PHONGSHANTHÜ DOU 2
2
Laangha Daülangpü Yiüpü
1Mechem nyih pinyipüanpabü ngoipa, jom peü shing hük kü thaiyei nyu. 2Hatü ngangahük kü vangsho leipü yinglükpalei keiha ngeü hük pei, hatü jomphong uoshi nyupü shem kemei ma. 3Awyei keiha phaakshi jom touei vamei jom peü kü bakteke. 4Jom peü Laangha Daülangpai ma, hatü Laanghai jom kü ehüaokpü thahshi lebü shah mü ehen chongpang.
5Shaang vangsho phangkü jat peü kübü Kahvang nyempü Jehoda am Jerusalemei nyu. 6Mechem jomi ha ngeü danpa, peüi yashan; mehenangkü jom peüi laophülei shah mü eyei danteke. 7Jomi yashanei hatü thamaei, “Shah epüthü peü Galil am nevaipü je? 8Shejema mekei etü jen peüi laophü laophülei nyübüh shah mü dannya? 9Jenphongü Parthia, Media, Elam hatü Mesopotamialei nyupüthü, Judea hatü Kappadokia, Pontus, hatü Asia, 10Phrigia, Pamphilia, Ijip hatü Cyrene yopai kübü Libya leipü. Jen haneiyü Rom leipü nyüke. 11Jehoda hatü Kung am nyiphen Jehoda vanglem kü leppüthü, hatü jen haneiyü Crete hatü Arab kahmük kübüthü; shejao Kahvangei ngan douthü jung jomphongi jenei shah mü epü jen peüi dannyüke” shei pheteiyei nyu. 12Peüi thamaei hüki hük mü, “Hapayü mehe lappüang yo?” shei etei. 13Shejao hanei ami nyieneinyangei, “Hathüyü yiünaü-i chokpü khih” shei eteke.
Peteri Chongvenpü
14Shejao Peter, anpühük mü yaongtü ngeü anei jomphong kü eteke, “Jempü Jehoda am hatü Jerusalemei nyupüthü, ammi ha nyingtuh hatü ngei mehe enya, ha banghümao. 15Hingmei meyü jomphongü ammi deihpükei yiünaü-i chokpü nevai; mehenangkü shaangü nepnüng shü baji mon khih. 16Shejao hapayü Joel thibü homei epü ha khih: 17Dohpü nyihthü kü hapakei nyuhen shei Kahvangi enyüke:
‘Ngei nanglak peü kü ngelei Laangha khüpshuohhen,
ammei yiükha yeshangthüi teteivanhen;
nethethüi manghkhang eehen,
hatü behethüi mangh manghhen.
18Hathü nyih kü ngei ngelei
chongphobü nyüha baha peü kü ngei ngelei Laangha khüpshuohhen,
hatü jomi teteivanhen.
19Ngei vangsho shangei thamapü,
hatü kahdoknyülei yashanpü,
iy hatü aw hatü awshit huhen.
20Longpü hatü müknyinshekhangpü
Shembüpa yiüpü nyih shekü vanghenyü manghdaihen,
hatü lennyü-ü iy leidaihen.
21Hatü üami Shembüpalei men kü nyükhenshang yanghen.’ ”
22Israel am, ngei mehe ephahen bangtuh: Nazareth am Jisu-ü Kahvangi yahpü shennyak hük amphong touei yashanyale, thamapü hatü nyangeihepü homei Kahvangi am kü büpa homei dou dükpü am nyingi nyingei nyüke. 23Kahvangei küpjan hatü yeihshi nyingei nyupükei hapa shennyak ammei lak kü lanei shuoh, hatü ammi nemeipüthülei lak homei büpa shophang kü apei jütük. 24Shejao Kahvangi büpa dipü hanghi kübü bümei leihüei yangei leishih; mehenangkü dipülei ngani büpa shümei netuh-aok. 25Mehenangkü Davidi büpa nang hapakei enyüke:
“Ngei düngei Shembüpa ngei touei eeteke;
Mehenangkü ngei nejenlenhen shingvaishi
büpa ngelei lakdah philei nyüpeih.
