MAIPEI PHOUYU 24
24
1Chuo louzü Balaam nou süloure, süolouzü Mapao nou Israel maiye ha peiyu hai jüpawe, südonou puhnou kabü laisa touyu hai raichoki büa zhuta more. Puhnou radeiki hilova reiloure, 2ae Israel mainou khü-khü nou fühao soua buyu sü zhingao loure. Ramai vei rako nou puh hisü koulou loure, 3ae puhnou haibüa rachi sü paore:
“Beor nahpoutu Balaam vei rachi,
sheesha tea nou ngaoyu maina vei chipao.
4Ramai nou paoyu chipao choulou süyu maina,
Khoukhoulai Ramai hinou zho ngaoyuna kaoduta-a buyuma sheesha tea nou ngaolou süyu maina vei chipao.
5Israel maivei sahpao hai daizhou koute hüvei sarou,
6Habe veisho-a hrüpoa tayu soure,
reipe hinou buyu kipei büre,
Mapao nou shokhai touyu kaibonghou (aloes) büre,
ae dzü buyu pe hinou paopayu sedar süübe kure.
7Puletao hisü teishih teile vei-a teirü peilai,
ae puletao vei taimou hai dzü veiyu hinou thouloulai.
Puletao vei veo hai Agag jünou dupulai ae puhnou holo ae hailo dushopoa nou khasa-a hrülai.
8Ramai nou puletaoye sü Ejipt hinou sapa peie;
puhnou puletaoye donou rekou chode ali büa dupeie.
Puletao nou puletaoye ngaobayu maitaoye sü souha peie,
puletao vei rao khesü dacha peie
ae puletao vei voulouthou khesü sousasa peie.
9Souveo ali büa tyahrü süna hai khouko bue;
Puhnou dazüyu phaki, mai talia puhye sü soukai pi-e.
Mai taralia Israel maiye ha peiyu maisü shiha peilai,
ae mai talinoua Israel maiye chaa peiyu mai sü chaa ngaolai.”
10Balak hai rarou shopoa nou bahzü züloure ae Balaam hi paoe, “Eye ngaobayu maitaoye panou chaa peire donou Enou neye sü kuve-a baie, ana nenou bakha asü koute hai puletaoye shiha peia baie. 11Chuo lah ne ki hi dakhai veta-o! Enou neye veisho-a nou buu sü peilai tea paopeikhai toue, ana Mapao nou neye panou buu nasü ngaolou bare.”
12Balaam nou chila peie, “Enou rai-a nou nevei kopomaitao hi paomowu? 13Puhnou Eye puhvei vedei hi buyu shahu ae sana teitei nou peiyuma, Enou Mapao vei kharochi zümoa lah ado soua halia soulou shi-e. Mapao nou ahi paopeiyu likhei E sü pao-a bailai.”
Balaam vei Akhai Rachi
14Balaam nou Balak hi paoe, “Chuo Enou avei maitao hi dakhai talaire, ana E tamo jünou haithai naki Israel maitao nou nevei maitao hi daisoulai touyu hai paopeilai.” 15Süthaisü puhnou haibüa rachi sü paopeie:
“Beor nahpoutu Balaam vei rachi,
sheesha tea nou ngaoyu maina vei chipao,
16Ramai nou paoyu sü choulou süyu
ae Kukulai hi Abuo hinou veye tsüdo sülou süyu maina,
Khoukhoulai Ramai hinou sheesha tea nou zho ngaoyu maina vei chipaoe.
17Enou haithai naki zhuyu phaki,
Israel maivei tyahrü hai zhingao-e.
Veo mai ali, vavei shoyu teivuh ali büa tyahrü süna hinou palai,
zhaoyu vutao ali büa Israel mai hinou palai.
Puhnou Moab maivei süthai-apei maitao pei hai dakho peilai,
ae khaophu soua mai shiyu maiye sü puhnou danakou khaipeilai.
18Puhye ngaobayu Edom mai jünou koloulai,
ae puletao vei teidei sü puhvei souloulai,
ae Israel mainou thaokhai toumoa sübüa veilailai khelai.
19Israel maivei tyahrü sünou puletaoye khasa-a hrülai,
ae hria buyu mai ali koute-a souhakhai toua bailai.”
20Süthaisü Balaam vei zho kounou Amalek maiye haibüa nou ngao-e:
“Tyahrütao hrohinou Amalek mai hai khoukayu tyahrü ali-e,
ana haithai kou akhai hio puletao hai teisa nou ha-a bailai.”
21Puhvei zho kounou Ken maiye ngao-e, ae haibüa puhnou rachi sü paoe:
“Nenou buyu buh hai veisho-a nou soukhaiwure,
ae chuhlya peitaoh hinou raohouphe soukhai touyu büa nou bue,
22ana Ken maitaore, neletao-a souha bailai,
Assaria mainou neye sü nüpoa ta-a bailai.”#24.22 Phoure 22 nahai Hebrew hinou sheesha timoe.
23Balaam nou rachi hai nasü paopeie:
“Reilova nou vejüa buyu maitao sü daisouyu maige?
24Kaipras hinou dzüluki khesü pfüa velai,
puletao nou Assaria ae Eber mai jünou reih veiloulai,
ana puletao-a haithaio teisa nou hakata-a bailai.”
25Süthaisü Balaam nou kushuloua lah ki hi dakhai tare ae Balak-a lahvei ludu sü tare.
Currently Selected:
MAIPEI PHOUYU 24: POUMBSI
Highlight
Share
Compare
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.