MATHIU 21
21
Jisu nou Kolouyu vei Asah hinou Jerusalem hi Talouyu
(Mk 11.1-11; Lk 19.28-40; Jn 12.12-19)
1Alia Jisu ea puh rozümai taonou Jerusalem hi takou ngheiyu kisü Oliv deichi hi buyu Bethphage nuhduhi tave loure. Sühinou Jisu nou rai-a rozümai ahaiye seitare, 2alia puhaihi haibüa paopeie, “Nehai nghojühi buyu nuh nahi takouwo, alia thala-a nehainou rheisüh küliye puh toutuye koa khikhai touyu sü ngaolai; sühaiye rai pheipa loua Ahi süthai vepeio. 3Alia maitalinou nehaihi hatali chi paolouzü puh hi, ‘Mapaowo nou haihaisü moshi laiyu bue;’ tea paokhaio; alia sübühinou puhnou sühaisü seive peilai.”
4Haihai rachi paolawo nanou paopayu nasü panou vetere donou haibüa paloure, süolouzü:
5“Zion nah naotupai hi paokhaio,
zhukhaio, nevei veo sü nehi tavewe!
Puhwo nataiwe ea rheisüh ali pfüwe alia rheisüh süsü toutoue.”
6Südonou rozümai sühainou taho Jisu nou puhaihi paopeiyu büa soure. 7Puhainou rheisüh kü ea toutunaye süveloua sühai phao vahi puletao vei sahbanou khupeire, alia Jisu nou pa buloure. 8Maikhemai poulonou puletao vei sahbanou luduhi khupeie ea kukhetaonou süübe vanou süübotao saoloua sütaonou ludu hi khupeie. 9Alia Jisu thai-jü hinou ta-a buyu maisou taonou shusoua raoe, “David Nahpoutu hisü Hosana! Mapaowo zhih hinou velouyu puh hai rakoveie. Aku kulaiwo hisü Hosana!”
10Alia Jisu nou Jerusalem hi talouyu kisü, nuhdu hi buyu mai hrülaisü bvüroloua haibüa noue, “Puh hai thaoh-e?”
11Maisoutao nou chila peie, “Puh hai Galilee hi Nazareth hinou veyu rachi paolawo Jisu süe.”
Jisu nou Rathoki Sousheeyu
(Mk 11.15-19; Lk 19.45-48; Jn 2.13-22)
12Alia Jisu nou Rathoki hi talouloua sühinou na zho-a ea hrüa bumai hrülaiye hutare. Puhnou shano leayumai taovei arübuh tao ea rahou zhoyu maitao vei buhnaa taosü popeishou laire, 13alia puhnou puletao hi paoe, “Haibüa rükhaitoue, ‘Akihai veachipao ki tea kulai.’ Ana neletao nou haihai maivei shaotoumai tutsübuh souloure!”
14Nghichamai ea shovai maitao nou puh hi taveloua rathoki hinou puhnou puletaoye souvei peie. 15Ana napao adumaitao ea razhai dou-apeimai taonou puhnou khupa vahtao souyu ngaoloua ea nahmaitao nou rathoki hinou, “Hosana David Nahpoutu hisü!” tea shayu pai chouloua rarousho loure. 16Südonou puletao nou Jisu hi noue, “Puletao nou paoa buyu ne chouchoumoe?”
Jisu nou puletao hi chila peie, “Ovai, choue; neletao nou haibüa phoukhai mohiwu, ‘Nenou nahmaitao ea nahpumaitao mü hinou paoshoyu hai southou liche peiwure.’”
17Alia Jisu nou puletaoye thaowu-a tare ea nuhduna hinou tapaloua Bethani hi tare ea süzhou kheisü sühinou ve naie.
Jisu nou Doushibeye Chapeiyu
(Mk 11.12-14,20-24)
18Thainaisho shonahi puhnou nuhduhi dakhai kouyu kisü, puh sü houloure. 19Alia puhnou dupe hinou doushi beli ngaoloua sühi takoue, ana süva hisü sünghou baideinou halia ngaolou moe. Südonou puhnou süübe nahi paoe, “Nehinou shi lia shipu khaiso!” Alia sübü hinou doushi be nasü kirüh tare.
20Rozümai taonou süsü ngaolouyu kisü khupa loua paoe, “Kabüa doushi be nasü thala-a kirüh taresa?”
21Jisu nou puletao hi chila peie, “Chekhaoa Enou neletao hi paoe, süolouzü neletao nou lüloua lekikhai molouzü, neletao nou Enou doushi bevahi soukhai touyu süna likheithe soubaimoa, deichi haina hai, ‘Mipoa zaihi zhaolouwo,’ tea paolouzü süsü souloulai. 22Alia neletao nou louche-a bulouzü, neletao nou veachi pao-a khoyu talihai ngaoloulai.”
Jisu vei Soulousü Züna vanou Chinouyu
(Mk 11.27-33; Lk 20.1-8)
23Alia puhnou rathokihi tave louyu kisü, napao adumaitao ea tsükhemai taonou puhnou doupeia bubukinou puh hi taveloua noue, “Vah haitao souyu nevei zü daibue? Thaohnou nehi zü haina hai peie?”
