MAIPEI PHOUYU 5
5
Sheemoyu Mai
1 Mapao nou Moses hi paoe, 2“Israel maisou hisü kharochi peio, süolouzü fühao hi mai talinoua loukhaora soulouzü moa sheemoyu dzü küa bulouzü, moa thaiphao deiwua sheemoyu mai hrülaiye sü vakou hupa khaio. 3Naanou hinou sheemoyu mai hrülaiye sü vakou hulaio, sükulouzü puletao vei fühao, Enou avei maitao hi buyu buh hai souzhai laimoe.” 4Israel maitao nou paochi züa sheemoyu mai veishi puletao vei fühao hinou hulaiwure.
Soumah Khaitouyu donou Paoh Khapeiyu.
5-6 Mapao nou Moses hi chikha hai Israel mai hi paopeio tea nou peie. Mai talinou Mapao ye louche moyu hinou mai tali hi soumah louzü, 7puhnou puhvei mah sü paopa loulai ae paozho hai khache peilai, süpei hinou puhnou zha kaihli pei hinou zha kai hai thoupuloua nou puhnou soumah khaitouyu maina hisü peilai. 8Ana mai süna hai thaita louzü, ae puhvei kityarai mai ali-a paoh khapeiyu na hai pore mai halouzü, süna hai Mapao vei napao maitaoye donou peiwulai. Paoh-zho khayu pei hinou puhye soushee loure vei naanou soure donou nghitsü ali hai pove peilai. 9Israel mainou veishoyu posheela peiyu teitei hai puhnou pove peiyu napao maivei soulai. 10Maikhe mainou poa sheela peiyu natao hai napao vei soulai.
Maipuo Mainou Kipfümai Pei hi Lechüyu
11-14 Mapao nou Moses hi haibüa Israel maiye panou soupfülo tea paodou peie. Hakinou mai ali nou puh kipfü hai puh hi chilee more ae mai kukhe aliye sabu sazü phare tea lechü louzü, ana vah ashi souyu sü mai lia ngaolou more toulouzü, ae maipfü nou khei-a nou poku louzü, moyuma maipfü nou vah ashi soumoyuma maipuo nou puh pei hi lechüyu bulouzü, 15puhnou puhvei chapfü hai napao hi savelai, ae puhnou posheela peire donou barli sou sühcho ali hai pove peilai, ana sühi theadzü ae poukai nüvei hai thouhrülai moe, daiolouzü hai nasü maipuo nou maipfü hi lechüa acheche nasü süloure donou posheela peiyu baie.
16Napao nou naotupai sü posheelabu nghoujü hi sakou laloulai. 17Napao nou sheeyu dzü daotu poloua nailee ali hisü lathou loulai ae Mapao nou buyu Sahpao hinou deinai daotuli poloua dzü hisü thouhrü loulai. 18Süthaisü napao nou naotupai vei peishu hai souphopa peiwulai, ae honapai bah hisü posheela peiyu sou nasü thoupeilai. Napao nou puh bah hinou chaa peiyu dzü khayu nasü poa bulai. 19Süthaisü napao nou honapaiye panou haibüa chaachou soulai: “Nenou khulou vah ashi soumo louzü, chaa pfüyu dzü khayu hai nanou neye soushilai moe. 20Ana nenou khulou vah ashi souwure toulouzü, 21Mapao panou nevei zhih sü maikhe mai hi chaa southeo, ae nevei tei-mou sü panou kita theo, ae ne pou sü panou maapa theo. 22Dzü hai nanou ne pou hi koulouyu phaki, hai nanou nevei pou sü pfüa maapalai ae nevei tei-mou sü panou ki talai.”
Naotupai nou haibüa paolai, “E-a aetouwe; Mapao panou sübüa soupeio.”
23Süthaisü napao nou chaa sütao hai larü ali hi rüthouloua sünasü khayu dzü hisü khüthou loulai. 24Khayu dzü nasü honapai nou kethou loure toulouzü, pfüa sousho louveiyu nasü naotupai nanou kümo jünou, 25napao nou naotupai bah hinou posheela peikhai touyu sou nasü poloua sünasü Mapao hi posheela peilai. 26Süthaisü napao nou posheela khaitouyu sou hai bahzü ali poa licho louyu vei posheela soua meidei peilai, süthai sünou naotupaiye panou dzü sü kelai. 27Hakinou honapai nou khulou vah ashi soulouzü, honapai nou chaachou soua dzü kelouyu nasü nou pfüa sousho palai, ae puh pou hai maapalai, alia puhvei tei-mou hai kita-a bailai. Honapai vei zhih hai maikhe maiye donou chaa ali soulai. 28Ana honapai nou mah soumo louzü, veahoyu hai puh hi velai moe ae honapai nou nahmai hrüloua bailai.
29-30Maipuo nou puh kipfüye ngaorai loua honapai hai khulou vah ashi souyu phare tea lechü louzü, paokhai touyu chikha haibüa soulai. naotupaiye save posheelabu nghoujü hinou laloua napao nou naanou haitao hai soulai. 31Maipuo hiolouzü mah hai bulai moe, ana naotupai nou mah soulouzü, honapai hai veahoyu sü ngaolai.
Currently Selected:
MAIPEI PHOUYU 5: POUMBSI
Highlight
Share
Compare
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.