MAIPEI PHOUYU 15
15
Posheela Peiyu Zhaitao
1-2 Mapao nou Moses hi Israel maitaoye panou puhnou peilaiyu teidei hi velou bulouyu thai naanou soure zhaitao sü haibüa soulo tea paopeie. 3Chode ali, zhaotsü ali, zhaotu ali, moa nghitu ali hai Mapao hi meidei-a posheela peire donou peia bailai, moa chaachou soukhai tou-a vete louyu vei posheela soua moa peinüa peiyu posheela sou-a moa khonüh nüyu phaki posheela peiyu sou-a peia bailai; haibüa posheela peiyu hai Mapao nou jüpawe. 4-5Mai talinoua zhaotu moa nghitu hai Mapao hi meidei-a posheela peilai toulouzü, hrikhaona süna koa nou sou sühcho ali hai oliv theadzü sühchovou ali hai thoudzü vei posheela soua darkhadzü sühchovou ali noupu pove peilai. 6Zhaotsü ali nou poa sheela peilouzü, sou sühcho ahai hai oliv theadzü sühchovou ali-a da hai thouhrüloua thoudzü vei posheela hai peilai. 7Süna koa nou darkhadzü sühchovou dali noupu pove peilai. Haibüa nou posheela peiyu hai Mapao nou jüpa-e. 8Chode nou poa Mapao hi meidei-a posheela peilouzü, moa chaachou soukhai toua posheela peilouzü, moa chavei lathao-a buloure vei posheela soua peilouzü, 9thoudzü vei sheela sou-a sou sühcho asü hai oliv theadzü sühchovou ahai thouhrüloua pove peilai, 10süpei hinou darkhadzü sühchovou ahai noupu peilai. Haibüa posheela peiyu hai Mapao nou jüpawe.
11Neletao nou chode, zhaotsü, zhaotu moa nghitu hai posheela peilouzü hai zhai büa poa sheela peilai. 12Kikhaorü ali jünou la-a posheela peilouzü, hrikhaona ali posheela peiyu phaki posheelana kukhe louyu zhoubüa loupulai. 13Israel mai hrülai nou thoudzü vei posheela peiyu phaki hai zhaibüa soulai ae haibüa posheela peiyu hai Mapao nou jüpa-e. 14Neletao hinou ve teile daotuli donou hrüa buyu vakou mai ali nou moa neletaoye koa nou teisa nou buyu shetumai ali nou posheela hai peilai toulouzü, puh-a neletao bütoua soulai. Süsü Mapao nou jüpa-e. 15Vere teile veishi hinou zhai haitao raibütou-a neletao hia ae vakou mai hia ta-a bailai. Neletao-a ae puhtao-a Mapao vei nghingao hiolouzü raibütoua baie; 16chikha ae zhaitao hai raibütoua neletao hia alia puletao hia ta-a bailai.
17-18 Mapao nou chikha haitao hai Moses hi Israel maitaoye puhnou peilaiyu teidei hi velouyu thai soupfülo tea peie. 19Neletao nou teidei sühi velou loua touso hai ngaotou tare toulouzü, Mapao hi posheela haitao hai pove peio. 20Neletao nou raokhao hai thouthou nou poa raokhao khaolou raikayu nasü Mapao hi posheela peilai. Neletao nou hai nasü chachiyu phaki posheela peiyu bütoua posheela peio. 21Vere teile veishi hi neletao nou raokhao khaolouyu nasü Mapao hi veisho-a nou posheela peio.
22Ana Mapao nou Moses hi peikhai touyu chikhatao hai mai ali nou sümoa soulou more toulouzü, 23ae Mapao nou Moses hi peikhai touyu kharochi hai maisou nou haithai naki sülou moa soumah louzü, 24maisou nou sümoa soumah louzü, neletao nou meidei-a posheela soure donou chode ali hai pove peilai, ae haisü Mapao nou jüpa-e. Hai nasü thoudzü vei posheela ae darkhadzü vei posheela koa nou posheela peilai. Süpei hinou nghitsü ali hai mah vei posheela soua sheela peilai. 25Napao nou maisouye sousheeyu vei naanou hai soupeilai, ae puletaoye sü khaipeilai, daiolouzü puletao nou sümoa soumah loua baie ae puletao nou puletao vei mah posheela hai thoudzü vei posheela soua Mapao hi posheela peilai. 26Israel mai hrülai ae puletaoye koa hrüyu shetumai hrülaiye sü khaipeilai, daiolouzü maisou nou mahyu hisü loukhai toure.
27Mai ali nou sümoa mah hai soulouzü, puhnou soumah khaitouyu vei posheela hai po ali payu nghikü ali hai pove peilai. 28Posheelabu hinou napao nou mai süna vei mah hai soushee peire donou naanou soua soushee peilai ae puhnou puhye sü khaipeilai. 29Zhai hai nasü sümoa soumah khaitouyu Israel mai moa shetumai hrülai hisü raibütoua talai.
30Ana mai talinou süa nou mah soulouzü, puh sü Israel maiyuma moa shetu maiyuma Mapao ye ngaophou moa souyu donou puhye sü southawulai. 31Daiolouzü puhnou Mapao vei chipao hai ngaophou moa puhvei kharochi sü pfüthowure, puhnou lah athai nasü soupfü loua baie.
Soteithe Reimoyu Mai
32Vuli Israel mainou rekounou ta-a buyu teile hinou mai ali hai soteithe zhou nou süü raopfüa nou ngaoloue. 33Puhye sü Moses, Aaron ae maisou hi nüpoa nou ve-e, 34ae puhye sü hukhaki hi thoube khaire, daiolouzü puh hisü kabülai touyu hai sheesha tea nou süloumo hie. 35Süthaisü Mapao nou Moses hi paoe, “Mai sünaye southawo; maisou nou puhye sü fühao vakou sapaloua chuh nou deitha-o.” 36Südonou Mapao nou kharochi peiyu thaifüa puhye sü maisou nou fühao vakou sapaloua chuh nou deithawure.
Sah Leiyu Zhai
37-38 Mapao nou Moses hi haibüa Israel mai hi paopeio tea paoe, “Neletao vei sah kainghou hinou sahbou leilo ae sühisü pha tei-daiyu ali thoulo. Neletao nou haibüa vere teile teitei hinou soulai. 39Neletao nou sah leikhai touyu nasü ngaolouyu chüsü avei kharochi khesü licho loulai ae sükhesü züloulai; sükulouzü neletao nou ahinou tarei talai moe, ae neletao vei kezhe jüpa vah nasü soutalai moe. 40Sah leikhai touyu nanou neletaoye panou avei kharochi teitei hai licho loulai, ae neletao hai avei mai soukoute loulai. 41E hai neletao vei Ramai Mapao-e; Enou neletao vei Ramai soure donou neletaoye Ejipt hinou sapa peikhai toue. E hai Mapao-e.”
Currently Selected:
MAIPEI PHOUYU 15: POUMBSI
Highlight
Share
Compare
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.