MAIPEI PHOUYU 16
16
Korah, Dathan ae Abiram nou Khaityayu
1-2Levi vei khü hinou Kohath vei pfümounah hinou buyu Izhar nahpoutu Korah nou Moses pei hisü khaitya pare. Puhye Reuben khü hinou mai asü— Eliab nahpoutu Dathan ae Abiram, alia Peleth nahpoutu On, ae Israel mai hrohinou matsü shoyu süthai-apei mai 250 louzho loua Moses vei khakhe hi bulai more tea puhye sü dutare. 3Puletao nou Moses ae Aaron nghoujü hinou vejüa buloure ae puhai hisü haibüa paore, “Ne hai lazhu lere! Etao mai hrülai hai Mapao vei baie ae Mapao nou Etao mai hrülai hisü bue. Moses, ne lah daisounou Mapao vei maitao pei hinou aduna soua nou buwe?”
4Moses nou chi haisü choulou khaie, puhsü deiphi hi kaokoulou-a veachi paore. 5Süthaisü puhnou Korah alia puhye thaifüyu maitao hisü paoe, “Dosho shona hai Mapao nou thaonou puhvei mai-e ae thaonou sheewe touyu sü pongao peilai, ae puhnou dolouyu maiye sü panou puh hi nghikoulai. 6-7Dosho shona sü ne alia neye thaifüyu maitaoye panou poukai nüvei deiyu maibvü polo, ae sühisü meithou ae poukai nüvei hai Mapao nghoujü hinou thoulo. Süthaisü Mapao nou thaoye doloure touyu hai Etao nou ngaolai. Levi maitaore, soupfü layu nasü neletao nou baie!”
8Moses nou Korah hi paopue, “Levi maitaore, Enou chi paoyu sü keilo! 9Israel maivei Ramai nou neletaoye souku paloua panou puh nghiki nou buyu ae Israel maisou nghoujü hinou la-a nou vah souyu ae Mapao vei Sahpao hinou kuvah souyu hai neletaoye donou taile revu? 10Mapao nou neletaoye alia Levi mai hrülaiye haibüa tsükhouyu vahbu peie, süpei hinou chuo neletao nou naanou souyu napao maivei vahbu-a poloulai tea tewu? 11Neletao nou Aaron pei hi rao-a khaityayu hai chechevuzü nou ne alia neye thaifüyu maitao nou Mapao pei hi khaitya-a baie.”
12Moses nou maiye seiho Dathan ae Abiramye kue, ana puhai nou paoe, “Ahai-o velai moe! 13Veisho-a buyu Ejipt teidei hinou Etaoye nenou sapa radeiki hai hinou southalai touyu haisü hazho toulia moe tea ne tsüchowu? Chua nenou Etao pei hinou paopu soua Etaoye tukhalaivu? 14Nenou Etaoye sü teidei aveih hi save peimoe, moa Etaoye ki-lu ae darkha kipei khesü peimoe ae chuo nenou Etaoye sü lalai toua soure. Südonou Ewo velai moe!”
15Moses nou rarou loua Mapao hi haibüa paoe, “Mai haitao nou posheela peiyu khesü popeiso. Enou puletao hisü vah mah lia soumoe ae puletao vei rheisü ali koute-a Enou polou moe.”
16Moses nou Korah hi paoe, “Dosho shona ne alia nevei mai 250 sü saloua Mapao nou buyu Sahpao hisü velo, Aaron-a sühisü velai. 17Lahkuku vei poukai nüvei deiyu meibvü sü polo, ae sühisü poukai nüvei noupu thoulo, sübüa posheelabu hinou posheela peilai.” 18Südonou mai hrülai nou poukai nüvei deiyu meibvü poloua sühi poukai nüvei thouloua Sahpao hi taloure bomü hinou Moses ae Aaron ye koa nou bure. 19Süthaisü Korah nou Israel maisouye kuve jüloure, ae puletao nou Sahpao hi taloure bomü hinou Moses ae Aaron hilova rei-a nou buloure. Süteilebü hinou Mapao vei khouko ava nasü mai hrülai hisü ngaopeire, 20ae Mapao nou Moses alia Aaron hi paoe, 21“Mai haitao hinou thaichü talo, Enou puletaoye sü thashoa-a nou souhawulai.”
22Ana Moses ae Aaron nou deiphi pei pfüa nakou loua paoe, “Oh Ramai, ne sü hriyu veishi pei hi Ramai-e, mai ali nou mah soupeikhai-e mai hrülai pei hi ne rarou laivu?” 23Mapao nou Moses hi paoe, 24“Israel maisou hisü Korah, Dathan ae Abiram nou buyu sahpao hinou tavai talo tea paopeio.”
25Süthaisü Moses nou Israel maiye süthai-apei maitaoye saloua Dathan ae Abiram hisü ve-e. 26Puhnou maikhe mai hi paoe, “Mai shiyu hai navei sahpao hinou tavai talo, ae puhvei na haliro deiso, sükulou molouzü puletao vei mahtao koa nou neletao-a souha bailai.” 27Südonou maisoutao nou Korah, Dathan ae Abiram vei sahpao hinou tavai taloure.
