MATHIU 22
22
Sheenghiyu vei Tovai vanou Nada
(Lk 14.15-24)
1Süthaia Jisu nou nada nou pao-a maikhemai hi haibüa paoe, 2“Raki Vedeihai vemai alinou puh nahpoutu sheeyuki tovai peiyu sünaye pao nadalou veie. 3Puhnou rai-a sheenghiyu vaibuh hi kukhai touyu shemaitaoye kuloure donou puh kilaitaoye seitae, ana puletao nou venükhai more. 4Süthaia puhnou shemaitaoye donou kilai kukhetaoye haibüa paoa seitae, ‘Raia kukhai touyu puletao hisü paokhaio, zhukhaio, Avei tovai nasü souda chewure, Achodetao ea hrü veiyu chotou taosü datheare, alia ha teitei souda chekhaire; sheenghiyu nühbuh hisü taveo!’ 5Ana raia kukhaitouyu shemaitao nou li lapa loure ea lah kuku vah hi tare; alinou puh douhi tare, kukhe alinou puh vei hubuh hi tare, 6kukhemai taonou puh kilaitaoye niloua dapeire ea southeare. 7Veosü lekhasho loure, alia südonou puhnou puh reihmai taoye seiho maiye southeayu taoye southeare ea puletao vei nuhdu nasü meinou deilaire. 8Süthaisü puhnou puh kilaimaitaoye kuloua puletao hi paoe, ‘Avei sheenghiyu tovai sü souda chere, ana raia kukhai touyu maitao hai sühi vezü more, 9südonou chuo neletao nou luducho liki taho maingaodao veishiye sheenghiyu vaibuh hi kuvekhaio.’ 10Südonou kilai maitao nou duvahi taholoua puletao nou ngaodao mai hrülai süolouzü maivei maishi pfüphou kheihaoa kusave dzüloure; alia sheenghiyu buh sü shemainou tave phoupei loure.
11“Ana Veonou tave loua shemaitaoye zhuyu phakisü, mai alisü sheenghiyu sabanüh banoumoa sühinou buyu ngaoloure; 12Südonou puhnou puh hi paoe, ‘Asana, ne sheenghiyu sabanüh banoumoa kabüa haihi velouloue?’ Alia mai sünasü chilia paomore. 13Süthaisü Veonou kilaimai taohi paoe, ‘Puh phibah phulo, alia puhye vakou maiyu buh hi polai pawo. Sühinou puh sü kralai ea puh hu veikükülai.’”
14Alia Jisu nou khaisoua paoe, “Mai alaoye kue, ana mai daotua doloubaie.”
Kikha Peiyu vanou Chinouyu
(Mk 12.13-17; Lk 20.20-26)
15Süthaisü Phariseemai taonou taho kabüa Jisu vei chipao hinou puh mah phoupalou laisa tea khailoure, 16süthaisü puletao nou puletao vei rozümai kamai ea Herod mai kamaiye koa puh hi seive, alia puletao nou paoe, “Dou-apeio, nehai chechechi paowe ea nenou Ramai ludu hai cheche hinou doupeiwe touyu ea nenou maitali donou domoe touyu hai Ehnou süwe; daiolouzü newo maipah zhumoe. 17Südonou nenou choyu nasü Eh hi paongaokhaio. Kaisar hi kikha peiyu hai razhai thaifüa ae touho mo touwe?”
18Ana Jisu nou puletao vei do ashi nasü süloua paoe, “Aveikho soumaitao! Daisoua Azhai zhuwe? 19Kikha peire husha nasü Ahi pongaokhaio!”
Südonou puletao nou puh hi husha nasü pove, 20alia puhnou puletao hi noue, “Haihai thaohvei zhue ea thaohzhih rüthou khaitoue?”
21Puletao nou chila peie, “Kaisar veie.”
Südonou Jisu nou puletao hi paoe, “Sükulouzü veire, Kaisar vei taosü Kaisar hi peio, alia Ramai vei taosü Ramai hi peio.”