24Jisu nou puletao hi chila peie, “E-a neletao hi chili noulai, alia neletao nou Ahi chila peilouzü, E-a neletao hi vah haitao souyu Azü dai bue touyu paongaolai. 25Johan vei dzükhao dayuhai daikinou ve-e? Sünahai rakinou veho, mai hinou ve-e?”
Alia lah puletao hronou veiva-a paoe, “Eletao nou ‘Rakinou ve’ tea chila peilouzü, puhnou ‘Sükulouzü neletao daidonou puhye louche moe?’ tea Eletao hi paokhailai. 26Ana Eletao nou, ‘Mai hinou ve’ tea paokhai louzü, Eletao sü maisouye ngaopeie; daiolouzü mai hrülainou Johanye nou rachi paolamai alie tea powe.” 27Südonou puletao nou Jisu hi chila peie, “Eletaowo sümoe.”
Alia puhnou puletao hi paoe, “Sükulouzü E-a neletao hi vah haitaohai dai zü bua Enou sousa touyu hai paongao laimoe.
Nahpoutu Ahaivei Nada
28“Chuo neletao nou dai chowe? Teile lihi mai alivei nahpoutumai ahai bue; alia puhnou tsünahi taveloua paoe, ‘Anahpoutu, zhou darkha kipei hi taho vah souwo!’ 29Alia puhnou chila peie, ‘E talaimoe,’ ana thaikhai hinou puhnou ledaloua tare. 30Süthaisü puonou napuhi taveloua sükheihao-a paokhaie; alia puhnou chila peie, ‘Puo, E talai,’ ana puhsü tamoe. 31Puhai hi kananou puh puo vei leli soue?”
Puletao nou chila peie, “Tsüna noue.”
Südonou Jisu nou puletao hi paoe, “Chechenou Enou neletao hi paowe, neletaojü rai-a kikha khamai ea khakhamai taonou Ramai Vedeihi vetare, 32daiolouzü Johan Baptist nou neletaoye acheche ludu ngaopeia neletao hi tave, alia neletao nou puhye louche peibae; ana kikha khamaitao ea khakha maitao nou puhye loucheloue; alia neletao nou süsü ngaoyuma neletaosü thaikhai hi-a le daloua puhye louche peimoe.
Darkha Kipei Khoyumaitao vanou Nada
(Mk 12.1-12; Lk 20.9-19)
33“Nada kukheli keikhaio. Teile alihi darkha kipei ali koyu ki paopumai ali bue, alia süna pehao hisü bokhanou khahaore, alia sühisü darkha dzü sühre donou deibvüli raokhaire, alia reihkhaobuh ali soukhaire, alia sünasü panou kipei khomaitaoye souloua teidei akuhi vetare. 34Darkha rashi haiyu teile veyu kisü, puhnou puh kilaimai taoye puhvei zha poloure donou kipei khomai taohi seive. 35Kipei khomai taonou puhvei kilai taoye niloua aliye dapeire, kukhe aliye southeare, alia kukhe aliye chuhnou deipeire. 36Süthai-a raikivei jünou koua puhnou kukhe kilaimaitaoye seive; alia kipei khomai taonou puletao hi-a raiki vei büa soupeire. 37Akhai khailai hinou puhnou puh nahpoutuye puletao hi haibüa paoa seive, ‘Puletao nou Ana poutuye tsükhou peishulai.’ 38Ana kipei khomai taonou nahpoutu sünaye ngaolouyu kisü, lah puletao hronou haibüa paoe, ‘Haihai paopuwo nahpoutue; tavelo, Eletao nou puhye southeawu laikhe, alia puhvei kinitao hai Eletao nou ngaoloulai!’ 39Südonou puletao nou puhye sü niloure, alia puhye darkha kipei vakouhi süthaipaloua southeawure.
40“Chuo, darkha kipei paopuwo nou veyu kisü, puhnou kipei khomai taohi dai soulai?”
41Puletao nou puh hi chila peie, “Puhnou veimosoua maishi sütaoye southealai, alia darkha kipei nasü darkha cha chiyuki puhvei zha peilaiyu kukhe kipei khomai taohi souwulai.”
42Jisu nou puletao hi paoe, “Neletao nou sheeyu larübvütao hinou haibüa paoyu hai phoukhai mohiwu?
‘Ki souyu mainou lulaiyu chuh nasü kukhe veishi jünou matsüyu ki kainghouvei chuhna souloure.
Haisü Mapaowo vei bahsha baie;
ea haihai Eletao nghojünou khupa shoe.’
43“Südonou Enou neletao hi paowe, Ramai Vedeihai neletao hinou potawulai ea sünavei rashi panou shilaiyu tahrüh kukhe lihi peiwulai. 44(Alia maita linou chuh haina phaonou dulouzü puhsü zhusasawulai; ana chuh sünanou maitali pei hi dekou louzü, sünanou puhye reisasawulai.”)
45Napao adumaitao ea Pharisee maitao nou Jisu vei nadatao choulouyu kisü, puhnou puletao vanou paobaie touyu hai süloure, 46südonou puletao nou puhye niloure donou te-e. Ana puletao nou maisouye piloure, daiolouzü maikhe mainou puhye hai rachi paolamai alie tea powe.
Currently Selected:
MATHIU 21: POUMBSI
Highlight
Share
Compare
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
