JONAH 3
3
Jonah nou Ledalouyu
1Süthaisü Mapao nou Jonah hisü vu ahai nasoua haibüa paoe, 2“Kushulo, alia Nineveh nuhdu hisü taho Enou ne hi paopei khaitouyu chipao nasü paopeio.” 3Süthai Jonah hai Mapao nou paoyu thaifüa Nineveh hisü tare. Nineveh nuh hai dushoe, südonou nuh tachoyu hai teithe asü louwe. 4Jonah nou nuhdu nahisü tashu tare, puhnou teitheli tayuthai, haibüa paoe, “Teithe raidai thaisü, Ramai nou Nineveh nuh hai souha laire!”
5Nineveh hi hrüa buyu mainou Ramai ye louche loure, südonou puletao mai taidu teitei nou, alia soukousah banou khai touloua, lühlai teanou chi souloue.
6Nineveh hi veo nou ko sühai süloukhaie, puh-a vebu thaowua alia sabanü laowua soukousah thouloure alia vounai hisü kouh butare. 7Alia puhnou Nineveh teidei teitei hisü ko haibüa seitare, “Kharochi hai veo alia puh khenou vah souyu mai hinou vewe; ‘Mai lia panou ha toulai moe, mokhai-a kikhaorüa panou ha lia toulai moe, moa dzüa panou ke laimoe. 8Mai alia kikhaorü hrülai nou soukousah banouloua Ramai hinou eihtea veachi paolai alia mai hrülai nou vah ashi ae zhaipou shiyu nasü thouwulai. 9Sükulouzü, Ramai vei lekha-rarou nasü thouwua etao ye souhawure hinou khaipei shulai.’ ”
10Puletao nou vah ashi nasü thaowua leda loure touyu Ramai nou ngaoloukhaie, puletao ye souhalaiyu hinou Ramai-a leda tare alia puletao ye souha mode.
Currently Selected:
JONAH 3: POUMBSI
Highlight
Share
Compare
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.