MAIPEI PHOUYU 6
6
Nazir Mainou Tare Zhaitao
1-2 Mapao nou chikha haitao hai Israel mai hi paopeio tea Moses hi peie. Poutumai moa naotumai talinou puhvei hümamai hai Mapao hi peiwua Nazir mai ali soulai tea chaachou soulouzü, 3puhnou zhaoh moa rashidzü hai kelai moe. Puhnou darkhashi hinou soupayu darkhazhaoh moa rashidzü ae darkhadzü hai kelai moe, moa darkhashi moa darkashiki talia toulai moe. 4Puhnou Nazir mai ali soua bubusasü darkha shithou, darkhadzü moa kao ali koute-a toulai moe.
5Puhnou Nazir mai soulai tea chaachou soukhai toua bubusasü, puhnou puh peishu hai bikhai toulai moe, ae puhvei mai hai saikhai toulai moe. Puhnou puhvei hümamai hai Mapao hi peithouwulai tea chaachou soukhai toua bukisasü puh sü shee-a bulai ae puhvei peishu alia mümai hai panou vipalai. 6-7Puhvei hrühai Ramai hi peiwure touyu vei shee hai puhvei peishu-e, südonou puh sü thaiphao hi kou lah puhye souzhai loulai moe, puhvei pfüpuo, ae thaihou jürai maitao koute hia velai moe. 8Puhnou Nazir mai soua bukisasü puh hai Mapao hi sousheeloua peithouwure.
9Hakinou mai ali hai puh pe hinou sükhai timoa thaita louzü, puhnou soushee khaitoua peithouyu puhvei peishu hai souzhaiwure, puhnou teithe anai hai buloua nou puh pei ae mümai sü sailaiwulai; süthaisü puh hai naanou hinou shee-a bailai. 10Teithe acha zhou sü puhnou khao ahai moa rahou ahai hai napao mai hi, sahpao vei kikhubomü hisü pove peilai. 11Napao nou raohou ali hai mah vei posheela ae kukhe ali nahai puhvei mah khailoure donou meidei-a posheela peilai, daiolouzü puhnou thaiphao vanou mahwure. Süzhou teithe hinou puhnou puhvei peishu hai sousheeloua nou poa peithoupu peilai, 12ae puhnou Nazir mai ali soua Mapao hi puhvei hrümamai hai peithoupulai. Raichoki puhvei teile taosü chopu laimoe, daiolouzü puhnou sousheeloua peithou khaitouyu puhvei peishu hai souzhaiwure. Mah khailoure vei posheela peire donou po ali payu zhaotsü ali hai pove peilai.
13Nazir mai ali nou chaachou soukhai touyu teile chere toulouzü, haibüa naanou hai soulai. Puhnou Sahpao kikhubomü hisü tave loulai, 14ae Mapao hi chaahayu hrikhaona asü hai pove peilai: meideia posheelare donou po ali payu zhaotsü ali, mah vei posheela peire donou zhaokü ali, ae chavei lathao-a hrüloure vei posheela peire donou zhaotsü ali hai pove peilai. 15Süpei hinou puhnou thoudzü vei posheela peiyu noupu ae kheih thoumoyu raokhao sülai ali, alia theadzü nou thouhrüloua souyu raokhao ae raokhaoki hai pove peilai.
16Napao nou hai teitei sü Mapao vei nghoujü pokou peilai ae mah vei posheela alia meidei-a posheela sü posheela peilai. 17Puhnou zhaotsü nasü Mapao hi chavei lathoua buloure vei posheela soua peilai ae raokhao sülai ali hai-a popeilai, puhnou thoudzü posheela hai-a posheela peilai. 18Nazir maina nou puhvei peishu hai Sahpao vei bomü hinou sailai ae saikhai touyu puhvei peishu hai chavei lathou-a buloure vei posheelabu hinou meideiwulai.
19Süthaisü zhaotsü baokao nasü kholoua napao nou kheih thoumoyu raokhao ali ae raokhaoki ali hai sülai hinou poloua Nazir maina bah hisü thoupeilai. 20Süthai hai napao nou Mapao hi veisho-a peikhai touyu nasü posheela peilai; hai nasü napao maiye donou sheesha touyu posheela ali-e. Haipei hinou zhaotu vei khaorao ae phikao hai chikha thaifüa napao maivei-e. Haibüa naanou souyu thainou Nazir mai hai darkhadzü so-a bailai.
21Nazir mai ali soulai tea chaachou soukhai touyu mai ali nou haibüa talai. Ana Nazir mai ali nou soure jünou la-a Mapao hi soupeilai tea chaachou soukhai toulouzü, puhnou chaachou soukhai touyu thaifüa liche-a souvete peilai.
Napao Maivei Shiha
22-23 Mapao nou Moses hi haibüa Aaron ae puh nahpoutu maitao hi Israel maiye ha peio tea nou paopeio tea paopeie:
24 Mapao ye panou neletaoye ha peio ae neletaoye kiko peiyu sü soulo;
25 Mapao ye panou neletaoye leshi peio ae zhuvea peiyu sü soulou theo;
26 Mapao ye panou neletaoye jüpalo ae neletaoye kaonayu sü peiyu soulo.
27Alia Mapao nou paoe, “Puletao nou azhih poa Israel maiye ha peilouzü, Enou puletaoye ha peilai.”
Currently Selected:
MAIPEI PHOUYU 6: POUMBSI
Highlight
Share
Compare
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.