MAIPEI PHOUYU 11
11
Taberah tea Kuyu Buh
1Maikhe mainou veahoyu sü ve daokhai-e, puletao nou veahoa Mapao pei hi raore. Mapao nou sükhesü chouloua rarou shore ae puhnou maikhe mai hi mei sü seive peie ae mei nou puletao vei fühao kainghou alilova hai deihawure. 2Maikhe mainou kra-a Moses hinou soukha sü kho-e ae puhnou Mapao hi veachi paoa khoyu donou mei sü nghitare. 3Südonou buh sünasü Taberah (Mei taoyu) tea kuwe, daiolouzü buh sühinou Mapao vei mei nou puletao hrohinou taopare.
Moses nou Süthai-apeimai Rainai Dolouyu
4Shetumai kamai-a nou Israel maiye koa nou tawe, puletao nou sou hai tounü sholoure alia Israel mai-a haibüa nou noulealea loure, “Sou tounü lere.” 5Etao nou Ejipt hio halia phamoa kha hai tounü toua baiwe. Mata, hao, shaoro, khimairei ae shinamara khesü licho khaio? 6Ana chuo Etao vei khouko hai hazhi toure. Toure halia hazhi toure— halia toure hazhi toure, ana teithechü hai manna likhei nou toua baire.
7(Manna hai marashithou raiwe, ae kaathou vavawe. 8-9Haina hai khei teile hinou vidzü sa-a kouwe. Thainesho shona hai maikhe mainou kolouwe, ae deithou sou büa souloua nou khotouwe alia raokhao khaotouwe. Haina hai oliv theadzü nou koa raokhao soukhai touyu büa touvei-e.)
10Puletao vei ki veishi hinou maikhe mainou vamoa nolealeayu sü Moses nou chouloure. Puh hai vamore, daiolouzü Mapao nou puletao hi rarou loure, 11ae puhnou Mapao hi paoe, “Ne kilai Eye daisounou haibüa souveawe? Ne daisounou Eye dzüphiwe? Ne daisounou mai haitao hrülaiye zhure vah sü ahi peiwe? 12Enou mai haitao sü soupei moe, moa nalou moe. Ana daisounou mai haitaoye nenou peilai tea puletao vei puopaoh hi paopei khaitouyu teidei hi Eye panou nah naonaoyu pfü ali büa Eye panou bah hinou daopfü poa tawo touvu? 13Mai haitao nou toulou süyu sou sü E daikinou ngaoloulai? Puletao nou tobai soumoa sou peio tea ahinou kho-a bure. 14E lah likhei mai haitaoye zhulou hore, haisü Eye donou pfülou hore. 15Nenou Eye haibüa soupeilai toulouzü, zhuvea-a Eye southa peio, sükulouzü nevei zhai ashi nasü Enou ngaopu moa thai-a bailai.”
16 Mapao nou Moses hi paoe, “Israel mai hrohinou tsümai, süthai-apei mai rainai hai Enou buyu Sahpao hisü kupove jülo ae puletaoye ne pe hinou lalo tea paopeio. 17Enou buh sühinou neye takou kealai, ae Enou neye peikhai touyu rako daotu hai ne hinou popaloua puletao hisü peilai. Süthaisü mai sütao nou maikhe maiye zhure vah khesü neye soukha peilai ae ne likhei koupo nasü pfüpulai moe. 18Chuo maikhe mai hi haibüa paopeio, ‘Dosho neletao nou sou sü toulaire, südonou neletao hai lahkuku soushee-a bulo. Neletao nou nolealeayu, sou tounüwe tea raoyu ae Ejipt hinou buyua veipure tea raoyu sü Mapao nou chouloure. Chuo Mapao nou neletaoye sü sou peilaire, ae neletao nou sou sü toulaire. 19Neletao nou sou sü teithe ali, moa ahai, moa teithe angou moa teithe kirou, moyuma teithe kai likhei toua bailai moe, 20ana khouh sasasü neletaoye panou mü hi khetemo koute hai sou sü panou toulai. Daiolouzü neletao nou Mapao ye sü malaiwure ae Ejipt teidei hinou buyu nanou veipu hia tea raode.’ ”
21Moses nou Mapao hi paoe, “Enou salaiyu mai hai 600,000 bue ae kabüa nenou puletaoye khouh ali koute hai toulou süyu sou sü peilai touwe? 22Puletao nou khalou süyu kikhaorü ae zhaotu khesü daikinou poloua datha peilai? Zai hi kha veishi hai hüloua peiyuma puletaoye donou khalou süvu?”
23 Mapao nou chila peie, “Eye donou dai-e soulou hoyu bue? Enou paoyu avei chipao hai vete laiho vetelai moyu sü nenou thasho-a nou ngaolai!”
24Südonou Moses nou vakou tapaloua Mapao nou paoyu khesü maikhe mai hi paopeie. Puhnou süthai-apei mai rainai hai save jüloure ae Sahpao sü panou sühao loure. 25Süthaisü Mapao nou teihao hinou takouloua Moses ye cha-e. Puhnou Moses hi peikhai touyu rako chitya hai poloua süthai-apei mai rainai hisü peie. Rako sünou puletao hi velouyu phaki, puletao hai rachipaola peiyu mai büa raopare, ana teile sho-a nou puletao hisü bumoe.
26Süthai-apei mai rainai hinou mai ahai, Eldad ae Medad hai Sahpao hisü velou moa fühao hinou bue. Puhai hisü rako sünou veloure ae puhai hai rachipaola peiyu mai büa raopare. 27Nahlemai ali nou tuho Moses hisü Eldad ae Medad nou soua buyu vah haso sü paopeie.
28Süthaisü nahle-a bukinou Moses ye soukha-apeio, Nun nahpoutu Joshua nou Moses hi paoe, “Apaopuwo, puhaiye sü panou paopu khaiso!”
29Moses nou chila peie, “Ne Eye donou puhaiye ngaoraivu? Mapao nou puhvei rako hai puhvei mai hrülai hi thoupeiwua puletao hai rachipaola peiyu mai büa buyu sü Enou jüpa-e!” 30Süthaisü Moses alia Israel maivei süthai-apei mai rainaitao hai lah puletao vei fühao hisü vetare.
Mapao nou Rehou Seive Peiyu
31Teile sübü hinou Mapao nou teikhai sü seive panou zai hinou buyu rehou khesü hüpoa vepeie. Rehou taonou deiphi nghinono poa nou zhaopoa nou ve fühao hi ae fühao kainghou teitei hisü kilomitar ali la-a phoutao loure. 32Südonou maikhe mai hai hea-khei soumoa nou rehou hai da-a nüa nou bure; mai ali nou pojü louyu hai sühcho theli khe loumoa pojüloue. Puletao vei fühao pe teitei hisü puletao nou rehou hai southa loua nou phukire. 33Puletao nou toure sou hai alao soumoa buyu teile hinou Mapao nou lekha loua puletao hisü rahta rahvu hai seive peire. 34Buh süna zhih hai Kibroth Hahaavah (Sünavei qo hai “Tounü Sonüyu vei Khüh”) tea sapeie, daiolouzü sou tounüa thaiyu maitao vei thaiphao hai buh sühinou vupeie.
35Buh sühinou maikhe mainou Hazeroth touyu buh hisü ho fühao soua bue.
Currently Selected:
MAIPEI PHOUYU 11: POUMBSI
Highlight
Share
Compare
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.