EPHESAMAI 2
2
Athai hinou Ahri hi Payu
1Raikisü neletao hai paoyu zümoyu donou ea mah vanou rako hilonou thaia bue. 2Süpha kisü neletaosü deiphao hi ashi luduna thaifüa tae; Ramai chi zübayu maitaoye chu tukha-a buyu rako, rateihi buyu rako hilo khoukotaovei peichana chi sü neletao nou züwe. 3Chechenou Eletao hrülai-a puletao bübaie ea lah Eletao pfüphao ea tsünou züpayu tali soua Eletao vasou züpa thaifü-a hrüe. Alia südonou Eletao sü zhai thaifüa deiphaomai kukhe büa Ramai rarou lekhavei nahmaitao baire.
4Ana Ramai vei zhuveahai alaosou buloure, alia Eletaoye donou puhvei leshihai dusho loure, 5süolouzü Eletao sü Eletao vei paoyu zübayu vanou rako hinou thaia buyu phahinou puhnou Eletaoye sü Khristaye koa souhri peire. Neletaoye khailu peiyuhai Ramai zhuvea vanou baie. 6Eletao nou Khrista Jisu ye koa ali soulouyu hinou puhnou Eletaoye puhye koa rakiva buhtao hinou buloure donou puhye koa souhri peire. 7Haisü puhnou thaikhaihi vere teile teiteitao hinou Khrista Jisu hinou puhnou Eletao hi leshi peikhai touyu paoshalou hoyu puhvei zhuvea nasü pongaore donou baie. 8Daiolouzü zhuvea nou neletaoye lü vanou khailu peire; alia haisü lah neletao nou te-a soulouyu vanou moe, haisü Ramai vei sapeina baie— 9haisü emainou souyu vah hilonou moe, molouzü maitalinou khaophu soushulai. 10Daiolouzü Eletao hai Khrista hinou vah avei panou soua bure donou soupeikhai touyu puhvei vahmaitao baie süolouzü Eletaoye panou vah aveitao soua buloure raia Ramai nou Eletaoye donou soudachere.
Khrista hinou Ali Soulouyu
11Südonou li-chokhaio, süolouzü teile lihisü neletaosü vasou hilonou tahrüh kukhe maitaoe ea vasou hilonou emai bahnou soukhai touyu hee rodeyu tea kuyutao nou neletaoye sü hee rodemoyutao tea kue. 12Teile sükisü neletao sü Khrista hinou ku-a bue. Neletaosü vakou teidei maitaoe ea Ramai nou dolouyu maitao hi lou zhomoe. Neletaosü Ramai nou puh maitao hi apaopei khaitouyu hinou soushukhai touyu votao hi lou koa zha ngaozho moe, alia neletaosü deiphao haina hinou areih lia ha-a ea Ramai loumo-a hrüe. 13Ana chuo, Khrista Jisu ye koa ali soulouyu hinou lüh lihi doushoa buyu neletaoye sü Khrista vei zhe nanou pove nghei peire. 14Daiolouzü Khrista puhnou Jihudimai ea tahrüh kukhe maitaoye alikhei soupeiwu-a Eletao hi kaonayu pove peire. Puhnou lah puhvei pfüphaonou puletaoye kuku-a dekhaiyu ea panou alinou liye ngaoba-a buyu bouvou sünasü dakhaore. 15Khrista puhye koa ali soulouyu hinou tahrüh ahai hinou mai ashuli soupa loure donou puhnou Jihudi maivei chikhatao ea zhaitao vei razhai nasü souhare, alia sübüa soukaona peire. 16Kros vanou thaiyu Khrista puhvei athainanou puletao alinou liye ngaoba-a buyu sü souhare; kros vanou puhnou tahrüh ahaiye sü pfüphaoli soupeire ea puletaoye sü Ramai hi sakhaive peire. 17Südonou Khrista nou tavelou-a Ramai hinou doua buyu tahrüh kukhe neletao hi, alia puhye nghei-a buyu Jihudi maitao hi kaonayu vei ko avei nasü mai hrülai hi paodou peire. 18Jihudimai ea tahrüh kukhemai Eletao hrülaisü Khrista vanou rako ali hinou Puo nghojü hi veloure.
19Sükuyu thaisü tahrüh kukhe neletaosü vakou teideimai more moa shevai-shesükhai more; neletao hai chuo sheeyu maitaoye koa lah teidei maibaie ea Ramai kikhavei maitao baie. 20Khrista Jisu puh lahnou ki kainghouvei chuh nasü soua, neletao-a sei-atamai taonou ea rachi paola maitao nou soushupa khaitouyu kifüna hinou soupa loure. 21Ki teiteiye paimua buyu ea sünaye panou Mapao hi posheela khaitoua sheeyu rathoki ali soua panou dushu palouyu hai puhnou baie. 22Puhye koa ali soulouyu hinou neletao-a kukhemai hrülaiye koa puh rako vanou Ramai nou buloure buh ali koa soushupa loure.
Currently Selected:
EPHESAMAI 2: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.