26Hanangkü ngelei mongei mongongpeih,
hatü ngelei jui mongmeipeih;
nyeishi ngelei bümao monglempü kü nyuhen;
27mehenangkü nüngi ngelei laangha mahngchongei netuhphonghen,
nevaijü nüngei Daülangpü Hük neshehühen.
28Nüngi ngei kü yangnyu lemthü nyinghü;
nüng ompü touei nüngi ngei kü mongongpai mahühen.”
29Jeihinaüthü, jenei pa David diyei vütükteke, hatü büpalei wo shinnyih thahshi hatouei nyüke shei ngei monglongei am kü eaoknyeih. 30Büpayü thibü hük vaipü nangkü büpalei ong uoshing kü büpalei hühiha hük uohühen shei Kahvangi büpa kü lahpü büpai nying. 31Ha Davidi yeihshi mebü eepü nangkü Davidi Khrista yangei leihen nang hapakei epeih.
“Büpa mahngchongei netuhphong
nevaijü büpalei büm neshe.”
32Kahvangi hapa Jisu yangei leishih, hatü hamphong peü hapa shahhing denbüthü hih. 33Kahvangei lakdah philei longei anshihtü Pa leipü Laangha Daülangpü lahpü dangteke, hatü ha büpai am kü khüpphopü shaang ammi eenyüke, hatü dannyüke. 34Mehenangkü David vangsholei ne-aong, shejao büpai hapakei enyüke:
“Shembüpai ngelei Shembüpa kü,
ngei nüngei vepathü,
35nüngei la shopshing mangleihü thahshi ngelei lakdah philei uotuh.”
36Hanangkü Israel phang peüi ha lekei nyingtuh: Ammi shophang kü aptükpü hapa Jisu-ü Kahvangi Shembüpa hatü Messiah leihüpeih.
Shongei Mong Leppüthü
37Mechem nanglakthüi ha danpa, jomei mong kü nyah, hatü jomi Peter hatü lebü phongshanthü kü, “Jeihinaüthü, hami mehe dükhenang?” shei phe. 38Peteri jomphong kü, “Amphong mong leptuh, hatü am peüi Jisulei men kü yung kü hüngtuh, shejüang ammei mang tükphahen, hatü amphongi Laangha Daülangpü thintho danghen. 39Mehenangkü ha lahpeyü am, ammei hapeüthü hatü tailuei nyupüthü, üam kü Shembüpa, jenei Kahvangi nyük, hathü peü shingvaishi nyüke, 40hatü büpai lebü shahthü longi jomphong kü nangthongei, ‘Hapa nemeipü den kübü am yangdaituh’ shei eteke.” 41Hanangkü üami büpalei shahjangmei yah, yung kü hüngteke, hatü ha nyih jomphong mü nanglak haja jem hükshing üteke. 42Jomphongi phongshanthüi nyuhpü kü hatü mongjempü kü, aan bhaokei hatü phoppü kü lanei shuoh.
Vaipüthü mü Yangnyu
43Peü kü nyempü pei; mehenangkü phongshanthüi thamapü hatü nyangeihepü longi dük. 44Vaipüthü peü chemi nyu, hatü dou peü sheppü nyuteke; 45Jomi jomei mophimo hatü dou peü yutü napü aimü hanei shuoh. 46Nyihjeih jomi phopshemei chemi hepak longi tük; jomi shem shem kü aan bhaokei mongongpai hatü mong dhaopai, 47Kahvang kü menvih shuoh-ei nanglakthü peüi kenteipü kü mongongei hahying, hatü nyihjeih Shembüpai yangpüthü jomphong mü bhei-ie kü üteke.
Currently Selected:
PHONGSHANTHÜ DOU 2: PHOMBSI
Highlight
Share
Copy
Want to have your highlights saved across all your devices? Sign up or sign in
Phom Naga Bible - DAÜLANGPÜ LAIHING
Copyright © 2005 by The Bible Society of India
Used by permission. All rights reserved worldwide.
