ZEKHARIAH 10
10
Mapao nou Vupa Peilai tea Paohpeiyu
1 Mapao hinou khonü khyana vei teirü sü kholo. Teikhai teirü ae teihao sü Mapao nou soupeia baie, alia puhnou neletaoye donou dei hi buyu vupou shinamara teitei pei hisü teirükou peiwe. 2Deiphao mainou bashara ae prousouyu mai hinou daie vepalai touyu nouwe, ana kohmoyu ae dayu chila ngaoloua baiwe. Kamai-a nou me paopeiwe, ana da-a nou paola peiwua panou hamako hinou lesa baiwe. Südonou maikhe mai hai hayu zhaotu büa moa laire. Süthai-apei mai hayu donou puletao hai veawe.
3 Mapao nou paoe, “Amaitao ye khasa nou hrüa buyu maitao hisü E rarouwe, alia puletaoye sü Enou souvea peilai. Judah mai hai Amai-e, alia Khoukhoulai Mapao Enou puletaoye sü kiko peilai. Puletaoye sü panou reih hi khoushoyu rhei bülai. 4Puletao hrohinou peikhomai, süthai-apei mai, alia teidei khoyu maiye sü panou palai. 5Puletaoye sü panou soureih souveiyu mai büa puletao ngaoba maiye sü ludu hi nai tainya poa tayu büa panou taloulai. Mapao nou puletaoye kozho peiyu thaifüa, puletao nou reih sü souloulai, alia rhei pfüa laiyu puletao ngaoba mai jünou veiloulai.
6“Enou Judah maiye sü soukhoupu peilai;
alia Israel maiye sü vupa peilai.
Enou puletao ye sü ki hi sa-a dakhai ve peilai,
daiolouzü Enou puletaoye zhuvea-e.
Puletao hai Enou malai moyu bütou tea hrülai;
daiolouzü E hai puletao vei Ramai Mapao nae,
alia puletao vei veachi sü Enou keipeilai.
7Israel mai hai soureih souyu maili büa khoulai,
alia puletao hai zhaoh soziyu maili nou asayu büa asalai.
Puletao vei tyaonahtao nou veilouyu haihai licholoua asalai,
alia Mapao nou haibüa soupeiyu vanou puletao hai sava-a hrülai.
8Enou Amaitaoye sü kuloulai alia save pojükhai loulai,
daiolouzü Enou puletaoye sü vupa peiwure,
alia puletao hai raichoki mai alao hrüyu büa panou hrüvepu loulai.
9Enou puletaoye tyahrü kukhe mai hi sourarou laikhai touyuma,
puletao nou doushoyu buh kinou buyuma Eye licholai.
Puletao nou hria ki hisü puletao vei nahmaitao ye sa-a dakhai vezho loulai.
10Enou puletaoye sü Ejipt ae Assaria hinou ki hi save peilai;
alia Enou puletaoye sü Gilead ae Lebanon teidei hi save thoupeilai;
mai hrülou süyu koute Enou sühisü save thoupeilai.
11Puletao nou zaidu nahi takouyu phaki,
Enou zaidzü khüyu nasü dapeiwua panou puletao ye kacho paloulai,
alia thouyu Nail rei nasü southe peiwulai.
Süthai Assaria maivei khaophu nasü natawulai,
alia Ejipt maivei khouko sü hatalai.
12Enou Amaitao ye sü soukhou peilai,
alia puletao hai Achi züa Eye thoa bailai.”
Haibüa Mapao nou paoe.
Currently Selected:
ZEKHARIAH 10: POUMBSI
Highlight
Share
Compare
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.