MAIPEI PHOUYU 18
18
Napao Maitao ae Levi Maitao nou Soure Vah
1 Mapao nou Aaron hi paoe, “Enou buyu Sahpao hi vah soumah louzü, ne alia ne nahpoutu maitao ae Levi maitao nou veahoyu sü ngaolai; ana naanou souyu hinou soumah louzü, ne alia ne nahpoutu maitao likhei veahoyu sü ngao-a bailai. 2Ne alia nevei nahpoutu maitao nou rathoyu Sahpao hinou vah souyu phaki, neletaoye soukha peiloure donou nevei thaihou jürai Levi maitaoye kulo. 3Sahpao hi vah khesü puletao nou neye soukha peilai, ana puletao nou Sahpao hi sheeyu natao moa posheelabu hisü nghikou laimoe, puletao nou hakinou nghikou louzü, puletao alia ne-a koa nou thai-a bailai. 4Puletao nou Sahpao hi vah veishi hai neye babou peia neye soukha peilai; ana mai kukhe ye panou neye koa vah soulai moe. 5Israel maisou hi Mapao vei lekha rarou vemore donou nenou Sahpao hi ae posheelabu hi soure vahtao hai soulai. 6Israel maitao hrohinou nevei kityarai soua buyu Levi maitaoye dokupa peiyu nasü Enou-e. Puletaoye panou avei Sahpao hi kuvah soure donou ahi peithouwure. 7Ana posheelabu hi naanou soure vahtao ae sheeyu buh hi vah soure veishi hai ne alia nevei nahpoutu maitao nou soua bailai, vah sütao hai neletao nou soua bailai, daiolouzü Enou neletaoye napao vahbu nasü thoupeiwure. Mai kukhe mainou sheeyu natao hi nghikou louzü puhye sü southawulai.”
Napao Maitao nou Ngaore Zha
8 Mapao nou Aaron hi paoe, “Israel mainou Eye posheela peiyu teitei hai nenou ngaore zha soua Enou ne hi peiwure, ae hai sü ne ae nevei nahpoutu maitao nou teisa nou ngaolai. 9Sheesha tea nou posheela peiyu, posheelabu hinou meidei moa buyu sütao hai nevei zha-e: thoudzü vei posheela, mah vei posheela ae paoh khapeiyu vei posheela alia hataralia puletao nou shee-a Eye posheela peiyu teitei hai Enou ne hi ae nevei nahpoutu maitao hi peiwure. 10Neletao nou haisü sheeyu buh hinou toua bailai ae süsü naanou hinou shee-a buyu poutumai likhei nou toua bailai.
11“Süpei hinou Israel mainou kalo vei soua Eye posheela peiyu teitei hai neletao vei zha-e. Enou sütao hai ne hi ae nevei nahpoututao ae nahnaotu maitao hi vere teile teitei donou peiwure. Naanou hinou shee-a buyu nevei kihikhamai hrülai nou süsü toua bailai.
12“Israel maitao nou po patsü Eye pove peiyu veikayu theadzü, darkhadzü ae thoudzü khesü Enou ne hi peiwure. 13Sütao teitei hai neletao vei zha-e. Naanou hinou sheeyu nevei kihikhamai hrülai nou sütao sü toua bailai.
14“Israel mainou sheesha tea nou Eye posheela peiyu veishi hai nevei zha soua ne hi peiwure.
15“Israel mainou nah narai moa kikhaorü touraitao hai Eye pove posheela peiyu teitei sü neletao vei-e. Ana puletao nou nah narai naye hüdakhai louyu vei muma hai neletao-a ae-ao soua popeilai, alia naanou hinou sheemoa buyu kikharütao hai panou puletaoye hüdakhai loure vei zü hai puletao hi peilai. 16Maisou nou ta-a buyu zhai thaifüa nahmaitu hai khouh ali palouzü shahu angou peia panou hüdakhai loulai. 17Ana toukou raikayu cho, zhaotu ae nghitu hai panou hüdakhai laimoe; sütao hai avei baie, südonou sütao hai poa sheela-a bailai. Sütao vei souzhe hai posheelabu hi poa napeio ae southeatao hai thoudzü vei soua poa meidei peio, süsü Enou jüpa-e. 18Ana souketao, khaorao ae phikao zhoulova hai neletao vei zha-e.
19“Israel maisou nou Eye veisho-a posheela peiyu teitei hai vere teile veishi donou Enou ne hi ae ne nahmaitao hi peiwure. Enou hai nasü ne hi ae nevei tyaosholea maitao hi pepolou hoyu vei vo ali soua soukhaiwure.”
20 Mapao nou Aaron hi paoe, “Nenou hana taralia kikaa soua thaoloulai moe ae Israel maiye koa teidei sü zha zhilai moe. Mapao Eye likhei nevei zha sü soua bailai.”
Levi Maitao nou Ngaore Zha
21 Mapao nou paoe, “Israel mainou Eye zha kirou hinou zha ali pove peiyu taith nasü Enou Levi maitao hi peiwure. Enou buyu Sahpao hi puletao nou vah souyu thaosü hai nanou puletao hi peiwure. 22Israel mai kukhetao hai Sahpao hi nghikoulai moe, puletao nou nghikou louzü lah hi athai nasü pove loua bailai. 23Chuthai nou Levi maitao nou Sahpao nasü zhulai ae sühi vah khesü puletao nou soupfülai. Haisü teisa vei chikha ali soua vere khaphao teitei hia talai. Levi maitao-a puletao vei teisa nou soure donou na lia bulai moe. 24Daiolouzü Israel mainou Eye zha kirou hinou zha ali peiyu nahai Enou puletao vei soua puletao hi peiwure. Südonou puletao nou Israel mai hrohinou teisa vei soure donou halia khailai moe.”
Levi Maitao vei Taith
25-26 Mapao nou Moses hi haibüa Levi maitao hi paopeio tea paoe, “Neletao vei zha soua Enou neletao hi peiyu Israel maitao vei taith hai ngaolouyu phaki, neletao-a zha kirou hinou zha ali hai Mapao hi neletao vei taith soua peilai. 27Neletao nou posheela peiyu hai nasü tatamai nou puletao vei thoudzü ngaolou raikayu vei posheela peiyu raibütoua popeilai. 28Südonou neletao nou Israel mai hinou ngaolouyu zha kirou hinou zha ali hai neletao-a Mapao hi posheela soua napao Aaron hi peilai. 29Neletao nou ngaolouyu hinou veikayu nanou poa peilo. 30Neletao nou veikayu nasü popei louzü, lia buyu taosü neletao hi khailo, süsü tatayu maitao nou neletao hi posheela peiyu thai, shokhai touyu taosü lah puletao vei soua khailouyu büa soulo. 31Shokhai toua buyu taosü ne ae nevei kihikha maitao nou buh tarali hinou tou-a bailai, daiolouzü sünasü neletao nou Sahpao hinou kuvah soukhai touyu vei shizho baie. 32Neletao nou veikayu nasü Mapao hi peilouzü, neletao nou sütao hai tou-a mah laimoe. Ana Israel mainou neletao hi peikhai touyu taosü, neletao nou veikayu nasü rai-a Mapao hi posheela peiloumo jünou touloua mah sü soulouso, neletao nou sübüa soulouzü, neletaoye sü southa-a bailai.”
Currently Selected:
MAIPEI PHOUYU 18: POUMBSI
Highlight
Share
Compare
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.