KAHBHAO 34
34
Dinah Shüei Yahpü
1Nyih hük Jakob hatü Leah nyilei yiükha Dinah-i Kanan am nyühathü hanei thümhen dai. 2Mechem Hiv am Hamorlei cheha Shekhem, hapa moidoi kü longpü shennyaki pinnyü eepa, büpai pinnyü yepei douten dük. 3Büpai Jakobei yiükha Dinah kü mong kempai bam hatü shahmei eyei pinnyü yawhhen khe 4Hanangkü Shekhemi chepa Hamor kü, “Hapa nela ngelei nyüha vaihen yahhüangke” shei e.
5Shaang Shekhemi büpalei yiükha Dinah tentükteke shei Jakobi dan, shejao chehathü kemei laophülei yemhimakthü müei kahlei shadaikempü nangkü büpai hathü mangaong thahshi meheyao nedük. 6Shekhemei chepa Hamor-ü Jakob mü ha nang eteihen heih-ei nyu, 7hatü Jakobei chehathü kah leipü aongei nyu. Mechem jomphongi ha danpa, jomphong longi mongshang hatü mongshihteke, mehenangkü büpai nedükhen dou dükei Jakobei yiükha tentükpai Israel am kü ne-ienelem veüpong shuohteke. 8Hamor-i jomphong kü, “Hapeü Shekhemi ammei yiükha kü longi bamnyüke. Chingmeilemlingei büpa mü shem yemhütuh. 9Jen aa kü yiükyah lashomteipü nyushah. 10Am ham mü nyutuh; kahdokü am shing bhashahshi nyüke; halei nyuei bhei leih-ei angeideiyei nyutuh” shei e. 11Shekhemiyao Dinahlei chepa hatü jeihinaüthü kü, “Ammi ngei kü phahjiei deihshih, hatü ammi mehe yühen ngei ha yahphahen hih. 12Ammi mongpüshük yiükhalei lat hatü thintho yütuh; ammi meshük yü ngei shuohhen; ammei yiükha mon ngelei nyüha vaihen yahshih” shei e.
13Jomei naüpeü Dinah mangtükpü nangkü Jakobei hapeüthüi Shekhem hatü chepa Hamor nyi kü ühing kohshi eteke. 14Jomphongi jiji kü, “Hami shuw nejaptükpü am kü hamei naüpeü shem yemhühen neaokpih; mehenangkü hayü ham shing shanghah longpü hih. 15Amao ham keiha baha kemei shuw japtükjü mon hami monghen. 16Hapa dükjü mon hami hamei yiükhathü am kü shuohhen, hatü hami ammei yiükhathü yahhen, hatü hamao am mü nyuei nanglak hük leihen. 17Shejao ammi ham epü nebangi shuw nejaptükjema, hami hamei yiükha yah-ei lüdaihen” shei e.
18Jomphongi epü shah kü Hamor hatü Hamorlei cheha Shekhem nyiyü mongongei deih, 19hatü hapa nethepai neka-i epükei dük; mehenangkü büpai Jakobei yiükha longi lüm. Büpayü jom shem kü peü mü shongnyü nanglak nyuteke. 20Hanangkü Hamor hatü cheha Shekhem nyi-i jomei chingnyü penyüshalei shahthai shingei peiyei shennyakthü kü, 21“Hathü shennyakü jen mü longi küphü mei khih; jom jenei kahdokei nyuei halei bhei leih-ei nyemnyu; jom shingao kahdok changshi nyüke. Jeni jomei yiükha hatü jomi jenei yiükha yah-aokhen. 22Shejao jomi jen mü nanglak hük leiyei nyuhenü laphen hük nyüke; hayü jen bahathüiyao jom kei shuw japhen vongbong shei enyüke. 23Jomei yemhimakthü, jomei mopthü hatü lebü yemhimak kemei jenei nevaihen je? Hanangkü jomi epü kü jeni bangshah hatü jom jen mü nyukahen” shei e. 24Hamor hatü cheha Shekhem nyi mü chingnyü penyüshalei thaipüthü peü ha nyi-i epü kü mong, hatü chingnyü kü nyupü peüi shuw japteke.
Dinahlei Chejei ami Bhüh Yempü
25Nyih jempabü mechem jom peü shuw jappü kü tüngei nyupa, Dinahlei chejei, Jakobei cheha Simeon hatü Levi nyi-i meheyao hakaei nenyupü hepak kü chingnyü khüei daiyei bahathü jütük. 26Jijinyi-i Hamor hatü Shekhem nyi jütüktü Shekhem am shem leipü Dinah müei leidai, 27hatü Jakobei lebü hapeüthü peiyei chenaü mangtükpü nangkü chingnyü leipü mop kemei yah-ei leilang. 28Jomi haleipü mi, mohoh, jomei gadu, ching hatü kahlei nyupü lemphü yahlang. 29Jomei mop, hashih naüha hatü nyühathü peü, shem leipü yahpü dou peü yah-ei lüdai. 30Hahepak kü Jakobi Simeon hi Levi nyi kü, “Anjinyi-i hapa kahdok kü nyupü Kanan hatü Perizz am touei ngei jiühitbenüng leihen mü shanghah koei leiküteke; jenü maani mon, hatü jomi jen khüei chemi thaitü jen hahjema, ngei hatü ngelei shem am peü mahdaikemhen khih” shei e. 31Shejao jiji-i, “Hamei naüpeü-ü büm yupü am kü kei jomi dükhen je?” shei e.
Currently Selected:
KAHBHAO 34: PHOMBSI
Highlight
Share
Compare
Copy
Want to have your highlights saved across all your devices? Sign up or sign in
Phom Naga Bible - DAÜLANGPÜ LAIHING
Copyright © 2005 by The Bible Society of India
Used by permission. All rights reserved worldwide.
