JONAH 4
4
Jonah vei Rarouyu alia Ramai vei Zhuveayu
1Ana süvanou Jonah hai vamo shore alia rarou shore. 2Südonou puhnou Mapao hisü veachi paoe, “Oh A Mapaowo, Enou ne hi haibüa bailai tiyu sü E nuh hi bukinou paomowu? Süvanou E Tarshish hi tutsü tamowu; Ne hai zhuvea süyu, lekha hahamoyu, leshi akhai hayu, alia ashi souyuma khaipeiyu Ramaie touyu Enou süwe. 3Oh Mapao, südonou chuo leshia nou avei hrümai hai popeio, daiolouzü Eye donou hriyu jünou thaiyu punou vei baire.”
4 Mapao nou paoe, “Nenou rarou züdouyu daie bue?”
5Süthaisü Jonah nou tachopa nuhdu vei teinghi palovatha butare, alia sühinou puhnou teikhü ali souloua bue. Puhnou sühinou nuhdu nasü daie palaisa teanou zhua bue. 6Ramai Mapao nou poube ali panou paopaloua Jonah nou vamoa buyu nasü puh le souva peire donou pa teihao soua bupeie. 7Ana thainesho shona sü, Ramai nou khahrei ali seive süübe sünasü touthawure. 8Teinghi payu thai, Ramai nou teinghi palova nou soushoyu teikhai seive peie, alia teinai souleyu donou Jonah sü thainonore, südonou puhnou paoe, “Eye donou hriyu jüo thaiyu nou veipure.”
9Ana Ramai nou Jonah hi paoe, “Süübe haina thaiyu vanou ne rarou züyu daie bue?”
Jonah nou paoe, “Enou rarou züyu bue, thaiyu koute rarou züyu bue.”
10 Mapao nou puh hi paoe, “Süübe hainawo zhou khei paopa loua thainesho thaita-a baie; süna donou nenou halia soumoe, alia süübe süna nenou souvi khemoe, ana süübe süna thaiyu donou nenou levea-e. 11Dushoa buyu Nineveh nuhdu na donou E zhuvea moa bailaiwu? Nuhdu sühie mai 120,000 jünou poue alia kikhaorü chosha louhosoua buyu hai E pa-ngaimoa bailaiwu?”
Currently Selected:
JONAH 4: POUMBSI
Highlight
Share
Compare
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.