EPHESAMAI 4
4
Rako vei Lero Zhoyu
1Südonou Mapaoye kuvah souyu donou hukhahi loua buyu Enou neletao hi khowe, süolouzü Ramai nou neletaoye kulouyuki puhnou panou talai touyu hrüzhai süna hinou züdoua talo. 2Teisanou natai-a, kaona-a shamea-a bulo. Alinou liye shamea peiyu nou koa neletao vei leshisü pongaokhaio. 3Kaonayu vei phukhai touyu hinou rako vei lero zhoyu nasü khailoure donou telo. 4Ramai nou neletaoye kulouyu hi areih ali buyu sübütoua sühisü pfüphao ali ea Rako ali bubaie. 5Mapao ali, lü ali ea dzükhao dayu ali bubaie; 6alia maikhemai hrülai pei hi buyu, mai hrülaiye zhüpoa buyu ea maikhemai hrülai lekhehi buyu emai hrülai Puo Ramai ali bubaie.
7Ana Khrista vei sapeinavei kha thaifüa Eletao mai alilihi zhuvea sü peiwure. 8Südonou sheeyu larübvü nou haibüa paoe,
“Puhnou kushoyu buh hi takheyu kisü,
puhnou hukhahi bumai alaoye puhye koa sapoa tare;
alia puhnou emai hi sapeinatao peie.”
9Chuo, “Puhnou takheyu” touyu vei kosü daie? Süvei kowo louzü raikai-a puhnou deiphao vei thou-thoulai buh hi takou loure touwe. 10Südonou ha teiteisü puhnou phoupei loure donou, takouyu puhsü rakitao teitei jünou kua ea dou koushoa takheyu puhbaie. 11“Emai hi sapeinatao peiyu” sü puh baie; puhnou kamaiye sü sei-atamai, kamaiye sü rachi paolamai, kukhe maiye sü Ko Avei paodou-apeimai ea kukhe maiyenou zhaokho-apeimai ea dou-apeimai panou souloure donou dowure. 12Puhnou haisü Khrista vei pfüphao soudu puloure donou sheeyu mai hrülaiye Khristamai vei kuvah vei vah donou souda peire souloure. 13Alia sübüa Eletao hrülaisü Eletao vei lü alikhei souyu nahi ea Ramai Nahpoutuye alikheisoua süyu tsünahi koa vezholai; Eletao sü Khrista vei sah shotouyu sünahi khe-a licheyu maitao soutalai. 14Südonou Eletaowo lah puletao nou chopa louyu do sünanou kukhe maiye sümah sümo peiyu madayu maitao vei doupeiyu teikhai teiteinou hükou-hükhe-a pfüa laiyu nahmaitao büwu laimoe. 15Süjüwo, leshi hinou acheche chi nasü pao-a Eletao vei pei soua buyu Khrista hisü ha pfüphou hinou dushu palou vuzülai. 16Puhvei khakhe hinou pfüphaovei kukuyu zha teiteisü pove thaokhaitoue, alia pfüphao pfüphouye bou teiteinou sühi peikhai touyu sütaonou paimupoa bue. Südonou kukuyu zha ali linou puletao nou souzüyu vahtaosü souyu kisü, pfüphao pfüphounou leshi vanou duzhupa louwe ea lah puhye soushupa peiwe.
Khrista hi buyu Hrü Ashu
17Südonou Mapaowo zhih hinou Enou haisü neletaoye tukha-a paowe: hako tsü pfüa buyu zhaohsho maitao büa neletaowo hrüpu khaiso; 18puletao tsüwo maitare. Puletaowo Ramai nou peiyu hrü nahi zha alia hae, daiolouzü puletao hai halia sükhaimoe ea le khoushoe. 19Puletao sü hraongu lia hae; lah puletao hrümaisü sheemoyu vah hi thoupeire ea nuyu ali-a hazheia ngaoshiyu vah teitei sü puletao nou souloure.
20Ana neletao nou Khrista vanou sübüa doulou moe! 21Veimosoua neletao nou puh vanou chouloure, alia puh thaifümaitao soua Jisu hi acheche buyu nasü neletao hi doupeire. 22Südonou neletao vei hrü akunahi buyu zhai ea madayu ke-zhe züpa thaifüa souhao-soushiyu neletao vei hrü akunasü thaowuwo. 23Neletao le ea tsüsü teiteinou sou ashu vuzüwulai, 24alia acheche vuzüyu ea sheeyu hinou Ramai vei zhu rai-a soupeikhai touyu zhai ashu nasü banoulo.
25Südonou madayu sü thaowu-a mai hrülainou lah lahvei kinapamai hisü chichenou pha-kukhaio, daiolouzü Eletao hrülaisü Khrista vei pfüphao hinou vasou ali baie. 26Neletao nou raroubukhaia mah souwuso, alia neletao nou rarouyu hisü panou teinghiye louwuso. 27Rashinahi teile zhou-avei peiwuso. 28Avaomai nanou vaopu khaiso, ana puhnou toure hamaiye soukha peiloure donou lah puh bahnou vah avei taosü te-a souloukhaio. 29Neletao mü hinou chi-lashi paopawuso, anou nelenou paoyu sünanou keia buyu maitaohi avei soupei loure donou teile kao-zhou zhua soudu papei loure chi sütaonou paolouwo. 30Alia Ramai vei Rako Mashiye le souveaso, daiolouzü puh vanou neletaoye sü khailupapei laiyu teitheki donou paoshee soupeire. 31Neletao hrohinou khataoyu, züsüyu, rarouyu, shusoua züvayu, maichi paoshiyu ea maiye ngaoba-ngaoshiyu teiteisü thaokhaiwuwo, 32alia Khrista vanou Ramai nou neletaoye khaipeiyu sübüa neletao alinou liye khuhao-a ea zhuvea leshi peia alinou li mah khaipeikhaio.
Currently Selected:
EPHESAMAI 4: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.