LEVIMAI LARÜBVÜ 21
21
Napao Maitao nou Sheere
1 Mapao nou Moses hi haibüa napao maitao, Aaron vei nahpoutu maitao hi paopeio tea kharochi peie, “Napao mai talinoua lah puhvei kityarai mai thaiyu buh hisü velou lah puhye naanou hinou sheemoyu sü souso, 2puh hai puh pfüpuo, moa nahpoutu, moa nahnaotu, moa puh thaihou jürai, 3moyuma nghitamoa puhye koa buyu tupfümai molouzü lahye naanou hinou shee moyu sü souso. 4Puhnou nghi-sha soulouyu vanou kityarai souloua buyu maitalinou thaiyu buh hisü taho lahye shee moyu sü soulai moe.#21.4 Phoure 4 hai Hebrew hi sheesha timoe.
5“Napao mai talia dopfüyu donou pei sailai moe, mümai bipfülai moe, vasou hi chadaopfülai moe, moyuma vasou hi zhimü soupalai moe. 6Napao mai hai shee-a nou bulai, ae avei zhih hai soushilai moe, daiolouzü puletao nou thoudzü vei posheela nasü Eye posheela peiwe, südonou puletao hai shee-a nou bulai. 7Napao mai ali nou khakhapfü, moa sheemoyu naotumai, moa reikhai maipfüye nalai moe, daiolouzü napao mai hai sheewe. 8Maikhe mainou napao maiye sheewe tea popeilai, daiolouzü posheela khesü puletao nou Eye posheela peiwe. E hai Mapao-e; E sü shee-e ae Enou avei maitaoye soushee peiwure. 9Hakinou napao vei nah naotumai nou khakhapfü souta louzü, puhnou puh puoye hraongu soupeiwure, südonou honapaiye sü mei hinou deithawulai.
10“Napao Peichana hai nare theadzü sünou puh pei hi lazü peiwure ae napao maivei sabanü banoure donou soushee peiwure, südonou puhnou peiku moa talai moe, moyuma dopfüyu vei shee soua sabanü hai paiphawua banoulai moe. 11Puhnou thaiphao buyu hisü veloulai moe, puh pfüpuo thaiyu buh hi koute-a velai moe, daiolouzü thaiphao buyu hisü veloua lahye naanou hinou sheemoyu sü soulai moe, 12moyuma puhnou avei sheeyu Sahpao nasü thaokhaiwua Eye thoyu buh nasü souzhai laimoe, daiolouzü puhye sü sheeyu vah panou soure donou theadzü napeia soukupa khaiwure. E hai Mapao-e. 13Puh hai sheesha touyu loumainah nou nalai, 14reikhai maipfü moa khakhapfü sü nalai moe. Puhnou lah puhvei khü hinou sheesha touyu loumainah nou na-a bailai. 15Puhvei nahmai hai sheere pha-e, ana puhnou sheesha touyu loumainah namo louzü puhvei nahmaitao hai naanou hinou shee moa bailai. E hai Mapao-e, ae Enou puhye panou Napao Peichana soure donou dokupa peiwure.”
16-17 Mapao nou Aaron hi haibüa paopeio tea Moses hi kharochi peie, “Nevei tyaosholea mai talia shovai louzü, puhye sü panou thoudzü vei posheela hai Eye posheela peisho. Chikha hai nasü vere teile veishi hia talai. 18Daiolouzü chaa pfüyu mai, nghichayu mai, phibah shiyu mai, moyuma pah hi cha chemoyu mai, phibah shiyu mai talia Eye posheela hai pokou peilai moe. 19Phibah shiyu mai, 20soutsü taoyu mai, moyuma tai-dzüyu mai; nghithou shiyu mai moa loukhaora souyu mai, ae dzüthou lakhai touyu mai talia panou posheela sü Eye popeilai moe. 21Napao Aaron vei tyaosholea mai taralia shovai louzü, puhye panou posheela hai Eye popeilai moe. 22Mai sütao hai Eye posheela peiyu touso louzü toua bailai ae sheesheelai thoudzü vei posheela khaitouyu touso louzü toua bailai, 23ana puletao hai shovaiyu donou sheeyu haosah haokhai touyu nghiki hai koulai moe, moyuma posheelabu hisü koulai moe. Puhnou sheeyu na haitao hai souzhai laimoe, daiolouzü E hai Mapao-e ae Enou sütao hai soushee khaitoue.”
24Südonou Moses nou Aaron hi, puhvei nahmaitao hi ae Israel mai hi haitao hai paopeie.
Currently Selected:
LEVIMAI LARÜBVÜ 21: POUMBSI
Highlight
Share
Compare
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.