MAIPEI PHOUYU 23
23
1Balaam nou Balak hi paoe, “Eye donou posheelabu anai soupeio, ae chode anai alia zhaotsü anai ahi pove peio.”
2Puhnou paoyu thaifüa Balak nou soupeie, ae posheelabu alili hinou chode alia zhaotsü ali hai posheela peire donou pove peie. 3Süthaisü Balaam nou Balak hi paoe, “Meidei-a posheela peiyu buh hai hinou ne la-a buwo, Mapao nou Eye daolaiho daolai mosa E taho zhuta laihie. Puhnou ahi ngaoyu veishi sü Enou ne hi paongao peilai.” Südonou Balaam nou lah likhei deichi pei hisü patare, 4ae Ramai nou puhye kou daopeie. Balaam nou Ramai hi paoe, “Enou posheelabu anai soupei khaitoue ae posheelabu alili hisü chode ali ae zhaotsü ali posheela peikhai toue.”
5 Mapao nou Balaam hisü daitea paolai touyu hai paopeiwua Balak hi seidakhai koure. 6Süthai hai Balaam nou dakhai kouyu phaki, Balak hai posheela buh hinou Moab maivei süthai-apei maitao koa nou la-a buyu sü ngaoloue.
7Balaam nou haibüa rachi sü paopeie:
“Moab maivei veo Balak nou Eye Sairia maivei teinghei palova buyu deichitao hinou buh hai hi save-e.
Puhnou ahi paoe, ‘Eye donou tave chi paopeio,
ae Israel maiye chaa peio.’
8Ramai nou chaa peimoyu maiye sü
Enou kabüa chaa peikhailai?
Moyuma Ramai nou malai moyu maiye sü
Enou kabüa malai loulaige?
9Kushoyu deichi vanou Enou puletaoye zhingao-e;
Enou deichi vanou puletaoye zhu-e.
Puletao hai lahnou hrilou süyu tyahrü ali-e ae tyahrü kukhetao jünou puletaoye shiha peipu khaitouyu hai lah puletao nou süwe.
10Thaonou naihü zhou-a buyu Israel maivei tyaosholea maitaoye phoulou süyu sü bue,
mai süzhou buyu taosü thaonou choloulai?
Avei hümamai sü Ramai vei mai ali büa akhai soupeio;
Eye panou checheyu mai ali büa thaipeio!”
11Süthaisü Balak nou Balaam hi paoe, “Ne daisounou sübüa ahi soupeiwe? Enou neye sü Eye ngaobayu maitaoye panou chaa peire donou hai hi save baie, ana sübü peimoa nenou puletaoye sü ha peia baire.”
12Puhnou chila peie, “Mapao nou Eye paopeio touyu likhei E pao-a bailai.”
Balaam nou Rachipaolayu Ahai Chena
13Süthaisü Balak nou Balaam hi paoe, “Israel mai daotu zhingao-a bailaiyu buh ali hi Eye koa talai she. Buh sühinou Eye donou puletaoye chaa peio.” 14Puhnou puletaoye sü Pisgah Deichi peitaoh, Zophia vei dou hi sakou loure. Puhnou buh sühia posheelabu anai souloua sütao hisü chode alili ae zhaotsü chekhei hai posheela peie.
15Balaam nou Balak hi paoe, “Meidei-a posheelayu buh hai hinou ne la-a nou bu-o, ae reilova E takhe Ramai ye daolai hie.”
16 Mapao nou Balaamye dao-e, ae puh hi daitea Balak hi paolai touyu chipao sü paopeia puhye seidakhai kouwure. 17Puhnou dakhai kouyu phaki, Balak hai posheelabu hinou Moab maiye süthai-apei maitao koa nou buyu sü ngaoloue. Balak nou puh hi Ramai nou daitea paowe tea nou-e, 18ae Balaam nou haibüa rachi sü paola peie:
“Zippor nahpoutu Balak,
ne hai hi takoulo ae Enou paoyu achi sü keinoulo.
19Ramai hai mai büa da-a moe;
ae mai büa puhvei tsüle hai da chamoe.
Puhnou paokhai touyu thaifüa puh hai soua baiwe,
ae puhnou chi paokhai touyu nasü vete-a baiwe.
20Eye ha peia baio tea lüpeia baie,
ae Ramai nou shiha peikhai touyu nasü Enou podakhai louhoe.
21Israel mai hi kaozhou ashi vere halia Enou ngaomoe,
ae puletao nou veaho laiyu sü E zhingao moe.
Puletao vei Ramai Mapao nou puletaoye kozho peia nou bue,
ae puletao vei veo hai puh baie tea puletao nou shapaowe.
22Ramai nou puletaoye sü Ejipt hinou sapapeie;
Puhnou puletaoye donou rekou chode büa boupeie.
23Kheikhupado moa rashi sayu maivei do ashi sünou
Israel maiye halia soushi peilou hoe.#23.23 Kheikhupado...hoe; moa Kheikhupado hai Israel mainou poa vah soumoe, ae rashi sa-a vah souyu hai hae.
Chuo maikhe mainou Israel maiye donou haibüa paolai,
‘Zhukhaio, Ramai nou puletaoye donou soupei khaitouyu vahtao!’
24Israel tyahrü hai souveo ali büa khouko bue;
puhnou nütoure ngaoloumo koute ae puhnou nülouyu
zhe sü ke loumo koute puhnou solai moe.”
25Süthaisü Balak nou Balaam hi paoe, “Nenou Israel maiye sü chaa peio toukhaie nenou puletaoye sü chaa peibare, ana puletaoye sü ha peiso.”
26Balaam nou Balak hi paoe, “Mapao nou ahi paopeiyu teitei sü Enou sou-a bailai tea ne hi paomowu?”
Balaam vei Rachipaolayu Asüna
27Balak nou paoe, “She Enou neye buh kukhe ali hi satalai hie. Sühio louzü Ramai nou neye panou puletaoye chaa peishulai.” 28Südonou puhnou Balaamye saloua radeiki zhilou ngaoyu Peor Deichi hisü sapa loure. 29Balaam nou puh hi paoe, “Eye donou buh hai hinou posheelabu anai soupeio, ae chode anai alia zhaotsü anai pove peio.” 30Balak nou paopeiyu thaifüa soupeie, ae chode ali ae zhaotsü alili hai posheelabu alili hinou posheela peie.
Currently Selected:
MAIPEI PHOUYU 23: POUMBSI
Highlight
Share
Compare
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.