HOSEA 14
14
Hosea nou Israel Mai hi Khoyu
1Oh Israel maitaore, neletao Ramai Mapao hi dakhai velouo, daiolouzü neletao nou mah souyu vanou neletao phi süloua baie. 2Mapao hi dakhai velou baio, alia haibüa puh hinou veachi paolo, “Etao vei mah teitei nou khaipeio alia zhuvea nou Ehye podakhai peio, sükulouzü teisa nou Neye paosholai. 3Assaria mainou Ehye khailu peilou hoe, alia rhei pfüa reih souyu hainou Etao ye vupei louhoe. Etao nou bashara naye ‘Etao Ramai,’ teanou paopu khailai more. Daiolouzü pfüpuo ha-a veahoyu maiye zhuvea peire hai Ne likhei baie.”
Mapao nou Israel Maiye Hrü Ashu Peilaiyu
4 Mapao nou paoe,
“Enou puletaoye sü Ahi sa-a dakhai veloulai,
puletaoye sü Ale teitei nou peia leshi peilai,
daiolouzü Avei lekha-rarou nasü puletao hi bupu khailai more.
5Deithe hi teirü kouhpeiyu büa Enou Israel mai hisü rükouh peilai,
puletao nou hüvei shoyu poupa büa veishoa papalai,
alia Lebanon hi süübe büa puletao maasü chülou loulai.
6Puletao vei bo hai veishoa holo-hailo vikhelai,
puletao hai hüvei shoyu poupa ali bülai,
alia puletao hai kaivei shoyu Lebanon vei Sedar süübe kulai.
7Puletao nou Ahi dakhai ve Avei shouh khenou hrüpulai,
alia puletao nou routhou be libüa veishoa hrükhelai;
puletao nou darkha shibe libüa veishoa vikhelai,
alia zhih tashoyu Lebanon vei zhaoh büa puletao zhih sü talai.
8Oh Israel, neletao vei bashara nasü E poa daisoulai?
Neletao ye kikopa peiyu nasü E baie.
Teisa nou daia buyu süübe ali büa Ewo bubaie,
Ahinou neletao vei rashithou sü ve-a baie.”
Akhai chipao
9Tsüveia buyu maiye sü panou chipao haitao sülo, vei-shi sükulou süa buyu maiye sü pa haitao polo; daiolouzü Mapao vei ludu sü kaowe, alia acheche mainou ludu süna hai talouwe, ana mah maio louzü süna hinou phi süloua bailai.
Currently Selected:
HOSEA 14: POUMBSI
Highlight
Share
Compare
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.