KAHBHAO 33
33
Jakob hi Esau Nyi Pongteipü
1Shaang Jakob ngangei veishingkü Esau-i büpa mü shennyak kho ali mütü peijaei ee. Hanangkü büpai Leah hi Rachel nyi hatü aa lanyü nyi kü naüthü hanei shuoh. 2Büpai yiükphüthü mü jomei hapeüthü shelei shaonghü, hapheikü Leah hatü chehathü, hatü shompülei Rachel hi Joseph nyi mühüteke. 3Büpa jom shelei shaong, hatü chejei ngoiyaki nyetpa thahshi kahdokei aümei shateke.
4Shejao Esau büpa mü pongnüng heih-ei büpa kü üng kü khaaitü om kü jüp, hatü jiji thep. 5Hapheikü Esau chiyei veishingkü nyüha hapeüthü eeteke. “Nüng mü leipü hathü üamang?” shei phe. Jakobi, “Hathüyü nüngei chongphobü kü Kahvangi phahjiyei shuohpü hapeüthü khih” shei e. 6Hapheikü yiükphüthü jomei hapeüthü mü ngoiyei aümei sha; 7Hapa keiha Leah hatü hapeüthü ngoi hatü aümei sha, hatü shomshi Joseph hatü Rachel nyi ngoiyei aümei sha. 8Esau-i, “Ngei heüpü khongü meheang?” shei e. Jakobi, “Hathüyü nüngi phahjiyei nyemdeihpha shei shuohpeih” shei e. 9Shejao Esau-i, “Naüpeü, ngelei peü changshi nyüpeih; naüpeü, nüng shing tuhhahtuh” shei e. 10Jakobi, “Hapakei nevai, chingmeilemlingei nüngi phahjiyei deihjema nüngi ngelei lak leipü hapa thintho yahtuh; hingmei nüngei dhe eepeyü Kahvang dhe eepükei khih; nüngi ngei hapakei bamei yahteke. 11Nüng shing leipü ngelei thintho yahtuh; mehenangkü Kahvangi ngei kü phahjiyei nopü nangkü ngei napü kemei nyüpeih” shei e. Hanangkü büpai büpa kü yahtuh shei nyean, hatü ha büpai yah.
12Hapheikü Esau-i, “Jen chemi leishah, ngeiyao nüng mü leiküshah” shei e. 13Shejao Jakobi büpa kü, “Hapeüthü wong nekoh, hatü yemhimak maanpüthü longi junghen mü nyüke, hatü hathü nyih hük lomei müei kamjema didaikemhen khih shei nüngi nyingei nyüke. 14Nüng ngei shekü leiyei chongkei, ngei youngmü yemhimak hatü hapeüthü kampü aimü leiyei Seirlei nüng touei ngoikahen” shei e.
15Hanangkü Esau-i, “Shejema ngelei shennyak hanei nüng mü tuhphapeih” shei e. Shejao büpai, “Mehekei nüngi ngei kü hajük shinshangei deihnya?” shei e. 16Hanangkü ha nyih Esau Seir yemei leidai. 17Shejao Jakob payü Sukkoth#Sukkoth lappü, “Tapshaü nevaijü ashakshem” shei nyinghen aok. lemei lei, hatü büpai laophü hatü yemhimakthü shing tapshaü chan; hanangkü hapa shing kü Sukkoth shei men.
Jakob Shekhem Ngoipü
18Hapheikü Jakobi Paddan-Aram leipü Kanan kahdok Shekhem chingnyülei meishi leiyei ngoi, hatü chingnyü haolei baümtap ve, 19hatü büpai Shekhemei chepa Hamor leipü lop kho hük shuohtü kahdok hük shakei ashakshem veteke. 20Halei büpai moidü hük ling, hatü ha kü El-Elohe Israel#El-Elohe Israel lappü, “Kahvangü Israel Kahvang” shei epü nyüke. shei menteke.
Currently Selected:
KAHBHAO 33: PHOMBSI
Highlight
Share
Compare
Copy
Want to have your highlights saved across all your devices? Sign up or sign in
Phom Naga Bible - DAÜLANGPÜ LAIHING
Copyright © 2005 by The Bible Society of India
Used by permission. All rights reserved worldwide.
