EPHESAMAI 3
3
Tahrüh Kukhemai donou Paul nou Vah Souyu
1Qo haina vanou, tahrüh kukhemai neletaoye donou Khrista Jisu vei hukhahi bumai soua buyu Paul Enou Ramai hi veachi paowe. 2Veimosou-a neletao nou chowulai süolouzü Ramai nou puhvei zhuvea hinou vah hainasü neletao veire souloure donou Ahi peikhaitoue. 3Ramai nou puhvei kheitsü nasü pongao peia süsü Ahi süngao peie. (Enou süvanou dzüshoa rüre, 4alia Enou rüyu nasü neletao nou phoulouzü, Enou Khrista vei kheitsü vanou süyu nasü neletao nou süloulai.) 5Daoraiki teile hisü kheitsü haina vanou emai hi paongao peimoe, ana chuo Rako vanou kheitsü hainasü Ramai nou puhvei sheeyu sei-atamai taohi ea rachi paola maitao hi pongao peire. 6Kheitsü sünawo louzü Ko Avei süna vanou tahrüh kukhe maitao nou Jihudimaiye koa Ramai vei hataosü zha ngaozho loure; puletaosü koa lou pfüphao ali souloure ea Ramai nou Khrista Jisu vanou apaopei khaitouyu hisü koa zha ngaozho loure.
7Puhvei khoukonou vah souyu süna vanou puhnou Ahi peikhai touyu Ramai zhuvea vei sapeina sünanou Eye sü Ko Avei vei kilai panou souloure. 8Sheeyu maitao hrülai jünou Esü tainoukakhai-a Khrista vei paoshalou hoyu kinina vanou tahrüh kukhe maitaohi paodou peire donou zhuvea hainasü Ahi peikhaitoue, 9alia peikhai touyu süsü ha teitei soupeiyu Ramai puh hi dao daonou poku khaitouyu kheitsüna vei aroh nasü daisa touyu maikhemai hrülaiye panou ngaoloure donoue, 10sübüa chuo Ramai ratsü tya tyali hai lüloumaime vanou rakiva buhtaohi buyu peichamaitao ea khouko taoye panou süloulai. 11Haisü Ramai nou puhvei teisavei aroh thaifüa souloue, alia süsü Eletao Mapao Khrista Jisu vanou souloure. 12Khristaye koa ali soulouyu hinou puh hi Eletao vei lü buyuna vanou loucheshoa Eletao nou Ramai nghojühi takou loure khuveiyu nasü bue. 13Südonou Enou neletaoye donou veahoyu süna vanou le khaitayu souwuso tea Enou neletao hi khowe; haisü neletao vei kathe baie.
Khrista vei Leshi
14Qo haina vanou Enou Puo nghojünou kou Akhou khüloua veachi paowe, 15puh hinou rakihi ea deiphao hi buyu kikhamai hrülainou puletao vei checheyu zhih nasü ngaoloue. 16Enou Ramai hi puhvei khouko ava vei kini süna hinou neletao hi puhvei rako vanou neletao vei lekhe mainasü soutsü peiloure donou khoukosü khowe, 17alia lü vanou Khrista nou puhvei kihai neletao lekhe hinou souloure donou Enou veachi paowe. Alia leshi hinou neletaosü maa tsülou loure ea kifü soushu paloure donou Enou veachi paowe, 18sübüa neletao nou Ramai vei mai hrülaiye koa Khrista vei leshihai daizhozhou du-shosa ea daizhou kusa ea thousa touyu süloure khouko buloure donoue. 19Ovai, Khrista vei leshihai teiteinou sülouho khaia puh leshihai neletao nou süloulai ea sübüa neletaoye sü Ramai zhaido vuzü nanou liche-a phoupei loulai.
20Chuo Eletao lekhe hinou vah soua buyu khouko süna vanou Eletao nou khoyu moa choyu sütao teitei jünou alaosou koua soupeilou süyu, 21Ramai puh hisü lüloumaime hinou ea Khrista Jisu hinou maikha teitei hinou teisanou paoshoyu souloutheo! Amen.
Currently Selected:
EPHESAMAI 3: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.