EPHESAMAI 5
5
Teiva hinou Hrüyu
1Südonou neletao hai Ramai nou leshiyu nahmaitao baiyu donou, neletaosü puh zhai dou vuzülai. 2Alia Khrista nou Eletaoye leshia kai nüveiyu na ea posheelayu na Ramai hi popeiyu büa lah puhye sü Eletaoye donou thoupeiyu sübüa neletao hrümai hai leshinou tukha-a hrüvuzülo.
3Neletaowo Ramai vei maitaoyu donou neletao hrohinou khulou souyu moa sheemoyu vah tali moa loküyu sütaohai zhih koutea panou sa-a neletao hrohi buwulaimoe. 4Moa neletaoye donou hraopachi paoyu, sheemoyu chi moa müro-mübaoyu chi paoyu zümoe. Süjüwo neletao nou Ramai hi kalo paoloukhaio. 5Haisü neletao nou süvuzülo süolouzü khulou souyumai, sheemoyumai moa loküyumai (loküyu hai basharaye thoyu zhai alie) talinou Khrista ea Ramai vei Vedei hi zhalia ngaokhai laimoe.
6Maitaliye panou neletaoye raohayu chipaonou lawuso; daiolouzü haibüyu vahtao vanou Ramai vei rarouhai paoyu zübayu nahmaitao pei hi vewe. 7Südonou sübüyu maitaoye koa hakia tawuso, 8daiolouzü teile lihisü neletao hai teizhi hinou bue, ana chuwo neletao nou Mapao vei maitao soulouyu donou, neletaosü teiva hinou buloure; südonou teivahi nahmaitao büa talo, 9daiolouzü avavei shithou hai avei teitei, cheche-a hrüyu teitei ea acheche teiteihi buwe. 10Mapaowoye dainou le sousa peiwe touyu nasü douloure donou telo. 11Teizhivei thouhayu vahtao hisü koa lou souzho shuo, süjüwo sütaosü teivahi popa ngaopeikhaio. 12Puletao nou kheikheisoua souyu vahtao vanou phayu koute-a chechenou hraoyule. 13Alia na teiteihai teivahi popa phukhaiyu kisü, sükisü puletao vei zhai chekhaoyu nasü popa sheesha-a ngaopei baiwe; 14daiolouzü sheetoua popa ngaoyu hatalisü ava data baiwe. Sübüyu donou haibüa paoe,
“Oh zhia buyu ne, kaishulouwo,
alia athai hinou hrishulo,
alia Khrista nou neye avasü peilai,”
15Südonou kabüa neletao nou hrüsa touyu sü zhutoulo. Tsü hayumai bümoa tsü veimai büa hrülo. 16Teile kao avei teitei hai soutaosoua seilo, daiolouzü teithe haitaohai veimoe. 17Südonou voso, ana Mapao vei leli hai daisa touyu sü sülo.
18Zhaoh shozhiwuso, daiolouzü sühisü soula-pfülayu alaosou bue; süjüwo Rakonou phoupeia bulo. 19Alinou lihi sheeyu lounou, paoshoyu lounou ea rako lounou pao-a, soua bulo. Mapaowo hisü neletao vei le teiteinou ea pai-la veinou lou soukhaio. 20Teisanou ea ha teitei hinou Eletao Mapao Jisu Khrista zhih hinou Puo Ramai hisü kalo paokhaio.
Kikhamai ea Church vei Nada
21Khristaye khuhao peiyu süna hinou lah neletao linou li khehi hrüa bupeilo.
22Chapfü maitao, neletao nou Mapao vei khakhehi hrüa buyu büa neletao vei chaamaitao khakhehi hrüa bulo. 23Daiolouzü Khrista nou puhvei pfüphao, alia lahnou sünavei khailu-apeio soua buyu lüloumaimevei peichana soua buyu büa chaa nanou chapfü peichana süe. 24Südonou lüloumaimenou Khrista khehi hrüyu büa chapfümai taonou ha teitei hinou puletao vei chaamaitao khehi hrüvu zülai.
25Chaamaitao, Khrista nou lüloumaimeye leshiyu ea süna donou puhvei hrirai peiyu sübüa, neletao chapfümaiye leshilo. 26Haisü puhnou lüloumai meye puhvei chipao vanou dzü hinou khüshee peiwu-a soushee peiyu thainou sünaye Ramai hi posheela peire donou soue; 27alia haisü lüloumaimeye lah puh hi zhai veishoa süolouzü shee-a ea mahlia ha-a, chaalia taomoa moa tei lia taomoa ea kukhe chemoyu alia ha-a popeire donoue. 28Südonou chaamaitao nou puletao chapfümaiye lah puletao pfüphaoye leshiyu zhaibüa leshilai. Lah puhvei chapfüye leshiyu puhnou lahye leshiwe. 29Daiolouzü maitalia lah puh vasouye ngaoratamoe, ana Khrista nou lüloumai mehi soupeiyu zhaibüa, sünaye vaitoupei-a zhutou peiwe; 30daiolouzü Eletaowo puhvei pfüphao zhataobaie. 31Haisü sheeyu larübvü nou paoyu büa, “Qo haina vanou poutumai alinou puh pfüpuoye thaowua puh chapfüye koa lou ali souloulai, alia puhaisü vasou ali souloulai.” 32Haisü dushoyu kheitsü alie, ana Enou Khrista ea lüloumaime vanou paowe. 33Ana haisü neletaoye-a paowe: chaamai hrülainou puletao vei chapfümaitaoye lahye leshiyu büa leshi vuzülai, alia chapfümai hrülainou puletao vei chaamaitaoye tsükhou vuzülai.
Currently Selected:
EPHESAMAI 5: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.