MIKAH 6
6
Israel Mai hi Mapao nou Chikuyu
1 Mapao nou Israel mai hi chikuyu sü keilo.
Oh Mapao, tashuloua nou nenou paolaiyu chi sü paopei khaio; deichi deirao khesü panou ne chi sü kei khaio.
2Deichi taore, Mapao nou paodouyu chi sü keikhaio! Mapao nou puhvei maitao hi chikure sü bure, puhnou Israel mai pei hi züvei-a mah paodure sü bure.
3 Mapao nou paoe, “Oh avei maitaore, Enou neletao hi daisou peire? Enou neletaoye kabüa souveayu sü buge? Eye chila peio! 4Enou neletaoye sü Ejipt teidei hinou sapa peie; Enou neletaoye maivei qila soua buyu hinou vupa peie; Enou neletaoye panou süthaisa-a tapeire donou Moses, Aaron ae Mariam ye seive peie. 5Oh avei maitaore, Moab hi Veo Balak nou neletao hi shodo ashi soupeilai tea tsüchoda-a buyu ae Beor nahpoutu Balaam nou puh hi chila peiyu sü lichokhaio. Akasia fühao hinou Gilgal hi kouyu phaki daidai vepa-e touyu khesü lichokhaio. Hai khesü licho louyu phaki neletaoye Mapao nou khailupa peire donou soua baie touyu hai neletao nou süloulai.”
Mapao nou Jüpayu
6Enou rakiva buyu Ramai tholai tea taveyu phaki Mapao ye dai nou pove peilai? Enou meidei-a posheela peire donou veikayu chotoutu nou puh hi pove peilaiho? 7Zhaotu thethe nou Mapao hi pove peilouzü, moyuma oliv theadzü nou reidzü küyu büa pove peilouzü puhnou jüpalai mosa? Enou soumah khaitouyu donou avei nah naraio sü puh hi posheela peilaiho? 8Moe, Mapao nou Etao hisü kabüyu paityanou veiwe touyu sü paopeiwure. Mapao nou Etao hinou jüpayu louzü: kaozü souyu, tobai soumoa leshiyu nasü soungao peiyu, ae tainoutou soua Etao Ramai ye koa hrüyu hai nou jüpa-a baie.
9 Mapao ye piyu sü tsüvei-e. Puhnou nuhdu nasü kue, “Nuhdu hinou tave jüa buyu maitaore, keinoulo! 10Mai ashimai ki hisü tsüle sheemoyu hinou nangi khesü pojü khaitoue. Puletao nou da-a nou sühdoukhao sü powe, süsü Enou ngaora-e. 11Kaomoyu sühdoukhao ae dourai poyu maitaoye sü kabüa Enou puletao vei mah sü khaipei khailaige? 12Neletao vei toungiyu maitao hai zhaipou shi-e, ae neletao mai hrülai nou dahrührüa baie. 13Südonou Enou neletaoye soushi talaire, ae neletao vei mah vanou neletaoye sü panou haka talaire. 14Neletao nou toulai, ana rukhalai moe — neletao hai houzüa bukoute-a bailai. Neletao nou nakhesü poa talai, ana sükhesü pojü khailoulai moe; neletao nou hana taralia pokhai touyu khesü Enou soureih souyu hinou pa soushi souhawu bailai. 15Neletao nou taimou hai thoulai, ana chachi loulai moe; neletao nou theadzü sü souloulai, ana neletao vei soulai moe. Neletao nou darkha zhaoh sü southoulai, ana neletao nou kelai moe. 16Daiolouzü neletao nou Veo Omri ae puh nahpoutu Ahab kihikha mainou vah ashi souyu sü thaifüa soutare. Neletao nou puletao vei zhaihrü ashi nasü soupfü tare, südonou Enou neletao hisü hakatayu sü pove peilai, ae mai hrülai nou neletao ye sü ngaoralai.”
Currently Selected:
MIKAH 6: POUMBSI
Highlight
Share
Compare
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.