22Puletao nou süsü choulouyu kisü, khupa loure alia puletao nou puhye thaowu-a tare.
Hrishuyu vanou Chinouyu
(Mk 12.18-27; Lk 20.27-40)
23Teithe süzhou hrishuyu hae tea paoyu Sadukimai taonou puh hi tave; alia puh hinou chili noue, 24“Dou-apeio, Moses nou paoe, ‘Maita linou tou-nah ha-a thaita louzü puh thaihounou maisüna chapfüye nayu chie, alia sübüa nahmai panou hrüloua puhye sü thaitayu mai sünavei tou-nah tea polai.’ 25Chuo buh haihinou hrüa buyu chinamai anai bue, tsükhana sü nashee loure ea nahmai ali-a ha-a thaire, südonou puh chapfüye sü puh thaihou hi thaodai peire. 26Sübüa ahai chena hia, asü chena hia ea anai chenahi koute sü kheihao loure. 27Puletao hrülai akhai hisü, naotupai-a thaire. 28Chuo hrishuyu teithe kisü naotupai sünasü thao chapfü soulai? Daiolouzü puletao hrülainou puhye nakhaitoue.”
29Ana Jisu nou puletao hi chila pei, “Neletao hai mahshore, daiolouzü neletao nou sheeyu larübvütao moa Ramai vei khouko alia sümoe. 30Daiolouzü hrishuyu kisü puletaosü sheenghi laimoe, ana rakivamai bübailai. 31Alia thaimainou hrishuyu vanou Ramai nou haibüa paokhai touyu neletao nou phoukhai mohiwu? 32‘E hai Abraham, Isak ea Jakob vei Ramaie,’ Puh sü thaimai Ramai moe, ana ahrimai veie.”
33Maisounou chipao süsü choulouyu kisü, puhvei doupeiyu hinou puletao sü khupasho loure.
Chikha Aduna
(Mk 12.28-34; Lk 10.25-28)
34Ana Jisu nou Sadukimai taoye paoposhu chila souhare touyu sü Phariseemai taonou choulouyu kisü puletao sü tave dzüloure. 35Alia puletao hrohinou Razhai dou-apeimai alinou Jisu zhai zhure donou puh hi chili noue. 36“Dou-apeio, Razhai hrohinou chikha kananou dukae?”
37Jisu nou puh hi chila peie, “‘Nenou Mapao ne Ramaiye nele teiteinou, ne rako teiteinou, alia netsü teiteinou leshilai,’ 38Hainanou dudulai ea raikaiyu chikhae. 39Alia matsü kayu chikha ahai chenasü haikue: ‘Nenou ne kinapaye lah neye leshiyu büa leshilai.’ 40Chikha haina hai hinou Moses vei Razhai teitei ea rachi paolamaitao vei doupeiyu teitei vüa bue.”
Khrista vanou Chi nouyu
(Mk 12.35-37; Lk 20.41-44)
41Chuo Pharisee maitao nou vedzüa buyu phakisü, Jisu nou puletao hi chili noue, 42“Khrista vanou neletao dai chowe? Puh hai thaohnahpoutue?”
Puletao nou puh hi paoe, “David Nahpoutue.”
43Jisu nou puletao hi paoe, “Sükulouzü kabüa Rakonou süpeia David nou puhye ‘Mapao’ tea kuwe? Süolouzü,
44‘Mapao nou A Mapao hi paoe:
Enou ne ngaoba maitaoye sü pove ne phihea soupeimo sasü,
Abahkha zhoulo hinou bulo.’
45Sübüa David nou puhye sü ‘Mapao’ tea kukhai louzü,
kabüa puhsü David Nahpoutu khailai?”
46Alia mailinoua Jisu hi chila ali koutea peilou hore, alia teithe süzhou thainou maili koutea khuveia puh hi chilia noupukhai more.
Currently Selected:
MATHIU 22: POUMBSI
Highlight
Share
Compare
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
