ZEKHARIAH 11
11
Maiye Souveayu Maitao Haka Tayu
1Oh Lebanon, nevei kikhu khesü houkhaio,
sübüa panou sedar süübe khesü meinou deilaio!
2Haosüübetao, dopfü loukhaio,
daiolouzü veishoa buyu sedar süübe khesü kaoh tare.
Dopfü loukhaio, Bashan hi buyu chesüü betao,
daiolouzü maiteiyu vao khesü vikhaiwure!
3Teidei khoyu khemainou dopfüa krayu sü keikhaio,
daiolouzü puletao vei khouko sü hatare!
Keikhaio, kipeikhaodu nou rayu paisü,
daiolouzü puhnou buyu Jordan hi vaobvü khesü souhawure!
Zhaokhomai Tya Ahai
4Avei Ramai Mapao nou haibüa ahi paoe, “Zhaotutao ye dathare donou zhaokhome ye sü khoa baire. 5Puletaoye hrüloua dathayu maitao ye sü souvea peimoa panou taloua baire; alia puletaoye zholouyu maitao nou haibüa paoe: ‘Mapao ye paoshoe! Daiolouzü Etao hai toungi pare.’ Puletaoye khopeiyu zhaokhowo koute-a puletaoye sü zhuveayu sü hare.”
6 Mapao nou paoe, “Deiphao hi hrüa buyu maitao ye sü zhuvea peikhai laimore. Enou puletao hrülaiye sü kinapa mai bah hi alia puletao ye kho-apei mai bah hi thou peiwulai, sübüa deiphao teitei sü kho-apei maiye panou soushi souhawulai, süphaki mai aliro puletao bah hinou vupa peilai moe.”
7Zhaotu zhoyu ae hrülouyu maitao nou Eye ngaloure, alia E chuo dathare zhaotutao vei zhaokhowo sü soua bure. Enou süüpo ahai poloue: süüpo ali naye “Zhuvea-apei” alia kukhe naye “Lerozhowo” tea zhih saloue. Sübüa Enou poa zhaokhome ye sü khowe. 8Eye ngaorayu zhaokhomai asütao, E heamea pulou hoyu vanou puletaoye sü khouh ali levainou hulaiwure. 9Süthaisü Enou zhaokhome hisü paoe, “E neletao ye khopulou hore, südonou thaire maiye sü panou thai theo, souhare maiye sü panou souha theo, alia shokhai toua buyu taosü panou alinou aliye souhatheo.” 10Süthai Enou “Zhuvea-apei” tea kuyu süüpo nasü poloua rashawure, daiolouzü deiphao mai hi Mapao nou Vo soukhai touyu nasü panou hare donou. 11Süvanou Vo soukhai touyu nasü süzhou teithe hinou hare. Zhaotu husouyu maitao hai Enou soua buyu khesü zhua bue, alia Enou soua buyu vahtao hai Mapao vei chipao baie touyu puletao nou süloue. 12Enou puletao hi paoe, “Neletao nou haihai kaowe toulouzü, Eye avei zho peio; ana kaomoe toulouzü, neletao lah polo.” Südonou puletao nou shahu shirou hai avei zho phasoua Eye peie.
13Süthaisü Mapao nou ahi paoe, “Sütao poloua Rathoki vei kini khaiyu buh hi thouo.” Puletao nou Eye zhohabo peiyu nahai peivei shore teanou choa buyu shahu shirou nasü Enou Mapao vei kini khaiyu buh hisü thou peiwure. 14Süthaisü Enou “Lerozhowo” tea kuyu süüpo nasü poloua rashawure, panou Judah ae Israel maiye lerozhoyu hai hatare donou.
15Süthaisü Mapao nou ahi paoe, “Mu hayu zhaokhomai ali zhaibüa souloukhaio. 16Daiolouzü chuo teidei haina hisü Enou zhaokhomai haibüyu hai panou palai: hatare zhaotu ye sü zhuvea laimoe, molaiyu zhaotu ye phouta laimoe, zhikhai touyu zhaotu ye sü souvei peilai moe, mokhaia zhaotu ye sü to peitou laimoe, ana hüveiyu zhaotu khesü toukhai loua bailai, phimou koute-a laoloua bailai. 17Zhaokhome ye thao-a baiyu, Oh Avei mu hayu zhaokhowo! Ne hai daizhou koute vealaisa! Khoche nou puhvei baokao alia nghithou zhoulo nasü daode, reila laiwuo! Puh baokao sü panou kita theo, puh nghithou zhoulo vasü panou cha theo!”
Currently Selected:
ZEKHARIAH 11: POUMBSI
Highlight
Share
Compare
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.