ZEKHARIAH 13
13
1“Sübüyu teithe veyu phaki, David kihikhamai alia Jerusalem hinou hrüa buyu maitao vei mah ae sheemoyutao khüsheere donou dzühou ali soupeilai. 2Süzhou teithe Enou teidei sühi bashara zhih nasü souhawulai, sübüa mai ali koute-a panou puh zhih sü lichopu laimoe. Enou teidei sühisü rachi paolayu mai alia sheemoyu rako khesü polaiwulai. 3Süthaisü mai tarali noua rachi paolare donou palouzü, puhye nyapeiyu pfüpuo nou puh hi haibüa paolai, ‘Neye panou hrilai moe, daiolouzü ne Mapao zhih nou poa dayu chi paoyu donou, alia puhye napeiyu pfüpuo nou puhye sü rachipaolayu donou southa bailai. 4Süzhou teithe rachi paolayu maitao nou puletao vei zhohabo ngaoyu nasü po hao-a bailai, puletao vei soumai sabanü nasü puletao nou banoupu laimoe.’ 5Alia puletao nou haibüa paolai, ‘Ewo rachi paolayu mai moe, E tai bukinou tata-a payu mai baie.’ 6Alia mai tarali nou puletao hi ‘Ne phaohi daisounou zhimü pfüwe?’ teanou noulouzü, puletao nou ‘A samai kihi nou zhiloua baie’ tea chila peia bailai.”
Ramai vei Zhaokhoyu Maitaoye Southawo tea Kharochi Peiyu
7Khoukhoulai Mapao nou paoe, “Oh khoche, tashulo; Eye donou vah souyu zhaokho maitao ye sü daothawo. Zhaokhoyu maitao ye southawua panou zhaotu khesü porarou talai. Enou amaitao ye sü dulai. 8Teidei haihi hrüa buyu mai zha asü hinou zha ahai hai Enou souhawulai, panou zha alikhei hrüa bailai. 9Hria buyu mai zha ali ye sü Enou mei hi thou shahu deisheeyu büa deisheelai. Alia sana zhuyu büa zhulai. Süthaisü puletao nou A zhih kua veachi paolai, alia puletao veachi sü Enou kei peilai. Enou paolai, ‘Puletao hai avei mai-e’ tea nou; alia puletao nou ‘Mapao hai Etao vei Ramai-e’ tea paolai.”
Currently Selected:
ZEKHARIAH 13: POUMBSI
Highlight
Share
Compare
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.