MAIPEI PHOUYU 25
25
Israel Mainou Peor hi Buyu
1Israel maitao nou Akasia vei Deikho hinou ve fühao soua buyu phaki, puletao nou Moab maipfüye sabu sazü tare. 2Moab maipfü nou puletaoye sü homaitao vei rathoyu vei posheela nüh hisü velou peio tea kuloure ae puletao touso sü koa touzho loure ae puletao vei rah sü thotare. 3Südonou Israel mainou Peor hinou Baal rah sü tho tare, ae Mapao nou Israel mai pei hi rarou loure, 4ae Mapao nou Moses hi paoe. “Israel maiye süthaiyu mai hrülaiye sü saloua hea teivayu teile hinou southa khaitou-o, sükulouzü Enou maikhe mai hi lekhapu laimoe.” 5Moses nou peikho maitao hi paoe, “Neletao mai hrülai nou Peor hi Baal rahye thotayu mai alili hai southalai.”
6Israel mai ali nou Midian maipfü ali hai Moses ae maisou nou Mapao nou buyu Sahpao bomü hinou dopfüa buyu teile hinou puhvei sahpao hisü sa-a loure. 7Aaron tyao, Eleazar nahpoutu napao Phinehas nou sünaye ngaoloukhaie, maisou vejüa buyu buh hinou puhnou tashuloua tare. Puhnou heung sü poloua 8puhaiye sü sahpao hi thaijü loure, ae puhnou puhaiye sü heung nou phyathare. Süvanou Israel maiye southayu rahta rahvu nasü baire, 9ana rahta rahvu nou Israel mai thekaidai hai southare.
10 Mapao nou Moses hi paoe, 11“Enou Israel maiye lekhayu nasü Phinehas nou souha peiwure. Puh hai Eye baimoa rah kukhe liye thotayu hai heameapoa nou buthoulou hore, südonou Enou avei lekha hinou puletaoye sü souhapu khailai more. 12Südonou Enou puhye koa haithai vere teile veishi hia panou hamore vei vo ali soupeilai tea puh hi paopeio. 13Puh alia puhvei tyaosholea maitaoye panou teisa sü napao vei kuvah hai soulai, daiolouzü puhnou Eye donou noubasho-a Israel maivei mahmo khailoure vei vah haso hai soupeiwure.”
14Midian maipfüye koa southayu Israel maina zhih hai Simeon pfümounah hi peikhowo Selu nahpoutu Zimri toue. 15naotupai hai Midian mai peikhowo Zur nahnaotupai Kozbi toue.
16 Mapao nou Moses hi kharochi peie, 17“Midian maiye sü reih soukhaio, ae puletaoye sü souhawo, 18daiolouzü puletao nou neletaoye Peor hinou shodo ashi souloua souvea peiyu donou, ae Peor hinou rahta rahvu veyu phaki Kozbi ye southayu donou.”
Currently Selected:
MAIPEI PHOUYU 25: POUMBSI
Highlight
Share
Compare
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.