MARK 14

Jisu Jühen Phaüshah Showpü

(Mt. 26:1–5; Lk. 22:1–2; Jn. 11:45–53)

1Hapayü Hompü Mo hatü Daw Neshihpü Mo mohen nyih nyi shekü nyuteke. Ngongpathü hatü shahkung nyuhbüthüi joei Jisu yepei jühen lem yemei nyu; 2mehenangkü jomi, “Mo hepak kü payü nevai, hei nevaijema nanglakthüi mophicheü ngaikahen” shei etei.

Bethanylei Mainga-i Phupü

(Mt. 26:6–13; Jn. 12:1–8)

3Mechem büpa Bethanylei Simon ngombülei shemei nyupa, büpai bhaong hahhen uoshi nyushingkü nyüha hük longi bhei wongpü vongmei meli shong yahei peiyei ha aptü büpalei shangjing kü cheiteke. 4Shejao halei uopü hanei ami mongshih-ei hüki hük mü, “Vongmei meli mehekei hapakei damtüknya? 5Mehenangkü hapa meliyü nanglat nyih kho jemei bhei kü yuhah shepeih, hatü hapa lop taopathü kü shuohhen vaipeih” shei e, hatü jomphongi pinnyü kü lohteke.

6Shejao Jisui, “Pinnyü hei-üng nyemnyu; mehekei ammi pinnyü shanghahhünya? Pinnyüi ngei kü doumei dükteke. 7Mehenangkü taopathüyü düngei am mü nyüke, hatü ammi dükshuohhüpü hepak kü jom kü bampü doumei dükhen aok, shejao ngei düngei am mü nenyukahen. 8Pinnyüi mehe dükaok ha düknyu khih; pinnyüi ngelei büm mahng vühen shekü ha phunyu khih. 9Hingmei ngei am kü enyeih, melei hapa shahjangmei kahdoknyü kempülei baonghen, pinnyüi mehe dük, ha pinnyü deih-ei dangei eteihen” shei e.

Judas-i Jisu Yuhen Mongpü

(Mt. 26:14–16; Lk. 22:3–6)

10Hapheikü Judas Iskariot, üpa anpünyi khongkü hük nyu, büpai jomphong kü Jisu yuhahhen nangkü büpa ngongchongthü touei dai. 11Mechem jomi ha danpa, jom longi mongong, hatü büpa kü lop shuohhen lah. Hanangkü büpai büpa yuhen hepak meipü yemteke.

Nanglomthü mü Hompü Mo Hahpü

(Mt. 26:17–25; Lk. 22:7–14, 21–23; Jn. 13:21–30)

12Daw Neshihpü Aan Mo shongpü nyih mechem Hompü Mo mi jüpa, büpalei nanglomthüi büpa kü, “Hamphong metouei daiyei nüng shingvaishi Hompü Mo hahhen temhahhünya?” shei phe. 13Hanangkü büpai nanglom nyi kü hapakei etü shom: “Chingnyülei aongtuh, hatü shennyak hük yungdük hük chantü anji-i ponghen, 14hatü büpa melemei shüdaiphahen müei shüei haleipü shem shembü kü, ‘Nyuhbüi ngelei nanglomthü mü Hompü Mo hahhen shingvaishi ngelei yenpaüm dung melei nyüpa shei phenyüke?’ shei ehen e. 15Büpai anji kü shangei dung longpü hük jinei temtüktü huphahen. Halei jen shing mo temtuh” shei e.

16Hanangkü nanglomthü chingnyülei daijü büpai epükei peü temtüktü nyu, hatü halei jijinyi-i Hompü Mo hahhen tem.

17Mechem om dhüpa, büpa nanglomthü mü lei, 18hatü mechem jomphong laophü laophüi shing yemei uotü hahyingpa, Jisui, “Hingmei ngei am kü enyeih, amphong khongkü hük, ngei mü hahyingpü hüki ngei luhahhen khih” shei e.

19Nanglomthüi mongshangei büpa kü, “Hayü ngei vaila?” shei hük pheikü hüki e.

20Büpai jomphong kü, “Hayü anpünyi khongkü hük üpai ngei mü shung hük kü lak lünya, büpai luhahhen. 21Mehenangkü Shennyak Hayü nyangei nyupükei daihen, shejao üpa homei Shennyak Ha luhahhenshang onyükei! Büpa shingvaishi nebühpü-üng meipüba” shei e.

