LEVIMAI LARÜBVÜ 22
22
Posheela Peiyu Natao vei Sheeyu
1-2 Mapao nou Aaron ae puhvei nahmaitao hi haibüa paopeio tea Moses hi kharochi peie, “Israel maiye panou sheeyu avei zhih sü souzhai more donou puletao nou Eye pove peiyu posheelana khesü tsükhoua popeio. E hai Mapao-e. 3Neletao vei tyaosholea mai talinoua naanou hinou shee moa buyu phaki, Israel mainou Eye peikhai touyu sheeyu posheelana hisü koulouzü, puhye panou hrüphao hinou posheelabu hisü koupu khaitoulai moe. Chikha haina sü vere teile veishi hia talai. E hai Mapao-e.
4“Aaron vei tyaosholea mai taralia loukhaora soua bulouzü, moa puh pfüphao hinou sheemoyu dzü küa bulouzü, posheela khaitouyu sheeyu touso sü naanou hinou sheemo koute hai toulai moe. Napao mai talia sheemoyu thaiphao deilouzü puhsü shee more, moyuma phaodzü palouzü, 5moyuma sheemoyu hrikhaona moa maiye deilouzü puhsü shee more. 6Haibüa shee moyu napao mai talia koukhe koute hai sheelai moe, südonou puhsü dzükhü loumo koute hai sheeyu posheela vei touso hai toulou shi-e. 7Teinghei louta louzü puhsü shee-a bailai, süthaisü puhnou sheeyu touso hai toua bailai, daiolouzü sütao hai puhvei touso baie. 8Napao mai ali hai lahnou thaiyu moa soukhaona nou southayu hrikhaona vei sou sü toulai moe; puhnou sou sübüyu tyahai tou louzü puhsü shee more. E hai Mapao-e.
9“Enou peikhai touyu kharochi teitei hai napao mai hrülai nou zülai. Sükumo louzü puletao hai soumah loua thai-a bailai, daiolouzü puletao nou avei sheeyu chikha khesü zümore. E hai neletaoye soushee peiyu Mapao nasüe.
10“Napao vei kihikhamai likhei nou sheeyu touso nasü toua bailai, kukhe mai moa napao vei kilai mai talinoua sheeyu touso nasü toulai moe. 11Ana napao vei qila maitao, pousha nou hülouyu moa puhvei ki hinou na louyu qila maitao louzü napao nou ngaolouyu touso sü toua bailai. 12Napao vei nah naotupai nou napao soumoyu vakou maiki veta louzü sheeyu touso nasü toulou shi-e. 13Ana mimeapfü souta louzü moa nahmai lia ha-a reikhaive puh puo ki hinou bulouzü, puh puo nou napao soua ngaolouyu touso nasü toua bailai. Napao vei kihikhamai likhei nou sheeyu touso nasü toua bailai.
14“Hakinou mai talinou sümoa sheeyu napao vei kihikhamai vei touso hai touloure toulouzü, puhnou napaoye sü zha kaih hinou zha kai lihai thoupuloua zho peilai. 15-16Napao maitao nou posheela peikhai touyu sheeyu touso hai mai tarasoua panou touloua sünasü souzhaiwulai moe; haibüa soulouzü mai süna hi mah ae veahoyu sü pove loua bailai. E hai Mapao-e, ae posheela khaitouyu taosü Enou soushee peiwure.”
17-18 Mapao nou chikha haitao hai Aaron hi, puhvei nahmaitao hi, ae Israel mai hrülai hi paopeio tea Moses hi paopeie. Israel mai talinou moa puletaoye koa hrüzho-a buyu vakou mai talinou meidei-a posheela peiyu hai puhnou peilai tea chaachou soukhai toua peilouzü moyuma puhnou lah peinüa posheela peilouzü, kikhaorü sünasü chaa hayu noulai. 19Puhvei posheela peiyu nasü panou popeilai toulouzü süsü chode moa zhaotsü, moa nghitsü nou posheela peilai. 20Hakinou neletao nou chaa taoyu kikhaorü nou posheela peilouzü, süsü Mapao nou popeilai moe. 21Mai talinoua Mapao hi chavei lathao-a hrüloure vei posheela hai peilai tea apaokhai toua peilouzü, moa puhnou peinüa peilouzü, chaa hayu kikhaorü nou pa popei loure donou posheela peio. 22Mai taralia Mapao hi nghithou chayu moa phibah shiyu kikhaorü nou posheela peilai moe. Sübüyu kikhaorü tyahai thoudzü vei posheela soua posheelabu hisü posheela peilai moe. 23Neletao nou phibah veimoyu moa taidzüyu kikhaorü hai peinüa posheela peiyu hio peia bailai, ana chaachou soukhai toua posheela peilouzü, sübüyu kikhaorü hai polai moe. 24Neletao nou dzütou khaitouyu, moa dzüthou dapho khaitouyu, moa vade khaitouyu kikhaorü hai Mapao hi posheela peilai moe. Haibüyu tyahai neletao vei teidei hinou aetou moe.
25Vakou mai hinou hülouyu kikhaorü nou poa thoudzü vei posheela hai peilai moe. Sübüyu kikhaorü hai shee moe tea powe, südonou posheela sükhesü popeilai moe.
26-27Chokü, moa zhaotu moa nghitu nou toutu tou louzü, toutu hai teithe anai koute küye koa panou bulai, ana süthai louzü thoudzü vei posheela soua posheela peia bailai. 28Neletao nou choküa moa zhaotu küa moyuma nghitu kü ae toutu ahai koa teithe ali hinou dathalai moe. 29Neletao nou Mapao hi kalo peia posheela peiyu phaki, süsü panou popei loure donou zhai thaifüa soulo, 30ae soutao hai zhou nou toukhai toulo, thainesho donou halia shokhaiso.
31 Mapao nou paoe, “Avei chikhatao sü zülo, E hai Mapao-e. 32Neletao nou avei sheeyu zhih sü souzhai laimoe, Israel mai hrülai nou E hai sheewe touyu sü sülo. Neletaoye soushee peiyu Mapao nasü E baie; 33ae neletao vei Ramai soure donou Enou neletaoye sü Ejipt teidei hinou sapapei khaitoue. E hai Mapao-e.”
Currently Selected:
LEVIMAI LARÜBVÜ 22: POUMBSI
Highlight
Share
Compare
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.