ZEKHARIAH 14
14
Jerusalem alia Tyahrü Kukhe Maitao
1 Mapao vei chikure teile sü heikoure. Zhukhaio, neletao vei shaotouyu maitao nou neletao nghoujü hinou shaolouyu natao sü zhilai. 2Daiolouzü Mapao nou tyahrü hrülaiye sü save jüloua panou Jerusalem ye reih soulai, alia nuhdu nasü puletao ye panou poloua bailai, ae ki hi na buyu veishi sü shaoloulai, alia naotumai ye sü sazü-sabu peilai. Nuhdu hi hrüa buyu mai dali hai nüpoa talai, ana shokhai toua buyu maitao louzü nuhdu hinou sa-a talai moe. 3Süthaisü Mapao nou tyahrütao hisü raichoki puhnou reih souyu büa reih soutalai. 4Süzhou teithe Jerusalem vei teinghi palova buyu Oliv deichi hisü puhnou kouh laloulai; süthaisü Oliv deichi nasü teinghi palova nou poa teinghi loulova koute hai deikho aduli nou lou dakho ahai souwulai. Deichi dahli hai reilova khetalai, ae dahli hai khelova kouhtalai. 5Mapao vei deichi ahai soua dakho khaitouyu deikho hinou neletao nou turei paloulai. Judah hi veo Uzziah nou veo soua buki neletao puopao maitao nou nüsüyu phaki, tupa louyu büa panou neletao-a tupa loulai. Süthaisü Mapao, avei Ramai nou rakivamai hrülaiye sü saloua velai.
6Sübüyu teithe veyu phaki, kaoyu moa vürah hai bupu laimoe. 7Moa teizhi hai bupu laimoe. Hea bütoua bukoute bailai, hea-khei touyu bupulai moe, khei-a va-a bubailai. Haibüyu teithe nasü dukinou velaisa touyu hai Mapao likhei süa baie.
8Süzhou hai Jerusalem hinou ahri dzüla sü küpalai, dahli hai teinghi palova ae dahli hai teinghi loulova nou külai; süsü ka-hou sümoa kübulai. 9Süthaisü Mapao nou deiphao teitei hi veo soulai; süzhou teithe mai hrülai vei Mapao ali bailai alia Puh zhih hai alikhei soua süa bailai.
10Geba hinou poa Jerusalem vei khelova buyu Rimmon kouhte hai deikho soupeiwulai. Ana Jerusalem louzü Benjamin romü hinou poa daoh vei romü kainghou hi koute, alia Hananel vei kipei hinou veo vei darkhadzü souyu buh koute hai teidei kukhe jünou kuvuzüa bulai. 11Hai hisü mai ve hrüda khailai, daiolouzü soushi-souveayu hai ngaopu laimoe. Jerusalem hisü ngaopi touyu hazhi teanou hrüa bailai.
12Jerusalem pei hi reih souveyu tyahrütao hisü ratahyu hai Mapao nou seive peilai. Puletao hria buyuma puletao vasou sü panou tah talai, puletao nghithou alia mali sü panou tahta-a bailai.
13Süzhou sü Mapao nou puletaoye panou ngaopi shoyu ve daolai, sübü peia puletao ye panou puletao pehi buyu naye sü züva-dava talai. 14Judah ye donou Jerusalem mainou reih soutalai. Puletao nou pehao hi hrüa buyu tyahrü hrülai vei kini sü poloulai - sana, shahu, sabanü alao hai puletao nou poloulai.
15Ratah-a thaiyu nahai ngaoba mai vei rhei, racho, rheisü alia kikhaorü teitei hisü velai.
16Süthaisü Jerusalem pei hi reih soua thaisho khaitouyu tyahrütao nou po patsü velou Khoukhoulai Mapao ye puletao Veo soua ve tholai alia Sahpaonü nasü nülai. 17Deiphao hi hrüa buyu tyahrü tarali noua Jerusalem hi ve Khoukhoulai Mapao ye puletao vei Veo soua thomoyu maivei teidei hisü teirükou peilai moe. 18Ejipt mainou velou Sahpaonü nü balouzü, Mapao nou tyahrütao hi seiveyu ratah nanou puletao ye sü souhawulai. 19Sahpaonü nümoyu mai hisü, tukha hai Ejipt mai hi alia tyahrü hrülai hi ratah seiveyu na büa panou velai.
20Süzhou teithe hisü rhei phaodao hi koute-a “Mapao hinou shee-a hrülo” tea rüthou pfülai. Alia Mapao vei ki hi likhao paikhao veishi hai-a soushee khaitoua posheela laiyu paikhaotao büa shee-a bailai. 21Jerusalem alia Judah hi paikhao teitei hai Khoukhoulai Mapao donou shee-a bailai, sübüa posheela laiyu mai hrülai nou velou paikhao sütao hinou poloua pothoyu sou nasü kholai. Süzhou teithe Khoukhoulai Mapao ki hisü husoumai ali-a bupulai moe.
Currently Selected:
ZEKHARIAH 14: POUMBSI
Highlight
Share
Compare
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.