Shembüpa Mo

(Mt. 26:26–30; Lk. 22:14–20; 1 Kor. 11:23–25)

22Jomphong hahying shingkü büpai aan hük yah, hatü moihiman pheikü büpai ha bhaok, hatü nanglomthü kü shuoh, hatü “Yahtuh, hayü ngelei büm” shei e. 23Hapheikü büpai yungshong hük yah, hatü menvih shuohpheikü büpai ha jomphong kü shuoh, hatü jom peüi hapa leipü ying. 24Büpai jomphong kü, “Hapayü longshi shingvaishi haipü vangteishuwteipü ngelei iy. 25Hingmei ngei eshah, Kahvang ongching kü amphong mü nyalingngupai yiü ja yinghen nyih mangngoi thahshi ngei amphong mü hapa nyalingngupai yiü neyinghen” shei e. 26Jomphongi kesho hük loktü Olive Kahshangei aongdai.

Peteri Jisu Nelahpü

(Mt. 26:31–35; Lk. 22:31–34; Jn. 13:36–38)

27Jisui jomphong kü, “Ngei mon tuhtü am peü nyaidaikemhen; mehenangkü ha nyangei nyüke:

‘Ngei mi yombü kü bheihen,

hatü mithü yandaikemhen.’

28Shejao ngei yangei leipheikü ngei am shekü Galilei daihen” shei e.

29Peteri büpa kü, “Peüi tuhphongjao ngei nüng netuhphongpih” shei e.

30Jisui büpa kü, “Hingmei ngei nüng kü enyeih, shinnyih, sheyaüng ou nyipa gashekü nüngi jempa thahshi ngei nelah-aokpih” shei e.

31Shejao büpai wong kohshi, “Ngei nüng mü dijao, ngei nüng nelah-i nenyupih” shei e. Hapakei khan nanglomthü peüi e.

Jisui Gethsemanelei Phoppü

(Mt. 26:36–46; Lk. 22:39–46)

32Jomphong Gethsemane shei epü shingei dai, hatü büpai nanglomthü kü, “Ngei phopshingkü hammü uoshi chongkei” shei e. 33Büpai büpa mü Peter, Jakob hatü Johan hathü müei dai, hatü mongshangei shangponghen chongpang. 34Büpai jomphong kü, “Ngei longi dihen mü mongshangnyüke; neshi-i hatouei uoshi chongkei” shei e.

35Maani yanei heihtü büpai kahdokei aümei shatü, “Aokjema hapa shangpong hepak ngei toueipü chailangshih” shei phop. 36Büpai, “Abba, Opa, nüng shingvaishi lemphü aokbenüng; hapa shangpong yungshong ngei kübü chailangshih; shejao ngei mongpü nevai, nüngi mongpükei vaituh” shei e.

37Büpa leijashingkü jom peü shishi nyu, hatü büpai Peter kü, “Simon, nüng shidainyu je? Nüngi ngei mü ghonda hükao yemmü nenyuaokang je? 38Neshi-i chongkei hatü dokpü kü nevühen phoptuh; laangha kü monghumnyüke, shejao phai kü wong nekoh-ang” shei e.

39Büpa shao daiyei aihük shah eyei phop. 40Shao chem büpa leijashingkü jom peü shishi nyu; mehenangkü jom mükdok vihdaitü nyu, hatü jomi büpa kü mehe ehen nenying. 41Büpa shao jempabü leiyei jomphong kü, “Amphong shaang thahshi shiyei nyiumeinyu je? Hajük-üng! Hepak ngoiteke; Shennyak Ha mangthülei lak kü lanei shuohtükteke. 42Paotuh, jen daishah. Veituh, ngei luhahpüba hatouei peikünyüke!” shei e.

Jisu Yuhahpü hatü Yeppü

(Mt. 26:47–56; Lk. 22:47–53; Jn. 18:3–12)

43Büpa shah eyei nyushingkü ngangahük kü Judas, anpünyi khongkü hük heih, hatü büpa mü khongnyü longpü hük yan, hatü miyaung notü ngongchongthü, shahkung nyuhbüthü hatü behethü kübü peiteke. 44Shaang luhahbüi jomphong kü, “Ngei üpa kü ju kü jüpkahen hapa shennyak yeptuh, hatü meishi yomei müei daituh” shei etü nyangeihepü huhen etüktü nyu. 45Hanangkü Judas jiüshangi Jisu touei heih-ei, “Nyuhbü!” shei etü ju kü jüp. 46Hahepak kü jomphongi Jisu kü lak hüng hatü yep. 47Shejao hathü khongkü yopailei yaongpü hüki büpalei yan tukei ngongchongei aa hükei dhaong lüktük. 48Hahepak kü Jisui jomphong kü, “Ngeiyü gühpa hük hih shei amphongi ngei yepnüng yan hi miyaung noshi peiküpü je? 49Nyihjeih ngei am mü phopshemei nyuhei nyutepih, shejao ammi ngei neyep. Shejao lai kü nyupü jiühen vongbong” shei e. 50Jom peü büpa tuhphongtü nyaidaikem.

