PHONGSHANTHÜ DOU 1
1
Laangha Daülangpü Peihen Lahpü
1Bampü Theophilus, shongpü ngelei lai kü chongpangpülei Jisui dükpü hatü nyuhpü peü, 2büpai jepü phongshanthü kü Laangha Daülangpü homei nyuhpheikü büpa vangsholei manganlangpü nyih thahshilei jung ngei nyangteke. 3Büpa shangpong pheikü ajükiyao nejü-ühen mü büpa jom touei yemmü vamei hu, hatü nyih pinyi yangkü jomphong touei vamei Kahvang ongching jung eteke. 4Mechem jomphong mü hahyingei nyupa, büpai jomphong kü Jerusalem tuhtü nedaihen, shejao Pa-i lahpü thintho danei nyuhen ngeükhüam shuoh. Mepa jung ngei epü ammi danpa, hayü hapa khih. 5Mehenangkü Johani yung kü baptükteke, shejao shaang mebü nyih longi nenyui amphong kü Laangha Daülangpai baptükphahen.
Jisu Vangsholei Anlangpü
6Hanangkü mechem jomphong chemi peipa, jomi büpa kü, “Shembüpa, nüngi Israel am kü ongching nyokei shuohhen ha hepak je?” shei phe. 7Büpai jomphong kü e, “Opai laophülei wonghingani temei tuhlangpü hepak nevaijü nyih nyinghen hayü am shingvaishi napü neshiü. 8Shejao mechem Laangha Daülangpü am kü peikahen, ammi ngan yahhen, hatü amphongü Jerusalem, Judea hatü Samaria peü kü hatü kahdoknyü dohpü ngoishi ngelei denbüthü vaihen.”
9Mechem büpai ha eyei kempa, jomphongi veishi nyushi büpa vangsholei anlang hatü phumi büpa banglang. 10Büpa anlangpü kü jomphong veishi nyushi ngangahük kü shennyak nyi shola ow temtü jomphong touei peiyei yaong. 11Jijinyi-i, “Galil am, mehekei amphongi vangshangei veishi hatouei yaongnya? Hapa aihük Jisu üpa am toueipü vangsholei anlangi eenya, hapa kei-üng büpa yiükahen” shei eteke.
Judas Nangjei Mathia Jepü
12Hapheikü jomphongi Jerusalem yopai leipü sabbath nyih kamaoksham taishi nyupü Olive Kahshang leipü Jerusalemei nyokei lei. 13Mechem jomphong chingnyülei leiyei shüpa, jomi Peter, Johan, Jakob, Andrew, Philip, Thomas, Bartholomia, Mathi, Alpheaslei ha Jakob, Nyakpükenpü Simon hatü Jakobei cheha Judas hathü nyupü dokpa dung-amei aongteke. 14Jom peü nedoh-i lanei shuoh-ei phopei nyu, hatü jomphong mü nyühathü, Jisulei chenyü Mary hi büpalei chenaüthüao omshi nyuteke.
15Hathü nyih kü vaipü jeihinaüthü touei Peter yaongei, (ha khong kü shennyak kho hük mü kukha hükshing nyu), 16“Jeihinaüthü, Jisu yeppü khong kü mübü vaipü Judas nangkü Laangha Daülangpai David homei tetei nyupü laihingü dhaümteke; 17mehenangkü büpayü jenphong mü bhei-ie kü omei nyupeih hatü hapa chongphopü dousho kü hean hanteke” shei e. 18(Shaang hapa shennyakü büpalei nemeipü doui dangpü lopi shakpü kah hük nyu; büpa halei dhongdhongi doei vom bhaoei leihilang kemei vamei di. 19Hapa jung Jerusalemei nyupü peüi nying; hanangkü hapa kah kü jomei shah mü, Akeldama, lappai, “Iy Kah” shei nyükteke.)
20Mehenangkü Menvih Kesho lai kü ha nyangei nyüke:
“Büpalei kahphei shemshing kong leihütuh,
halei üpayao tenyuhü,”
hatü, “Büpalei mübü hean mih lebü hüki yahhütuh.”
21“Hanangkü Shembüpa Jisu jenphong mü daipü leipü hepak peü kü jenphong mü nyupü shennyakthü khongkü hük, 22Johani baptükpü kübü pangei jen toueipü büpa manganlangpü nyih thahshi nyupü shennyak hük jehen vongbong khih. Mehenangkü hathü khongkü jepü hükü jenphong mü büpa yangei leipü kü denbü vaihen vongbong” shei Peteri eteke.
23Hanangkü jomphongi shennyak nyi, Justus sheiyao nyükpü Barsabbas shei menpü Joseph, hatü Mathia nyi jeteke. 24Hapheikü jomphongi, “Shembüpa, nüngi peüei mong nyingei nyüke. Nüngi henyi khongkü üpa jepa? 25Judas-i büpalei shingei lüdainüng yakphongpü hapa phongshan dousho üpai jeiyei kohen ham kü hushih” shei phopei e. 26Jomphongi phongyom, hatü hapa phong Mathia kü hetteke, hatü büpa anpühük kü üteke.
Currently Selected:
PHONGSHANTHÜ DOU 1: PHOMBSI
Highlight
Share
Copy
Want to have your highlights saved across all your devices? Sign up or sign in
Phom Naga Bible - DAÜLANGPÜ LAIHING
Copyright © 2005 by The Bible Society of India
Used by permission. All rights reserved worldwide.
