ZEKHARIAH 5
5
Zho Ngaoyu Arouna: Zhaotayu Larü
1Enou dakhai zhupuyu phaki, larübvü ali hai tei hinou zhao-a laiyu ngaoe. 2Rakivamai nanou Ahi noue, “Ne dai ngaoe?” Enou chila peie, “Larübvü ali zhao-a laiyu zhi ngaoe; sünavei sashoyu hai mitar aküe alia mitar adai-a da hai jha due.”
3Süthai puhnou ahi paoe, “Haihai deiphao teitei hi taho chaa peilaiyu nae; daiolouzü maivei avao mai hrülaiye sü larübvü dapolova hi rüthou khaitouyu thaifüa souhawulai, alia da shaki peiyu mai hrülaiye sü ali lova rükhai touyu thaifüa souha khaiwulai. 4Khoukhoulai Mapao nou paoe, ‘Enou chaa haina hai seitare, südonou haina sü avao mai kihi loulai, alia A zhih hinou da-a nou shaki soukhai touyu mai hrülai ki hisü ve loulai; alia puletao ki hisü ve buloua nou buyu na veishi souhakhai touwulai.’ ”
Zho ngaoyu Anaina: Naotumai ali Sülai hi Bua Ngaoyu
5Süthaisü Eye cha-a buyu rakivamai nanou ahi takou loua paoe, “Hotao hinou tapayu nasü dai-e touyu zhukhaio.”
6“Hona hai daige?” teanou Enou noue. Puhnou ahi paoe, “Hona hai sülai-e, süsü deiphao mai hrülai vei mahtaoe.”#5.6 Larübvü ali hi mah; Hebrew nghithou.
7Süthai müho hapayu phaki, sülai na hisü naotumai ali bua zhingaoe.
8Rakivamai nanou paoe, “Haihai ashi nasüe.” Sübüa paoa puhnou honapaiye sü sülai hi khaothou khaiwure, alia müho nasü bewure. 9Süthaisü Enou zhuyu phaki, naotumai ahai sü ahilo zhaokoua zhingaoe. Hona hai vei shouh hai veishoyu raohao shouh büe, alia hona hainou sülai nasü poa zhaotare.
10Süthaisü Eye cha-a buyu rakivamai nahi Enou paoe, “Hona hainou sülai nasü kalova pove tare?”
11Puhnou ahi paoe, “Babilon hi potare. Buh sühinou puletao nou honapai ye donou rathoki ali soue. Sünasü souche loure toulouzü, puletao nou sülai nasü sühi khailoua tholai.”
Currently Selected:
ZEKHARIAH 5: POUMBSI
Highlight
Share
Compare
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.