hai doulo alia sütaosü züre donou telo. 2Etao Ramai Mapao nou Etaoye koa Sinai Deichi hinou vo ali soue. 3Mapao nou vo souyu hai Etao paipao mai hi likhei baimoe, ana chu buh hai hinou hria buyu Etaoye koa souwe. 4Mapao nou neletaoye deichi vanou vedao-a mei hinou chipha peie. 5Süteile hi neletao nou mei ngaopi-a deichi hi pamoyu donou Mapao vei chipaotao hai paopeire donou Enou Mapao ae neletao kohinou la-a bupeie.”
“Mapao nou paoe, 6‘Neletaoye Ejipt teidei hinou, maivei qila soua hrüyu hinou sapa peiyu Mapao Ramai nasü Enoue.
7“ ‘Neletao Eye baimoa Ramai kukheye tholai moe.
8“ ‘Neletao bashara moyuma rakiva hinou moa deiphao hinou moyuma deikhe hinou mokhaiyuma dzükhe hinou buyu hana tarali vei zhurai souloua tholai moe, 9Neletao nou bashara moyuma zhurai taraliye nakou tholai moe, daiolouzü neletao Ramai Mapao nasüe E baie, ae Esü Ramai kukhe ngaoraiyu Ramai-e. Eye ngaorayu mai hisü Enou puletao vei tyaosholea asü ae adai koute veahoyu sü peiwe. 10Ana Eye leshiyu mai alia avei chikhatao hinou tayu mai hisü khaphao the-the#5.10 khaphao thethe; moa khaphao theli. koute avei leshi zhuveayu nasü ngaopeiwe.
11“ ‘Neletao Ramai Mapao zhih sü kaomoyu hinou poa vah soulai moe, mai taralia azhih poa kaomoyu vah souyu mai hisü Enou tudee peilai.
12“ ‘Soteithe zhousü reilo, alia süzhou hai shee-a khailo. 13Teithe arou sü neletao nou vah soulai, 14ana teithe anai zhousü neletao Ramai Mapao donou soteithe soulai. Haizhou sü neletao nou vah soulai moe, neletao nahmai, kilai mai, kikhaorü moyuma neletao teidei hinou koa hrüyu shetumai ali koutea panou vah soulai moe. 15Neletao Ramai Mapao Enou neletaoye sü Ejipt maivei qila soua buyu hinou khailupa peie; südonou Soteithe nasü neletao Ramai Mapao nou kharochi peikhai touyu thaifüa reilo.
16“ ‘Neletao Ramai Mapao nou kharochi peikhai touyu thaifüa nepfü ae nepuoye tsükhoulo, sükulouzü Ramai Mapao nou neletao hi peikhai touyu teidei hisü neletao nou hrüsho-a buloulai.
17“ ‘Maiye southaso.
18“ ‘Khulou vah souso.
19“ ‘Maivei vaoso.
20“ ‘Kinapa maiye da shaki soupeiso.
21“ ‘Kinapa maivei kilu thainüso, kinapa maivei chapfü moyuma kilai mai, mokhaiyuma kinapa vei hana taralia thainüso.’
22“Chikha haitao hai Mapao nou neletao mai hrülaiye donou meihro hinou, teihao ae zhitei-a buyu deichi vanou paopa peie, hakukhe hali-a paopu moe. Puhnou sütaosü chuhkhao ahai va rüthouloua ahi peie.
Maikhe Mainou Ngaopiyu
(Tap 20.18-21)
23“Neletao nou deichi vanou mei tao-a buyu alia zhitei-a buyu hinou pai raopayu chouloukhaie, khü-khü hinou süthai-apei maitao ae tsümaitao nou ahi tave-e, 24alia haibüa paoe, ‘Zhukhaio, Etao Ramai Mapao nou puhvei khouko ava ae aduso sü Etao hi ngaopeie, alia puhvei pai sü mei hinou choue, ae mai aliye Ramai nou chakuyu thai-a puh hai hriloue touyu sü zhou Etao nou ngaoloure. 25Südonou chuo Etao daisou nou thailai? Daiolouzü Etao Ramai Mapao nou Etaoye chapu louzü, Etaoye mei nou deitha shulai. 26Deiphao mai aliro mei hinou hria buyu Ramai nou raopayu pai chouloua Etao büa hrilouyu buhage? 27Moses, ne dakhai kou Etao Ramai Mapao nou paoyu teitei sü keilo, alia ne hi Etao Ramai Mapao nou paopeiyu pfüphou sü Etao hi dakhai ve paopeio, Etao nou sütaosü keiloua soulai.’
28“Neletao nou ahi paoyu chi khesü Mapao nou choulou khaie, puhnou ahi paoe, ‘Maikhe mainou paoyu chi sü Enou choure, alia puletao nou paoyu sü kao-a baie. 29Puletao nou haibüa teisa bulouzü, teisa haibüa Eye tsükhou-a bulouzü, alia avei chikhatao züa bukoute louzü, hateitei sü puletaoye donou alia puletao vei tyaosholea koute hi kaozhou vei-a bukoute loulai. 30Taho puletao hi lahkuku vei sahpao hisü dakhai tawo tea paopeio. 31Ana Moses, newo louzü Eye koa hai hinou bulaio, Enou ne hi avei chikha teitei alia kharochitao sü peilai. Sütaosü nevei maitao hi doupeio, sübüa puletaoye panou sütao sü züa Enou peilaiyu teidei hisü pa hrüa bulai.’
32“Israel maitaore, neletao Ramai Mapao nou peikhai touyu chikhatao sü teitei nou zü loure donou leikeilo. Chikha ali koute-a zülou moyu souso. 33Chikha sütao teitei nou zülo, sükulouzü neletao nou talou poloua hrülaiyu teidei hisü hateitei nou kaozhou vei-a bailai alia phasho-a hrüloulai.
Currently Selected:
PAODAKHAIYU CHIKHA 5: POUMBSI
Highlight
Share
Compare
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.