MARK 15

Jisu Pilat Touei Yaongpü

(Mt. 27:1–2, 11–14; Lk. 23:1–5; Jn. 18:28–38)

1Dhom mü lomi ngongpathüi behethü hatü shahkung nyuhbüthü hatü shahtapei nyupüthü mü shah shetteke. Jomi Jisu yepei shatü müei daiyei Pilat kü lanei shuoh.

2“Nüngü Jehoda amei ongpa je?” shei Pilati phe. “Nüngiang enyüke” shei Jisui jang. 3Hahepak kü ngongpathüi lebü douthü jung longi eyei Jisu nyonghü. 4Shao Pilati büpa kü, “Nüngi meheyao nelahhen je?” shei phe. Veituh, jomi nüng nyonghüei meshük shah enyüke? 5Shejao Jisui hajük kü jek neshei; hanangkü Pilat yashan.

Pilati Jisu Jühen Lanei Shuohpü

(Mt. 27:15–26; Lk. 23:13–25; Jn. 18:39—19:16)

6Shaang mo hepak kü shennyakthüi üpa yühenshang khoklatei nyupü shennyak hük büpai veyei deishihhen vanglem nyuteke. 7Shaang mophicheü vamshingkü shennyak jüpü khong mü ompü Barabbas shei menpü shennyak hük khoklatei küpshi nyu. 8Hanangkü khongnyü peiyei Pilat kü büpalei vanglem aimü jom kü dükshih shei yühen pang. 9Hahepak kü büpai jomphong kü, “Ngei am kü Jehoda amei Ong vephahen hiang?” shei phe. 10Mehenangkü büpayü ngongpathüi mükhühpü homei yepei shuohpü khih shei büpai nyingdai. 11Shejao ngongpathüi Barabbas jeiyei ngaishih shei ehen nanglakthü kü nangthongteke. 12Pilati shao jomphong kü, “Shejema ammi Jehoda amei Ongpa shei nyükpü shennyak kü ngei mehe dükhahhünya?” shei phe. 13Jomphongi nyokei, “Büpa shophang kü aptuh” shei len.

14Pilati jomphong kü, “Mehekei, büpai mehe ten dükpa?” shei phe. Shejao jomphongi nyeinya lenei, “Büpa shophang kü aptuh” shei len.

15Hanangkü Pilati khong mongmeihühen nangkü jom touei Barabbas veteke, hatü Jisu kü bheitü shophang kü aphen lanei shuohtük.

Veshanthüi Jisu kü Yaüeilungpü

(Mt. 27:27–31; Jn. 19:2–3)

16Hapheikü veshanthüi ongshem chingkon mongei (hayü governor ongshem) müei shü, hatü veshanthü peü chemi nyük. 17Jomi büpa kü manghmepü bümow owhü, hatü hühthang yüpei athen kei lingtü büpalei shangjing kü thenshuoh. 18Jomi büpa kü selam shihtü shihtü, “Jehoda amei Ongpa den lushi nyutuh!” shei e. 19Jomi büpalei shangjing kü lenshuoh-i bhei, yu-op shao, hatü büpa touei dhüm shuohnyukei aümei sha. 20Mechem jomi büpa kü yaüeilungpü doh, jomi manghmepü büm-ow nyiukei yahtü büpalei büm-ow owhü. Hapheikü jomi büpa shophang kü aphen müei dai.

Jisu Shophang kü Appü

(Mt. 27:32–44; Lk. 23:26–43; Jn. 19:17–27)

21Jomphongi ching leipü chingnyülei yiüjapü Cyrene am Alexander hi Rufus nyilei chepa Simon peijapü lemei pongei Jisulei shophang paihen nyeanteke. 22Jomi Jisu Golgotha (lappai, “Shangvang Shing”) shei nyükpü shingei müei dai. 23Jomi büpa kü yiü mü myrrh shei epü meli vuktü shuoh; shejao büpai ha neying. 24Jomi büpa shophang kü ap, hatü üpa üpai mepa danghen shei jomi phongyomei büpalei ashakviha hantei.

