KAHBHAO 35
35
Kahvangi Jakob kü Bethelei Moihimanpü
1Kahvangi Jakob kü, “Yaongtuh hatü Bethelei aongei halei nyutuh. Anjei Esau kü nüng nyemei daishingkü nüng touei vamküpü Kahvang kü halei moidü hük lingtuh” shei e. 2Hanangkü Jakobi büpa mü nyupü shem am peü kü, “Am mü nyupü kung amei kahvang peü yaktüktuh hatü am nyingi daütüktuh hatü ashakviha jeituh, 3hapheikü peikei, hatü ngei shanghahpü nyih ngei kü jangpü hatü ngei dailem peü kü ngei mü nyupü Kahvang kü moidü hük linghen jen Bethelei aongshah” shei e. 4Hanangkü jomei kung amei kahvang lajeithü hatü dhaongchü kemei Jakob kü shuoh, hatü Jakobi hathü peü Shekhem yopai leipü longkhampü phangei jotük.
5Jom daishingkü jom shonei nyupü chingnyüthü peü kü Kahvang leipü nyempü pei; hanangkü üpayao jom kü nechang. 6Jakobi büpa mü shennyakthü peü Kanan kahdok Luzlei (hapayü Bethel) pei, 7hatü büpa El-Bethel#El-Bethel lappü, “Bethel Kahvang” shei epü nyüke. shei mentü moidü hük ling; mehenangkü büpai chejei toueipü laongei daishingkü hatouei büpa kü Kahvang shakei vamteke. 8Rebekah kü jungteipü Deborah di, hatü pinnyü Bethel mailei nyupü longkhampü phangei pinnyü mahng vüphong. Hanangkü hapa shing kü Allon-Bakuth#Allon-Bakuth lappü, “Mahng theppü longkhampü” shei nyükpü khih. shei men.
9Jakob Paddan-Aram leipü leijashingkü shao Kahvang büpa touei vamei moihimanteke. 10Kahvangi büpa kü, “Nüngei menü Jakob nyuteke, shejao hajük kü Jakob shei nenyükhen, shejao Israel shei nyükhen” shei e. Hanangkü büpa kü Israel shei nyük. 11Kahvangi büpa kü, “Ngeiyü Jeiyong Kahvang: Nüng kü betjük jükei nanglak longi datuh; nüng kübü jat hük hatü jat khong longi vamhen, hatü nüng kübü ongthü vamhen. 12Ngei Abraham hatü Isak kü shuohpü kahdok ngei nüng kü shuohhen hatü nüng pheikü nüngei hühihathü kü shuohhen” shei e. 13Hapheikü büpa kü shah eshuohpü shing kübü Kahvang aongdai. 14Kahvangi shah eshuohpü shing kü Jakobi yaong shemnyü hük haong, hatü büpai hapa kü yiü moila shuoh hatü mainga langteke. 15Hanangkü Jakob kü Kahvangi shah eshuohpü shing kü Bethel shei men.
Rachel Didaipü: Benjamin Bühpü
16Hapheikü nedoh-i jomphong Bethel leipü dai, hatü jomphong Ephrah leipü maani yanei daiyei nyushingkü Rachelü hapeü anghen tüngei nyu. 17Mechem pinnyü tüngei nyupa, pinnyü kü jungpü nyühai pinnyü kü, “Nüng tenyem, nüngi shao yeshang hük anghen khih” shei e. 18Pinnyü sheyü mongdang shemdaihen nyushi pinnyüi naü kü Ben-Oni#Ben-oni lappü, “Ngei shanghahpü hapeü” shei epü nyüke. shei men, shejao chepai Benjamin#Benjamin lappü, “Ngelei lakdahphi leipü hapeü” shei epü nyüke. shei men. 19Hanangkü Rachel di, hatü pinnyü Ephrahlei (hapayü Bethlehem) aongpü lemei vüphong, 20hatü Jakobi pinnyülei mahngchong kü shemnyü hük haong; hapa kü Rachelei mahngchong kübü shemnyü shei enyeih, hatü hapa shinnyih thahshi nyüke. 21Israel nedoh-i dai, hatü Eder shangdü haolei ashakshem veteke.
Jakobei Hapeüthü
22Mechem Israel hapa kahdokei nyupa, Reuben peiyei chepalei yiükphü Bilhah mü shi, hatü Israeli ha dan. Shaang Jakobei yeshangthü jom anpünyi nyu. 23Leah-i bühpü: Reuben (hashongpa), Simeon, Levi, Judah, Issakhar, hatü Zebulun. 24Racheli bühpü: Joseph, Benjamin. 25Rachelei aa lanyü Bilhah-i bühpü: Dan, Naphtali. 26Leahlei aa lanyü Zilpah-i bühpü: Gad, Asher. Hathüyü Paddan-Aramei nyushi Jakob kü bühjapü yeshangthü nyuteke.
Isak Didaipü
27Abraham hi Isak nyi benha kei nyupü Mamre nevaijü Kiriath-Arbalei (hapayü Hebron) Jakobi chepa Isak touei heih. 28Shaang Jakobü nyübüh bong 180 nyu. 29Jakob den luei viüei nyutü di, hatü cheha Esau hi Jakob nyi-i büpalei mahng vüteke.
Currently Selected:
KAHBHAO 35: PHOMBSI
Highlight
Share
Compare
Copy
Want to have your highlights saved across all your devices? Sign up or sign in
Phom Naga Bible - DAÜLANGPÜ LAIHING
Copyright © 2005 by The Bible Society of India
Used by permission. All rights reserved worldwide.