51Nethe hük büpa pheikü nyemin ashak ümtü müteke; mechem jomphongi büpa yeppa, 52büpai ashak hukei yakphongtü bümkong mokdai.

Jisu Shahtapei Yaongpü

(Mt. 26:57–68; Lk. 22:54–55, 63–71; Jn. 18:13–14, 19–24)

53Jomi Jisu ngongchong touei müei dei, hatü ngongpathü, behethü hatü shahkung nyuhbüthü peü thaiteke. 54Peter payü khaatshi büpa phei müshi daiyei ngongchongei chingkon thahshi heih-ei mongei shüei veyombü mü aw kü wohong meiyei uoshi nyu. 55Shaang ngongpathü hatü shahtapei nyupüthü kemei Jisu jühen shingvaishi büpa khüei denpü yemei nyu, shejao hükao nedang. 56Mehenangkü longshi shingi büpa khüei shahshem denpü shuoh, hatü jomei denpü shahthü nejiütei. 57Hanei ami yaongei büpa khüei shahshem denpü hapakei e, 58“Hami danpeyü, ‘Ngei hapa laki vepü phopshem bentükhen, hatü nyih jem mongkü laki nevepü phopshem hük vehen’ shei eyei danpeih” shei e. 59Shejao hapa thahshiyao jomei denpü nejiütei.

60Hahepak kü ngongchongi jomphong touei yaongtü Jisu kü, “Nüngi ha kü shahnyok neshuohhen je? Jomi nüng khüei denpü shuohpeyü meheang?” shei phe. 61Shejao büpai jek neshei, hatü shahnyok neshuoh. Shao ngongchongi büpa kü, “Nüngü Moihimanpü Kahvangei Ha Khrista#Messiah sheiyao eehen. je?” shei phe.

62Jisui, “Ngei hih, hatü nüngi Shennyak Ha Jeiyong Kahvangei lakdah philei uotü vangsho phum shangkü yiüküpü eehen” shei jangei e.

63Ha kü ngongchongi büpalei ashak shaaktü, “Ha mü nyeishi mehe denpü nahen? 64Ammi büpa thaüvaüpü danteke. Amphongi mehe temteipa?” shei e. Jom peüi büpayü dihen shangteke shei nyonghü. 65Hanei-i büpa kü yuopi shaohen pang; büpalei mük kü ashaki shaktük, hatü büpa kü ap, hatü büpa kü, “Teteivanei etuh” shei e. Yombüthüi büpa müei deiyei üpteke.

Peteri Jisu Nelahpü

(Mt. 26:69–75; Lk. 22:56–62; Jn. 18:15–18, 25–27)

66Peter maishi chingkonei nyushingkü ngongchongei chongphobü nyühanaüthü khongkü hük heih; 67mechem pinnyüi Peter aw kü uoshi nyupü eepa, pinnyüi büpa kü hüngei veitü, “Nüngao hapa Nazareth am Jisu mü shepeih” shei e.

68Shejao büpai, “Nüngi mehe jung enya ha ngei nenying nevaijü danao nedan” shei nelah-aoki e, hatü büpa shaden lemei heih, hatü ou gateke. 69Mechem hapa chongphopü nyühanaüi büpa eepa, shao hatouei yaongpüthü kü, “Hapa shennyakao hathü khongkü hük hih” shei e. 70Shejao büpai ha kao nelah-aok. Hapheikü maani angtü shao yaongpüthüi Peter kü, “Hingmei-üng nüngao hathü khongkü hük hih; mehenangkü nüngü Galil am khih” shei e. 71Shejao büpai thaüvaühen pang, hatü büpai vangei, “Amphongi epü hapa shennyakü üpashang ngei nenyingnyih” shei e. 72Hahepak kü nyipabü ou gateke. Hahepak kü Peteri büpa kü Jisui, “Ou nyipa gashekü nüngi ngei jempa thahshi nelah-aokpih” shei eshuohpü deih-ei dang. Büpai ha deih-ei dihen mü thep.

Currently Selected:

MARK 14: PHOMBSI

Highlight

Copy