25Jomi büpa nepnüng shü baji kü shophang kü ap. 26Büpa khüei nyangpü shah-ü, “Jehoda amei Ongpa” shei nyuteke. 27Jomi büpa mü gühpa nyi, hük büpalei lakdah lemei, hük laknyong lemei apteke. 28(“Büpayü shahkung mangpüthü mü chemi ie” shei Laihingi epü ha dhaümteke.) 29Peihpüshaipü peüi ngaüm dhiyei büpa kü eelaei, “Aha! Nüngi phopshem bentü nyih jem mongkü vehen hih shei epü-ü, 30nüng nyingi yangtuh, hatü shophang leipü shühkei” shei e. 31Aihük mü ngongpathüao shahkung nyuhbüthü mü chemi büpa kü yaüei, “Büpai mih yangteke, shejao laophü nying neyangaoknyu khih. 32Khrista, Israel amei Ongpa shaang shophang leipü nyemshühkei, shejüang hami ha eetü büpa kü hinglemhen” shei e. Büpa mü shophang kü appüthüao büpa yaüei eteke.

Jisu Dipü

(Mt. 27:45–56; Lk. 23:44–49; Jn. 19:28–30)

33Haümhahphei kübü om jem baji thahshi kahdoknyü kemei manghdai. 34Jem baji kü Jisui ngeü longpai lenei, “Eloi, Eloi, lama sabachthani?” lappai, “Ngelei Kahvang, ngelei Kahvang, mehekei nüngi ngei tuhphongnya?” shei e. 35Mechem yopailei yaongpüthü hanei-i ha danpa, “Bangtuh, büpai Elijah kü nyüknyüke” shei etei. 36Hanei ami mokei heih-ei yiüthi kü mantem hüng hatü lüng kü japtü anei Jisu kü yinghen shuohtü, “Temanghü, Elijah yiüei büpa yahlangkahen hi neyahkahen veishah” shei e. 37Hahepak kü Jisui wong mü ngeü antü ngüshom heeyei mongdang shemmdai.

38Hahepak kü phopshemei haenpü ashak sho kübü la laishi nyi anei shaakdai. 39Shaang mechem veshan kho hük shak kü mübü hük büpa mü khangteishi yaongshi nyupai büpa vaüpü dan, hatü dipü eepa, büpai, “Hingmei, hapa shennyakü Kahvang Ha vaipü khih!” shei e.

40Nyühathü hanei tailei veishi nyu; hathü khongkü Mary Magdalen hatü Mary Jakob naü-eepa, Joses#Joseph hatü Salome hathülei chenyüao yaongshi nyu. 41Hathüi büpa phei mühamteke, hatü büpa Galilei nyushi büpalei nadang kü sheühhamteke, hatü büpa mü Jerusalemei aongpü lebü nyühathü longi nyuteke.

Jisulei Mahng Vüpü

(Mt. 27:57–61; Lk. 23:50–56; Jn. 19:38–42)

42Mechem om dhüpa, hapayü Sabbath nyihshong Tempülempü nyih vaipü nangkü, 43shahtap kü men-e nanglak hük Arimathea am Joseph, üpai Kahvang ongching omdanei nyu, büpa monglongshi Pilat touei peiyei Jisulei mahng yüteke. 44Hahepak kü Pilati büpa diteke shei danei thama. Büpai kho shak kü veshan mübü nyükei büpa dipheikü kanja angla shei phe. 45Mechem büpai hapa veshan mübü homei büpa didaipü shahjang danpa, büpai Joseph kü ha mahng shuoh. 46Hapheikü Joseph-i nyemin ashak shakei mahng yah-ei ha kü jüm, hatü büpai yaong thukei lingpü mahngchongei vüphong, hatü büpai yaong longpü hük ngowei deiyei sha kü küp. 47Jisulei mahng metouei vüpa ha Mary Magdalen hatü Joseslei chenyü Mary nyi-i eeteke.

Currently Selected:

MARK 15: PHOMBSI

Highlight

Copy