KAHBHAO 37
37
Joseph-i Mangh Manghpü
1Jakobü chepa benha kei nyupü Kanan kahdokei nyu. 2Hapayü Jakob am shemei büshah. Joseph bong anpünyet kü chejeihijei am Bilhah hatü Zilpah nyilei hapeüthü kü sheühteiyei mi yomei nyu. hatü büpai hathü jung shahjang nemeipü chepa touei koei leiteke. 3Shaang Israeli büpa viüdaitü angpü hapeü vaipü nangkü büpalei lebü hapeüthü meyü Joseph kü-üng nyeishi bam, hatü büpai büpa shing ow shihpü bhagthuh laklu thüngteke. 4Mechem chejeihijei ami jomphong meyü chepai büpa kü-üng nyeishi bamnyüke shei nyingpa, jomi büpa kü neveihü hatü shahmei hükao büpa kü ne-e.
5Chem Joseph-i mangh hük manghteke, hatü mechem büpai ha chejeihijei am kü ejapa, nyeinya jomphongi büpa kü jiühit. 6Büpai jomphong kü, “Ngei manghpü mangh kü banghümao: 7Jen peü kahlei hahbhaong shaei nyuteke. Ngangahük kü ngelei hahbhaong yaongteke, hatü amphongei hahbhaong kemei shonei aümei shaei khümei manghküpeih” shei e.
8Chejeihijei ami büpa kü, “Nüngü hamphong shak kü ong vaihen deihpü je?” shei e, hatü jomphongi nyeinya büpalei mangh ejapü nangkü jiühit. 9Hapheikü shao büpai mangh hük mangh, hatü ha büpai chejeihijei am kü ejateke. Büpai, “Banghümao, ngei shao mangh hük manghpeih, vanghe, lennyü hatü litha anpühük ngei kü khümei manghküpeih” shei e. 10Mechem büpai manghthü chepa kü hatü chejeihijei am kü ejapa, chepai büpa kü loh, hatü, “Nüngi hayü mehe mangh manghküpa? Hingmei anyü henji hatü anjeihijei am peü peiyei nüng kü kahdokei aümei khümhen je?” shei e. 11Chejeihijei ami büpa kü mükhak, shejao chepai ha nang mongei mon tuh.
Chejeijei ami Joseph Yutükpü
12Shaang chejeihijei amü chepalei mithü kü het ühshing Shekhem yopailei heih-ei nyu, 13hatü Israeli Josheph kü, “Anjeihijei am peü Shekhem yopailei mithü het üh-ei nyupü nüngi nyingei nyüke. Heihkei, ngei nüng jomphong touei shomshah” shei e. “Meiteke” shei büpai e. 14Büpai büpa kü, “Anjeihijei am hatü mithü mekei nyüpüshang shatuh, hatü shahom koei aongkei” shei e. Hapheikü büpai büpa Hebron Kahjilei shanshihteke. Büpa Shekhem ngoi, 15hatü shennyak hüki büpa kahlei kamteiyei eeyei hapa shennyaki, “Nüng mehe yemnya?” shei phe. 16Büpai, “Ngeiyü ojeihijei am yemnyeih, jomphong melei het ühnyushang eshih” shei e. 17Hapa shennyaki, “Jomphong lüdaiteke; mehenangkü ngei jom hi jom, ‘Jenphong Dothanei daishah’ shei eteiyei ngei danpeih” shei e. Hanangkü Joseph-ao chejeihijei am yemei heih, hatü büpai jomphong Dothanei heüteke. 18Jomphongi tailei büpa eeyei büpa jomphong yopailei mangngoija-i büpa jütükhen showteke. 19Jomphong hüki hük mü, “Mangh manghteipü shennyak halei heihkünyüke. 20Kei, jeni büpa jütü kahsha hükei shükphongshah; jeni büpayü phaüyemi hahtükpü khih shei ehen, hatü büpalei mangh mehe vaikahen veishah” shei etei. 21Shejao mechem Reubeni ha danpa, büpai hathülei lak leipü büpai, “Jeni büpa nejüshah” shei etü yang. 22Reubeni jomphong kü, “Iy teyenhü, phaüei deiyei büpa hapa kahshalei hüphongtuh, büpa kü lak teshih” shei e. Reubeni hapayü jomphongei lak kübü chepa touei müei leihen nangkü eteke. 23Hanangkü mechem Joseph chejeihijei am touei ngoijapa, büpai thuhpü bhagthuh laklu shaaktüktü, 24jomphongi büpa yah-ei kahshalei shükphong. Hapa kahshayü kong hatü yung neshiüi nyu.
25Hapheikü jomphong hahyingei nyushing kü jomi veishuohjü Ishmael am ut kü uotü Gilead leipü müh, meli hatü nyalingngupai van kotü Ijiplei yiüjapü eeteke. 26Hahepak kü Judah-i cheihinaüthü kü, “Jeni jenei naüpeü jütü büpalei iy jojü mehe nanglei nyüpa? 27Kei, jeni büpa kü lak neshihshah, shejao Ishmael am kü büpa yutükshah; mehenangkü büpayü jenei naüpeü, jenphongei iy” shei e. Cheihinaüthü peüi ha kü mongteke. 28Mechem Midian am bhei leihpüthü peijapa, jomi Joseph shüei kahsha leipü ngaiyei jomphongi büpa Ishmael am kü ngin kukha kü yutük, hatü jomi Joseph Ijiplei yah-ei lüdai.
29Mechem Reuben nyokei leiyei kahshalei veipa, büpai Joseph ne-eepü nangkü büpai laophülei ashak shaaktük. 30Büpai chenaüpeüthü kü, “Naü lüdaiteke, ngei melemei daihenang?” shei e. 31Hahepak kü jomphongi mi hük jütü hapalei iy kü Josephei bhagthuh hüngteke. 32Jomphongi bhagthuh laklu yah-ei leiyei chepa kü, “Hamphongi ha dangpeih, hayü anhalei bhagthuh vailashang veituh” shei e. 33Büpai ha vaiteke shei nyingei, “Hayü hapeülei bhagthuh khih! Phaüyemi büpa hahtükpü khih; Joseph-ü khih mü shaaktüki shiühen khih” shei e. 34Hahepak kü Jakobi laophülei ashak shaaktük, hatü shüng kü dhoila ashak ngeihtü nyih longi mahng thep. 35Chehapeüthüi büpa mong nyiushem meihühen khe, shejao büpai ha kü nemong, “Anyoh, ngei ngelei hapeü nangkü mahng thepyaki Sheolei shühen khih” shei e. 36Hahepak keyü Midian ami büpayü Ijip am Pharaohlei lakchongbü, veshan mübü Potiphar kü yutüktü nyuteke.
Currently Selected:
KAHBHAO 37: PHOMBSI
Highlight
Copy
Compare
Share
Want to have your highlights saved across all your devices? Sign up or sign in
Phom Naga Bible - DAÜLANGPÜ LAIHING
Copyright © 2005 by The Bible Society of India
Used by permission. All rights reserved worldwide.
