MIKAH 5
5
1Jerusalem hi maitaore, neletao vei reihmaitao sü soudalo.#5.1 Hai nanou kaoyu Jerusalem...reihmaitao sü soudalo!; Hebrew hi sheesha moe. Etaoye mainou haoloure! Puletao nou Israel maivei peikho maitaoye sü dulai!
Ramai nou Bethlehem hinou Israel Maiye Süthai-apeio Peilai tea Paohpeiyu
2 Mapao nou paoe, “Oh Bethlehem Ephrathah, ne hai Judah hinou taikayu nuh ali baie, ana ne vanou Enou Israel maiye khopeire mai ali vepeilai, puhvei kikhamai hai daoh puopaoh maivei khaphao hinou vewe.”
3Südonou naotupai nou nah navere teile hi koumo koute sü Mapao nou puhvei maiye sü ngaobayu maitao bah hi thoupeiwulai. Süthai sünou vakou nou hrüa buyu Israel maitao hai lah puletao vei thaihou jürai sü phouloua tave zholoulai. 4Puh velouzü, puhnou puhvei maitaoye sü Mapao vei khouko sünou khasa-a hrülai, ae puhvei Ramai Mapao zhih hinou kaozü soua kiko peilai. Puhvei maitao nou kaozhou ashi lia ha-a hrülai, daiolouzü teideiphao teitei nou puhvei aduso nasü süloulai, 5ae puhnou kaonayu nasü pove peilai.
Khailupa peiyu ae Tudee peiyu
Assaria mainou Etao vei teidei hi soureih hulou Etao vei reihkhaobuh hai souphe soupho louzü, Etao vei khoukayu süthai-apei maitaoye sü panou puletaoye dulai. 6Puletao nou Assaria maivei teidei sü khoche nou poa veiloulai ae Nimrod teidei sü khoche nou zhapoa khaloulai. Puletao nou Etao vei teidei hi reih hulouyu phaki, puletao nou Etaoye Assaria mai hinou khailupa peilai.
7Shokhai toua buyu Israel maitao hai tyahrütao hrohinou Mapao nou seive peiyu vidzü ae teirü kou shopeiyu pounghou bülai. Puletao nou Ramai ye louche-a bailai, maiye louchepu khailai moe. 8Shokhai toua buyu Israel maitao sü soukhaonatao hrohinou souveo ali bülai: zhaotu hrohinou talou nülouyu nasü paide sasa peiyu bülai— ae halinoua khailupa peilou hoyu bülai. 9Israel mai nou ngaobayu maitao jünou veiloulai ae puletaoye sü souhakhai toulai.
10 Mapao nou paoe, “Süzhou teithe Enou neletao vei rhei ae rheiluki khesü potawulai. 11Enou neletao vei teidei hi nuhdu khesü souhawulai, ae reihkhaobu khesü souphe soupholaiwulai. 12Enou neletao vei teingumai sü souhawulai ae panou neletao hisü keingumai bupulai moe. 13Enou neletao vei bashara ae chuh shokhai touyu khesü soushilai; neletaoye panou neletao lah soukhai touyu na khesü thopulai moe. 14Neletao vei teidei hi buyu Asherah rapfüpai vei zhurai soukhai touyu khesü Enou souhawulai. 15Alia avei lekha rarou hinou achi zübayu tyahrü teitei hisü Enou khüngu phouwulai.”
Currently Selected:
MIKAH 5: POUMBSI
Highlight
Share
Compare
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.