Süthaisü Dathan ae Abiram nou puhai vei maipfü ae nahmaitao saloua nou puhai vei sahpao bomü hinou tapa la-a nou bue. 28Süthaisü Moses nou haibüa paoe, “Mapao nou Eye seive haisü soua baie touyu hai neletao nou süloulai ae haisü lah Enou sounüa soumoe. 29Hakinou mai haitao hai Ramai nou tudee peimoa mai büa thai-a bailouzü, Ramai nou Eye seive moe. 30Ana Mapao nou raichoki sükhai toumoyu hali soupeilai, ae dei nou kopaloua puletao vei buyu na veishi nou koa puletaoye zhaoloure toulouzü, ae puletao hai hria nou athai maivei teidei hi hoture toulouzü, Mapao nou mai haitaoye malaiwure touyu hai neletao nou süloulai.”
31Moses nou chi paocheyu thaisü, Dathan ae Abiram nou la-a buyu dei sü kopare, 32ae puletaoye sü zhaoloure alia puletao vei kihikhamai hrülai, Korah vei thaifümai hrülai ae puletao vei natao nou koa dei nou zhaoloure. 33Puletao hai sübüa nou hria puletao vei natao nou koa athai maivei teidei hisü hotare. Süthai hai deisü koumuloua nou puletao hai hatare. 34Sühinou buyu Israel mai hrülai hai puletao nou krayu pai sü choulou khai-e, puletao hai tutare. Puletao nou haibüa shura sou-a nou paoe, “Tutalou khaio, dei nou Etao-a zhaolou shulai!”
35Süthaisü Mapao nou mei seikou poukai nüvei deiyu meibvü poa buyu mai 250 sü deithawure.
Poukai Nüvei Deiyu Meibvü
36Süthaisü Mapao nou Moses hi paoe, 37“Napao Aaron nahpoutu Eleazar panou poukai nüvei deiyu meibvütao hai mei nou deitha khaitouyu maitao hinou polo tea paopeio ae sühi buyu meithou sü vakou popa laiwo, daiolouzü sütao hai sheewe. 38Sütao hai Mapao vei posheelabu hi pokou peiyu phaki, shee-a baie. Südonou poukai nüvei deiyu meibvütao hai puletao vei mah donou meinou deitha khaitouyu maitao hinou polo, sütao hai deithou hukao ali büa poureih toulo ae poa posheelabu hoyu sü soulo. Hai nasü Israel mai soupi peiyu ali soua panou ngao-a bulai.” 39Südonou napao Eleazar nou poukai nüvei deiyu meibvütao sü poloua posheelabu hore donou deithou poureih touloure. 40Hai nanou Israel mai hi, mai taralia Aaron vei tyaosholea moyu mai ali nou Mapao nghoujü nou mei dei-a posheela peilai moe, hakinou puletao nou sübüa soulouzü Korah alia puhvei maitao büa souha bailai touyu vei paopi peiyu ali soua bulai. Mapao nou Moses hinou Eleazar hi kharochi peikhai touyu teitei sü puhnou souche peie.
Aaron nou Maikhe Maiye Khailupa Peiyu
41Thainesho hai Israel maisou nou Moses ae Aaron pei hisü rao-a nou haibüa paoe, “Ne hai nou Mapao vei maiye sü southawure.” 42Maisou nou Moses ae Aaron pei hi vamoa puhaiye dulai tea vejü loure ae puletao nou Sahpao hilova reive zhuyu phaki, teihao nou kou Sahpao nasü jüloure ae Mapao vei khouko ava nasü ngaoloure. 43Moses ae Aaron nou Sahpao nghoujü hisü takou laloure, 44ae Mapao nou Moses hi paoe, 45“Mai haitao hinou tavai talo, buh hai hinou Enou mai haitao sü souhawulai!”
Puhai nou deiphi hi pei pfüa nakou loure, 46ae Moses nou Aaron hi paoe, “Nevei poukai nüvei deiyu meibvü nasü poloua posheelabu hinou meithou thoulo ae poukai nüvei nasü thoudei loura-o, sübüa thashoa nou maisou hrohisü takouloua puletaoye sousheeyu vei naanou soupei khaio, daiolouzü Mapao vei lekha rarou nasü pare, ae maikhe mai hi rahta rahvu sü vere.” 47Moses nou paoyu chi züa Aaron nou puhvei meibvü nasü poloua maisou vejüa buyu hrohisü tukou loure. Puhnou rahta rahvu hai maisou hi veyu sü ngaolou khaie, puhnou poukai nüvei nasü meibvü hi thoudeilou-a maikhe mai vei mahmo soushee loure vei naanou hai soupeie. 48Puhnou haibüa soupei khaie rahta nasü chaore ae puhsü hriyu mai ae thaiyu mai kohinou la-a bure. 49Süzhou teithe mai thaiyu hai mai 14,700 thaire, haisü Korahye koa khaityayu hinou thaiyu maitao phou moe. 50Rahta veyu nahai baiyu thai, Aaron nou Sahpao bomü hi Moses nou buyu hisü dakhai koure.
Currently Selected:
MAIPEI PHOUYU 16: POUMBSI
Highlight
Share
Compare
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.