ZEKHARIAH 6
6
Zho Ngaoyu Achana: Rheiluki Adai
1Enou zhupuyu phaki, rheiluki adai hai baosahu deichi ahai ko hinou tapa-a ngaoe. 2Rheiluki araina hai rhei hoyu tyanou pfüwe, rheiluki ahai navei rhei hai tei-e, 3rheiluki asü navei rhei hai kaa-e, alia rheiluki adai nahai rhei maomüyu tyae. 4Süthaisü Enou rakivamai nahi noue, “Apaopuwo, haitao hai daitouwe?”
5Puhnou haibüa chila peie, “Haitao adai hai deiphao teitei hi Mapao vei nghoujü nou tapayu teikhai taoe.”
6Rhei tei nanou pfüyu rheiluki nahai teidei reilova tawe, rhei kaayu nanou pfüyu nahai teinghi loulova teideitao hi tawe, alia rhei maomüyu nanou pfüyu rheiluki nahai khelova buyu teidei hi tawe. 7Maomüyu rhei nanou tapa peiyu phaki, puletao hai deiphao sühao zhutare donou kholouho soua bure. Rakivamai nanou paoe, “Tawo, taho deiphao sü zhutawo.” 8Süthai rakivamai nanou ahi shusoua paoe, “Tyadei reilova khetayu rheitao nou Mapao vei rarou-lekha nasü soukaona peiwure.”
Joshua ye Vepeirü Rüpeio tea Kharochi Peiyu
9 Mapao vei chipao hai ahi haibüa ve-e: 10“Vakou nüpota-a Babilon hinou dakhai velouyu Heldai, Tobijah, alia Jedaiah nou sapeina peiyu sanatao sü poloua süzhou nou Zephaniah nahpoutu Josiah ki hi ta-o. 11Shahu alia sana taosü poloua vepeirü soulo, alia sünasü poho Jehozadak nahpoutu Napao Peichana Joshua ye rüpeio.” 12Alia puh hisü haibüa paopeio, “Khoukobu Mapao nou paoe, ‘Baokao teanou kua buyu mai nasü veikhelai, alia puhnou Mapao vei Rathoki nasü soushupu loulai. 13Puhnou Mapao vei Rathoki nasü soushulai, alia veo vei tsükhouyu sü puh hi bulai, ae puh nou vebuh hi buloua teidei hai kholai. Puh vebuh hisü napao mai ali koa bulai, alia puh haiko hisü kaonayu ae mailili ye tsükhoua hrülai.’ 14Vepeirü nasü Heldai,#6.14 Larübvü ali hi Heldai; Hebrew Helem. Tobijah, Jedaiah alia Zephaniah nahpoutu Josiah#6.14 Larübvü ali hi Heldai; Hebrew Helem. ye licholoure donou Rathoki hisü khailai.”
15Doushoa buyu mainou velou Mapao vei Rathoki soushupuyu nasü soukha peilai, süthai Khoukhoulai Mapao nou Eye neletao hi seivewe touyu süloulai. Neletao nou soutao soua Mapao, neletao vei Ramai chi züa bulouzü haitao hai vepalai.
Currently Selected:
ZEKHARIAH 6: POUMBSI
Highlight
Share
Compare
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.